బెంగళూరులో ఆరు నెలల క్రితం సహజ మరణంగా భావించిన డాక్టర్ కృతికా రెడ్డి (29) కేసులో ఇప్పుడు సంచలన విషయాలు బయటకు వచ్చాయి. ఆమె భర్త డాక్టర్ మహేంద్ర రెడ్డే ప్లాన్ చేసి చంపేసినట్లు తేలింది.
జనరల్ సర్జన్ అయిన మహేంద్రను పోలీసులు అరెస్టు చేశారు. ఏప్రిల్ 24, 2025న జరిగిన ఈ మృతిని మహేంద్ర రెడ్డి మొదట్లో జీర్ణ సమస్యలు, లో బీపీ కారణంగా సంభవించినట్లు నమ్మించాడు.
అయితే, కృతిక కుటుంబ సభ్యులు పదేపదే చేసిన విజ్ఞప్తుల మేరకు దర్యాప్తును తిరిగి ప్రారంభించిన పోలీసులు, మహేంద్ర రెడ్డి తన వైద్య నైపుణ్యాన్ని ఉపయోగించి, నియంత్రిత మత్తుమందు ప్రొపొఫాల్ను అధిక మోతాదులో ఇవ్వడం వల్లే ఆమె శ్వాసకోశ వైఫల్యంతో మరణించిందని నిర్ధారించారు. అక్టోబర్ 14, 2025న మణిపాల్లో నిందితుడిని పోలీసులు అదుపులోకి తీసుకున్నారు.
దర్యాప్తు, ఎఫ్ఎస్ఎల్ నివేదికల సంచలనం:
మహేంద్ర రెడ్డి మొదట తన భార్య జీర్ణ సమస్యల కారణంగా చనిపోయిందని పేర్కొన్నాడు. అయితే పోస్ట్ మార్టం మరియు ఫోరెన్సిక్ సైన్స్ లాబొరేటరీ (FSL) నివేదికల్లో కృతిక శరీరంలో ప్రొపొఫాల్ జాడలు ఉన్నట్లు స్పష్టమైంది. ఇది మత్తుమందు అధిక మోతాదు కారణంగా సంభవించిన మరణమని వైద్యులు ధృవీకరించారు.
“ఇది అనుమానాస్పద మరణం, అయినప్పటికీ ఎవరూ ఫిర్యాదు చేయలేదు. మేము అసాధారణ మరణ నివేదిక (UDR)గా కేసు నమోదు చేసి, ఘటనా స్థలం నుండి ఆధారాలను సేకరించి FSLకు పంపాము. FSL నివేదిక ఆధారంగా, అధిక మోతాదులో మత్తుమందు ఇవ్వడం వల్లే మరణం సంభవించిందని తేలింది. అప్పుడే మృతురాలి తండ్రి తన భర్తపై ఫిర్యాదు చేశారు” అని బెంగళూరు సిటీ పోలీస్ కమిషనర్ సీమంత్ కుమార్ సింగ్ వెల్లడించారు.
