‘బేబీ’ సినిమాతో మంచి క్రేజ్ తెచ్చుకున్న ఆనంద్ దేవరకొండ, వైష్ణవి చైతన్య మరోసారి జంటగా నటించిన చిత్రం ‘ఎపిక్ – ఫస్ట్ సెమిస్టర్’. ‘90s మిడిల్ క్లాస్’ వెబ్ సిరీస్‌తో గుర్తింపు తెచ్చుకున్న ఆదిత్య హాసన్ ఈ సినిమాకు దర్శకత్వం వహించారు. యూత్‌ఫుల్ లవ్ స్టోరీగా తెరకెక్కిన ఈ మూవీ సెప్టెంబర్ 11న థియేటర్లలో విడుదలైంది.
థియేటర్లలో మిశ్రమ స్పందన..
విడుదలకు ముందు గ్లింప్స్, ట్రైలర్ సినిమాపై ఆసక్తిని పెంచాయి. అయితే థియేటర్లలోకి వచ్చిన తర్వాత ‘ఎపిక్ – ఫస్ట్ సెమిస్టర్’కు ఆశించిన స్థాయిలో స్పందన దక్కలేదు. కథ, కొన్ని సన్నివేశాలపై విమర్శలు రావడంతో పాటు నెగెటివ్ టాక్ కూడా వచ్చింది. అయినప్పటికీ యూత్‌లో కొంతమంది ఈ సినిమాను ఎంజాయ్ చేశారు. దీంతో బాక్సాఫీస్ వద్ద ఈ చిత్రం ఓ మోస్తరు ఫలితాన్నే అందుకుంది.
అక్టోబర్ 9 నుంచి ఓటీటీలోకి?
ఇప్పుడు ‘ఎపిక్ – ఫస్ట్ సెమిస్టర్’ ఓటీటీ ప్రేక్షకులను అలరించేందుకు సిద్ధమవుతోంది. ఈ సినిమా డిజిటల్ స్ట్రీమింగ్ హక్కులను నెట్‌ఫ్లిక్స్ సొంతం చేసుకున్నట్లు సమాచారం. అక్టోబర్ 9 నుంచి స్ట్రీమింగ్‌కు వచ్చే అవకాశం ఉందని తెలుస్తోంది. దీనిపై త్వరలోనే అధికారిక ప్రకటన వెలువడే అవకాశముంది. తెలుగుతో పాటు ఇతర దక్షిణాది భాషలు, హిందీలోనూ సినిమా అందుబాటులోకి రావచ్చని సమాచారం.
సితార ఎంటర్‌టైన్‌మెంట్స్ బ్యానర్‌పై సూర్యదేవర నాగవంశీ, సాయి సౌజన్య సంయుక్తంగా ఈ చిత్రాన్ని నిర్మించారు. వాసుకి, శివాజీ, కల్యాణి శంకర్, శ్రీనివాస్ గవిరెడ్డి తదితరులు కీలక పాత్రల్లో నటించారు. హేషమ్ అబ్దుల్ వహాబ్ సంగీతం అందించారు. థియేటర్లలో ఆశించిన ఫలితం అందుకోలేని కొన్ని సినిమాలు ఓటీటీలో మంచి ఆదరణ పొందుతున్న నేపథ్యంలో ‘ఎపిక్ – ఫస్ట్ సెమిస్టర్’కు కూడా డిజిటల్ రిలీజ్‌తో కొత్త ప్రేక్షకులు దొరికే అవకాశముంది.