‘గేమ్ ఛేంజర్’ పోస్టర్పై దిల్ రాజు షాకింగ్ కామెంట్స్.. ఫేక్ కలెక్షన్లపై ఓపెన్గా ఒప్పుకున్న నిర్మాత
తెలుగు సినీ పరిశ్రమలో సినిమాల కలెక్షన్లు, యూట్యూబ్ వ్యూస్ పేరుతో జరుగుతున్న ఫేక్ ప్రమోషన్లపై ప్రముఖ నిర్మాత దిల్ రాజు ఆసక్తికర వ్యాఖ్యలు చేశారు. ముఖ్యంగా రామ్ చరణ్ నటించిన ‘గేమ్ ఛేంజర్’ విడుదల సమయంలో వచ్చిన రూ.186 కోట్ల కలెక్షన్ల పోస్టర్పై స్పందిస్తూ ఇండస్ట్రీలో కొనసాగుతున్న ట్రెండ్పై తన అభిప్రాయాన్ని నిర్మొహమాటంగా వెల్లడించారు.
ఇటీవల ఇచ్చిన ఓ ప్రత్యేక ఇంటర్వ్యూలో మాట్లాడిన దిల్ రాజు.. “ఆ సమయంలో అందరూ చేస్తున్నట్లుగానే మేము కూడా రూ.186 కోట్ల కలెక్షన్లు అంటూ పోస్టర్ విడుదల చేశాం. కానీ అది నిజమైన వసూళ్లు కాదని ప్రేక్షకులకు రెండో రోజుకే అర్థమైపోతుంది” అని వ్యాఖ్యానించారు. వాస్తవానికి సినిమా ఎంత వసూలు చేసిందో నిర్మాతలకు మాత్రమే పూర్తిగా తెలుసని స్పష్టం చేశారు.
ఒక హీరో సినిమా కలెక్షన్లను చూసి, మరో హీరో సినిమా మరింత ఎక్కువ వసూలు చేసినట్లు చూపించే పోటీ సరికాదని దిల్ రాజు అన్నారు. అభిమానులను సంతోషపెట్టడం కోసం భారీ కలెక్షన్ల పోస్టర్లు విడుదల చేయడం వల్ల ఎలాంటి ఆర్థిక ప్రయోజనం ఉండదని తెలిపారు. అలాంటి ప్రచారాల కోసం డబ్బులు ఖర్చు చేయడం వల్ల నిర్మాతలకు లాభం లేదని పేర్కొన్నారు.
ఇండస్ట్రీలో ఈ ట్రెండ్ 2015 తర్వాత ఎక్కువైందని ఆయన అభిప్రాయపడ్డారు. అంతకుముందు సినిమాల ప్రచారం ప్రధానంగా కంటెంట్ ఆధారంగానే సాగేదని గుర్తు చేశారు. ప్రస్తుతం కలెక్షన్లు, సోషల్ మీడియా వ్యూస్, లైక్స్ వంటి అంశాల చుట్టూ అనవసరమైన హడావుడి పెరిగిందని చెప్పారు.
దీనికి ఉదాహరణగా తన నిర్మాణంలో వచ్చిన ‘సంక్రాంతికి వస్తున్నాం’ చిత్రంలోని “గోదారి గట్టుపైన” పాటను ప్రస్తావించారు. మొదట ఆ పాటకు యూట్యూబ్లో తక్కువ వ్యూస్ మాత్రమే కనిపించాయని, కానీ పాట ప్రేక్షకులను ఆకట్టుకోవడంతో సహజంగానే కోట్లాది వ్యూస్ సాధించిందని వివరించారు. మంచి కంటెంట్ ఉంటే కృత్రిమ ప్రచారాలు అవసరం ఉండవని అన్నారు.
తెలుగు సినిమా పరిశ్రమకు గొప్ప చరిత్ర ఉందని, అలాంటి పరిశ్రమలో ఫేక్ కలెక్షన్లు, కృత్రిమ వ్యూస్ సంస్కృతి కొనసాగడం మంచిది కాదని దిల్ రాజు అభిప్రాయపడ్డారు. కొత్త తరం నిర్మాతలు, హీరోలు ఈ తరహా ప్రచారాలకు దూరంగా ఉండి, నాణ్యమైన కంటెంట్తో ప్రేక్షకుల ఆదరణ పొందే దిశగా ముందుకు సాగాలని సూచించారు.
