ఐపీఎల్ 2027 సీజన్‌కు ముందు సన్‌రైజర్స్ హైదరాబాద్ కీలక ఆటగాళ్ల మార్పిడి చేపట్టింది. ఢిల్లీ క్యాపిటల్స్‌తో జరిగిన ట్రేడ్‌లో భారత ఎడమచేతి వాటం పేసర్ టీ. నటరాజన్‌ను తిరిగి జట్టులోకి తీసుకుంది. ఈ ఒప్పందంలో భాగంగా లెగ్ స్పిన్నర్ జీషాన్ అన్సారీ ఢిల్లీ క్యాపిటల్స్‌కు వెళ్లనున్నాడు. అయితే, ఈ ట్రేడ్‌లో నటరాజన్ తన పారితోషికాన్ని రూ.10.75 కోట్ల నుంచి రూ.5 కోట్లకు తగ్గించుకోవడం ఆసక్తికరంగా మారింది.
రెండేళ్ల తర్వాత హైదరాబాద్‌కు తిరిగి..
నటరాజన్ 2020 నుంచి 2024 వరకు సన్‌రైజర్స్ హైదరాబాద్ తరఫున ఆడాడు. ముఖ్యంగా ఐపీఎల్ 2024లో 19 వికెట్లు పడగొట్టి జట్టు తరఫున అత్యధిక వికెట్లు తీసిన బౌలర్‌గా నిలిచాడు. ఆ సీజన్‌లో హైదరాబాద్ ఫైనల్‌కు చేరడంలో తనవంతు పాత్ర పోషించాడు. 2025 వేలంలో ఢిల్లీ క్యాపిటల్స్ అతడిని రూ.10.75 కోట్లకు కొనుగోలు చేసింది. ఇప్పుడు ట్రేడ్ ద్వారా రూ.5 కోట్ల పారితోషికంతో తిరిగి హైదరాబాద్ జట్టులో చేరనున్నాడు.
ఢిల్లీకి జీషాన్ అన్సారీ..
ఈ ట్రేడ్‌లో భాగంగా యువ లెగ్ స్పిన్నర్ జీషాన్ అన్సారీ ఢిల్లీ క్యాపిటల్స్‌కు మారనున్నాడు. అతడు ఐపీఎల్‌లో ఇప్పటివరకు 10 మ్యాచ్‌లు ఆడి ఆరు వికెట్లు సాధించాడు. ఢిల్లీ జట్టులో రూ.40 లక్షల ప్రస్తుత పారితోషికంతోనే కొనసాగనున్నాడు. అతడి చేరికతో ఢిల్లీ స్పిన్ బౌలింగ్ విభాగానికి మరో ఎంపిక అందుబాటులోకి రానుంది.
డెత్ ఓవర్లలో నటరాజన్ కీలకం కానున్నాడా?
నటరాజన్ రాకతో సన్‌రైజర్స్ హైదరాబాద్ పేస్ బౌలింగ్ విభాగానికి అనుభవం తోడవనుంది. ముఖ్యంగా చివరి ఓవర్లలో యార్కర్లతో బ్యాటర్లను కట్టడి చేయగల సామర్థ్యం అతడి బలం. హైదరాబాద్ జట్టు ఐపీఎల్ 2027లో మెరుగైన ప్రదర్శన చేయాలంటే బౌలింగ్ విభాగం కీలకం కానుంది. ఈ నేపథ్యంలో నటరాజన్ పునరాగమనం జట్టుకు ఎంతవరకు ఉపయోగపడుతుందో చూడాలి.