పారా ఆసియా క్రీడల్లో భారత అథ్లెట్లు అదరగొడుతున్నారు. అద్భుతమైన ప్రదర్శనలతో పతకాల వేట కొనసాగిస్తూ దేశానికి గర్వకారణంగా నిలుస్తున్నారు. తాజాగా భారత్ మొత్తం 103 పతకాలు సాధించి పతకాల పట్టికలో నాలుగో స్థానంలో కొనసాగుతోంది. ఇందులో 27 స్వర్ణాలు, 33 రజతాలు, 43 కాంస్యాలు ఉన్నాయి. ముఖ్యంగా అథ్లెటిక్స్‌లోనే సగానికి పైగా పతకాలు రావడం భారత క్రీడాకారుల ఆధిపత్యాన్ని చాటుతోంది.
ప్రపంచ రికార్డులతో మెరిసిన భారత అథ్లెట్లు
పురుషుల టీ64 విభాగంలో 400 మీటర్ల పరుగును సందీప్ కేవలం 52.28 సెకన్లలో పూర్తి చేసి స్వర్ణ పతకంతో పాటు ప్రపంచ రికార్డును తన ఖాతాలో వేసుకున్నాడు. ఇదే పోటీలో మరో భారత అథ్లెట్ అజయ్ కుమార్ 53.61 సెకన్లతో మూడో స్థానంలో నిలిచి కాంస్యం సాధించాడు. ఈ క్రమంలో అతడు గేమ్స్ రికార్డును కూడా నమోదు చేశాడు.
జావెలిన్ త్రోలో హనీ అద్భుత ప్రదర్శనతో ఆకట్టుకున్నాడు. ఎఫ్37/38 విభాగంలో మొదట 59.72 మీటర్ల దూరం విసిరి ప్రపంచ రికార్డును అందుకున్నాడు. ఆ తర్వాత తన చివరి ప్రయత్నంలో 60.49 మీటర్ల దూరం జావెలిన్ విసిరి తన రికార్డును తానే అధిగమించాడు. ఈ ప్రదర్శనతో స్వర్ణ పతకాన్ని కైవసం చేసుకున్నాడు.
మోనా అగర్వాల్ ఖాతాలో మరో స్వర్ణం
భారత పారా షూటర్ మోనా అగర్వాల్ మరోసారి సత్తా చాటింది. మహిళల 50 మీటర్ల రైఫిల్ త్రీ పొజిషన్స్ ఎస్‌హెచ్1 విభాగంలో 357.5 పాయింట్లు సాధించి ప్రపంచ రికార్డుతో స్వర్ణ పతకాన్ని అందుకుంది. గతంలో స్వీడన్‌కు చెందిన అన్నా బెన్సన్ నెలకొల్పిన 356 పాయింట్ల రికార్డును ఆమె అధిగమించింది.
ఇప్పటికే మహిళల 10 మీటర్ల ఎయిర్ రైఫిల్ స్టాండింగ్ ఎస్‌హెచ్1 విభాగంలోనూ మోనా స్వర్ణం సాధించింది. ఆ ఈవెంట్‌లో గేమ్స్ రికార్డుతో మెరిసిన ఆమె.. ఇప్పుడు మరో ప్రపంచ రికార్డును తన ఖాతాలో వేసుకుని భారత పతకాల సంఖ్యను పెంచింది.
బ్యాడ్మింటన్‌లో భారత షట్లర్ల హవా
పారా బ్యాడ్మింటన్‌లోనూ భారత ఆటగాళ్లు అద్భుతమైన ప్రదర్శన చేశారు. పురుషుల సింగిల్స్ ఎస్‌ఎల్3 ఫైనల్లో భారత షట్లర్లు నితేశ్ కుమార్, ప్రమోద్ భగత్ తలపడ్డారు. ఈ పోరులో నితేశ్ 21-18, 21-16 తేడాతో విజయం సాధించి స్వర్ణ పతకాన్ని గెలుచుకున్నాడు. ప్రమోద్ రజతంతో సరిపెట్టుకున్నాడు.
పురుషుల సింగిల్స్ ఎస్‌ఎల్4 విభాగంలో నవీన్ శివకుమార్ 21-9, 21-17 తేడాతో ఇండోనేషియా ఆటగాడు ఫెర్డీని ఓడించి బంగారు పతకాన్ని సాధించాడు. మహిళల సింగిల్స్ ఎస్‌యూ5 ఫైనల్లో తులసిమతి మురుగేశన్ చైనా క్రీడాకారిణి యాంగ్ చేతిలో 18-21, 11-21 తేడాతో ఓడిపోయి రజత పతకాన్ని అందుకుంది.
ఆర్చరీలోనూ స్వర్ణం.. అథ్లెటిక్స్‌లో రజతం
పురుషుల రికర్వ్ టీమ్ ఈవెంట్‌లో హర్విందర్ సింగ్, విజయ్ సుండి జోడీ అద్భుత ప్రదర్శన చేసింది. ఫైనల్లో చైనా ఆర్చర్లను ఓడించి స్వర్ణ పతకాన్ని సాధించింది.
మరోవైపు పురుషుల టీ46 విభాగంలో 1500 మీటర్ల పరుగును ప్రమోద్ బిర్జానియా 4 నిమిషాల 9.65 సెకన్లలో పూర్తి చేసి రజత పతకాన్ని గెలుచుకున్నాడు. శ్రీలంకకు చెందిన పువాక్పిటికండె 4 నిమిషాల 3.25 సెకన్లతో గేమ్స్ రికార్డు నెలకొల్పి స్వర్ణాన్ని అందుకున్నాడు.
ఇలా అథ్లెటిక్స్, షూటింగ్, బ్యాడ్మింటన్, ఆర్చరీ విభాగాల్లో భారత క్రీడాకారులు పతకాలతో పాటు రికార్డులను సాధిస్తున్నారు. భారత్ పతకాల సంఖ్య 103కు చేరడంతో అభిమానుల్లో ఆనందం వ్యక్తమవుతోంది. పోటీలు ముగిసేలోపు మరిన్ని పతకాలు సాధించి పతకాల పట్టికలో మెరుగైన స్థానానికి చేరుకోవాలని భారత బృందం లక్ష్యంగా పెట్టుకుంది.