Chennai Super Kings Playing XI: ఐపీఎల్ 2026 సీజన్ ఆరంభంలోనే క్రికెట్ అభిమానులకు అసలైన మజా అందనుంది. గౌహతి వేదికగా జరగనున్న మూడో మ్యాచ్‌లో చెన్నై సూపర్ కింగ్స్, రాజస్థాన్ రాయల్స్ తలపడనున్నాయి. గత సీజన్ చేదు జ్ఞాపకాలను చెరిపివేస్తూ, భారీ మార్పులు, సంచలన ట్రేడింగ్‌ల తర్వాత ఇరు జట్లు ఈ పోరుకు సిద్ధమయ్యాయి. గెలుపే లక్ష్యంగా సాగే ఈ పోరు ఆసక్తికరం కానుంది.
IPL 2026, CSK vs RR: ఐపీఎల్ చరిత్రలోనే అత్యంత భారీ ట్రేడింగ్ ఒప్పందాల తర్వాత చెన్నై సూపర్ కింగ్స్, రాజస్థాన్ రాయల్స్ జట్లు తలపడుతుండటం గమనార్హం. సంజూ శాంసన్‌ను చెన్నై దక్కించుకోగా, రవీంద్ర జడేజా, సామ్ కరన్‌లు రాజస్థాన్ గూటికి చేరారు. సోమవారం జరిగే ఈ మ్యాచ్‌లో ట్రేడ్ అయిన ఆటగాళ్లందరూ బరిలోకి దిగుతుండటంతో మ్యాచ్‌పై భారీ అంచనాలు నెలకొన్నాయి. గత సీజన్‌లో పట్టికలో చివరి స్థానాల్లో నిలిచిన ఈ జట్లు, ఈసారి శుభారంభం చేయాలని పట్టుదలగా ఉన్నాయి.
మహేంద్ర సింగ్ ధోనీ దూరం. సీఎస్కేకు భారీ ఎదురుదెబ్బ.
సీజన్ ప్రారంభానికి ముందే చెన్నై సూపర్ కింగ్స్‌కు ఊహించని షాక్ తగిలింది. గాయం కారణంగా మాజీ కెప్టెన్ ఎంఎస్ ధోనీ మొదటి రెండు వారాల పాటు టోర్నీకి దూరమయ్యాడు. అలాగే బౌలర్ నాథన్ ఎల్లిస్ కూడా అందుబాటులో లేకపోవడం జట్టును కొంత బలహీనపరిచింది. ధోనీ స్థానంలో ఇంగ్లండ్ ఆల్‌రౌండర్ జేమీ ఓవర్టన్ తుది జట్టులోకి వచ్చే అవకాశం ఉంది. డెవాల్డ్ బ్రెవిస్ కూడా గాయపడటంతో ఆస్ట్రేలియా బ్యాటర్ మాట్ షార్ట్ జట్టులో చేరనున్నాడు.
బలమైన బ్యాటింగ్ లైనప్. ఓపెనర్లుగా రుతురాజ్, సంజూ
కెప్టెన్ రుతురాజ్ గైక్వాడ్ ఈసారి సంజూ శాంసన్‌తో కలిసి ఇన్నింగ్స్ ప్రారంభించనున్నాడు. సంజూ దూకుడుగా ఆడుతూ స్కోరు బోర్డును పరిగెత్తించే బాధ్యత తీసుకోగా, రుతురాజ్ యాంకర్ రోల్ పోషించనున్నాడు. మూడో స్థానంలో యువ సంచలనం ఆయుష్ మ్హత్రే బ్యాటింగ్‌కు రానున్నాడు. మిడిల్ ఆర్డర్‌లో శివమ్ దూబే పవర్‌ హిట్టింగ్‌తో పాటు గౌహతి పిచ్‌పై బౌలింగ్‌లోనూ కీలక పాత్ర పోషించనున్నాడు.