ఒకప్పుడు సినిమా కథను రెండు భాగాలుగా తెరకెక్కించడమే పెద్ద విషయంగా ఉండేది. కానీ ఇప్పుడు ట్రెండ్ మారిపోయింది. బాక్సాఫీస్ వద్ద విజయం సాధించిన సినిమాలను కొనసాగిస్తూ పార్ట్ 3, పార్ట్ 4 అంటూ భారీ ఫ్రాంచైజీలను రూపొందించేందుకు దర్శకులు ఆసక్తి చూపిస్తున్నారు. ఓటీటీ వెబ్ సిరీస్‌లలో కనిపించే సీజన్ల ట్రెండ్ ఇప్పుడు వెండితెరపైనా కొనసాగుతోంది. ఈ నేపథ్యంలో ప్రేక్షకుల్లో ఆసక్తి పెంచుతున్న క్రేజీ సీక్వెల్స్‌పై ఓ లుక్కేద్దాం.
జైలర్ 3 నుంచి దృశ్యం 4 వరకు..
సూపర్‌స్టార్ రజనీకాంత్ నటించిన ‘జైలర్’ సిరీస్‌పై ప్రేక్షకుల్లో భారీ అంచనాలు ఉన్నాయి. ‘జైలర్ 2’ క్లైమాక్స్‌లో విజయ్ సేతుపతి కనిపించడంతో మూడో భాగంపై చర్చ మొదలైంది. ఈ పరిణామాలు ‘జైలర్ 3’పై ఆసక్తిని మరింత పెంచుతున్నాయి.
మరోవైపు, మలయాళంలో విజయవంతమైన ‘దృశ్యం’ ఫ్రాంచైజీ కూడా నాలుగో భాగం దిశగా సాగుతోంది. దర్శకుడు జీతు జోసెఫ్ ఈ సిరీస్‌ను కొనసాగించే ఆలోచనను ఇప్పటికే వెల్లడించారు. హిందీ వెర్షన్‌లో కథ ముగిసినా, మలయాళంలో మాత్రం ‘దృశ్యం 4’పై అభిమానులు ఆశలు పెట్టుకున్నారు.
కాంతార, పుష్ప, కేజీఎఫ్‌పైనా అంచనాలు
కన్నడ చిత్ర పరిశ్రమలో సంచలనం సృష్టించిన ‘కాంతార’ సిరీస్‌కు కూడా తదుపరి భాగం రానుందనే ఆసక్తి నెలకొంది. నటుడు, దర్శకుడు రిషబ్ శెట్టి ఈ ఫ్రాంచైజీని కొనసాగించే దిశగా కథపై పని చేస్తున్నట్లు వెల్లడించారు.
ఇక అల్లు అర్జున్ నటించిన ‘పుష్ప’, యశ్ హీరోగా ప్రశాంత్ నీల్ తెరకెక్కించిన ‘కేజీఎఫ్’ చిత్రాల తదుపరి భాగాలపైనా అభిమానుల్లో భారీ అంచనాలు ఉన్నాయి. ‘పుష్ప 3’, ‘కేజీఎఫ్ 3’ గురించి గతంలోనే ప్రకటనలు వచ్చినప్పటికీ, ఈ సినిమాలు ఎప్పుడు సెట్స్‌పైకి వెళ్తాయనే విషయంలో ఇంకా స్పష్టత రావాల్సి ఉంది. ప్రస్తుతం ఆయా చిత్ర బృందాలు ఇతర ప్రాజెక్టులతో బిజీగా ఉండటంతో అభిమానులు ఈ సీక్వెల్స్ కోసం ఎదురుచూస్తున్నారు.
సక్సెస్‌ఫుల్ కథలతో కొనసాగుతున్న ఫ్రాంచైజీ ట్రెండ్
సూర్య నటించిన ‘సింగం’ సిరీస్ కూడా పలు భాగాలతో ప్రేక్షకులను అలరించింది. ఒక సినిమా విజయం సాధించిన తర్వాత అదే కథా ప్రపంచాన్ని మరింత విస్తరించి కొత్త పాత్రలు, ఆసక్తికరమైన మలుపులతో తదుపరి భాగాలను రూపొందించడం ఇప్పుడు చిత్ర పరిశ్రమలో కీలక ట్రెండ్‌గా మారింది.
అయితే, సీక్వెల్స్‌కు ప్రేక్షకుల్లో అంచనాలు ఎక్కువగా ఉండటంతో కథ, స్క్రీన్‌ప్లే విషయంలో దర్శకులకు సవాళ్లు కూడా ఎదురవుతున్నాయి. తొలి భాగం స్థాయిని అందుకోవడంతో పాటు కొత్తదనాన్ని చూపించాల్సిన అవసరం ఉంది. మరి ఈ భారీ ఫ్రాంచైజీలు రాబోయే రోజుల్లో బాక్సాఫీస్ వద్ద ఎలాంటి విజయాలు సాధిస్తాయో చూడాలి.