సహజమైన అందం, సింపుల్ లుక్‌తో ప్రేక్షకులను ఆకట్టుకునే నటి సాయి పల్లవి మరోసారి ప్రత్యేక ఆకర్షణగా నిలిచారు. ‘రామాయణ’ సినిమా ట్రైలర్ లాంచ్ వేడుకలో ఆమె ధరించిన లేత గులాబీ రంగు చీర అందరి దృష్టిని ఆకర్షించింది. భారీ హంగులు, ఆడంబరమైన అలంకరణలకు దూరంగా ఉంటూ సంప్రదాయబద్ధమైన రూపంలో కనిపించిన సాయి పల్లవి ఫొటోలు, వీడియోలు ప్రస్తుతం సోషల్ మీడియాలో వైరల్ అవుతున్నాయి.
పింక్ సిల్క్ చీరలో సంప్రదాయ అందం
‘రామాయణ’ ఇంగ్లీష్ ట్రైలర్ లాంచ్ కార్యక్రమంలో సాయి పల్లవి లేత గులాబీ రంగు టిష్యూ సిల్క్ చీరను ధరించారు. చీరపై ఉన్న వెండి రంగు జర్దోసీ ఎంబ్రాయిడరీ, జరీ అంచులు, అందమైన మోటిఫ్స్ ఆమె రూపానికి ప్రత్యేక ఆకర్షణగా నిలిచాయి. చీరకు సరిపోయే షార్ట్ స్లీవ్స్ బ్లౌజ్‌తో సంప్రదాయ, ఆధునిక శైలులను చక్కగా మేళవించారు.
తక్కువ ఆభరణాలతోనే ప్రత్యేక ఆకర్షణ
సాయి పల్లవి తన అలంకరణను చాలా సింపుల్‌గా ఉంచుకున్నారు. చెవులకు గుండ్రటి చెవిపోగులు, చేతికి గాజులు, కడా వంటి ఆభరణాలతో అందంగా కనిపించారు. తన సహజమైన కురులను సగం వదిలి, సగం వెనక్కి సర్దిన హెయిర్‌స్టైల్‌తో హుందాగా మెరిశారు. మేకప్ కూడా పరిమితంగా ఉంచడంతో ఆమె సహజ సౌందర్యం మరింత ప్రత్యేకంగా కనిపించింది.
‘రామాయణ’ ట్రైలర్ వేడుకలో సందడి
నితీశ్ తివారీ దర్శకత్వంలో తెరకెక్కుతున్న ‘రామాయణ’లో సాయి పల్లవి సీతాదేవి పాత్రను పోషిస్తున్నారు. రణ్‌బీర్ కపూర్ రాముడిగా, యష్ రావణుడిగా నటిస్తున్నారు. ఏ.ఆర్. రెహమాన్ ఈ చిత్రానికి సంగీతం అందిస్తున్నారు. అక్టోబర్ 15న బెంగళూరులో నిర్వహించిన ట్రైలర్ లాంచ్ వేడుకలో చిత్రబృందం పాల్గొంది. ఈ కార్యక్రమానికి సంబంధించిన ఫొటోలు నెట్టింట చక్కర్లు కొడుతుండగా, సాయి పల్లవి సంప్రదాయ చీర కట్టు ప్రత్యేకంగా చర్చనీయాంశమైంది.