ఆసియా క్రీడలు 2026లో భారత బాక్సింగ్‌కు స్వర్ణ కాంతులు అద్దాడు హరియాణాకు చెందిన యువ బాక్సర్ అంకుశ్ పంఘల్. పురుషుల 80 కేజీల విభాగంలో అద్భుత ప్రదర్శనతో పసిడి పతకాన్ని సొంతం చేసుకున్నాడు. దక్షిణ కొరియాకు చెందిన మిన్సోంగ్ కిమ్‌తో జరిగిన ఫైనల్లో 5-0తో ఘన విజయం సాధించి చరిత్ర సృష్టించాడు.
ఫైనల్లో పూర్తి ఆధిపత్యం..
ఫైనల్ బౌట్‌లో అంకుశ్ ఆరంభం నుంచే ప్రత్యర్థిపై ఆధిపత్యం ప్రదర్శించాడు. తొలి రౌండ్‌లో 4-1తో పైచేయి సాధించిన అతడు.. ఆ తర్వాతి రౌండ్లలోనూ అదే దూకుడును కొనసాగించాడు. చివరికి జడ్జిల ఏకగ్రీవ నిర్ణయంతో 5-0 విజయం అందుకుని స్వర్ణ పతకాన్ని తన ఖాతాలో వేసుకున్నాడు.
21 ఏళ్ల అంకుశ్‌కు ఇది ఆసియా క్రీడల్లో తొలి స్వర్ణం మాత్రమే కాదు.. పురుషుల బాక్సింగ్‌లో భారత్‌కు ఈ క్రీడల్లో లభించిన తొలి పసిడి పతకం కూడా. అంతకుముందు భారత్ పురుషుల బాక్సింగ్‌లో రెండు కాంస్య పతకాలతోనే సరిపెట్టుకుంది.
కామన్వెల్త్‌లోనూ గోల్డ్..
అంకుశ్ పంఘల్‌కు అంతర్జాతీయ వేదికపై ఇది మరో కీలక విజయం. ఆసియా క్రీడలకు ముందు కామన్వెల్త్ క్రీడల్లో అరంగేట్రం చేసిన అతడు అక్కడే స్వర్ణ పతకం సాధించాడు. ఇప్పుడు ఆసియా క్రీడల్లోనూ పసిడి పతకంతో తన సత్తాను చాటుకున్నాడు.
మహిళల విభాగంలోనూ డబుల్ గోల్డ్..
అదే రోజు భారత మహిళా బాక్సర్లు కూడా అదరగొట్టారు. 75 కేజీల విభాగంలో లవ్లీనా బోర్గొహెయిన్, 65 కేజీల విభాగంలో పర్వీన్ హూడా స్వర్ణ పతకాలు సాధించారు. దీంతో మహిళల బాక్సింగ్‌లో ఆసియా క్రీడల స్వర్ణం సాధించిన భారత బాక్సర్ల జాబితాలో వీరిద్దరూ చేరారు.
తన పుట్టినరోజునే బరిలోకి దిగిన లవ్లీనా.. చైనాకు చెందిన జియి బావోపై 5-0తో విజయం సాధించింది. గత ఎడిషన్‌లో సాధించిన రజత పతకాన్ని ఈసారి స్వర్ణంగా మార్చుకుంది.
మరోవైపు పర్వీన్ హూడా.. పారిస్ ఒలింపిక్స్ కాంస్య పతక విజేత చెన్ నియెన్-చిన్‌పై 3-2తో విజయం సాధించి తొలిసారి ఆసియా క్రీడల స్వర్ణాన్ని అందుకుంది.
అంకుశ్, లవ్లీనా, పర్వీన్ సాధించిన విజయాలతో భారత బాక్సింగ్ బృందం ఆసియా క్రీడల వేదికపై అద్భుత ప్రదర్శన కనబరిచింది.