ఐకాన్ స్టార్ అల్లు అర్జున్, దర్శకుడు అట్లీ కాంబినేషన్‌లో తెరకెక్కుతున్న భారీ పాన్ ఇండియా చిత్రం ‘రాకా’పై ఇప్పటికే భారీ అంచనాలు ఉన్నాయి. ఈ సినిమాకు సంబంధించిన ప్రతి చిన్న అప్‌డేట్ సోషల్ మీడియాలో ఆసక్తికరంగా మారుతోంది. ముఖ్యంగా సినిమాలో నటించబోయే హీరోయిన్ల విషయంలో రకరకాల వార్తలు వైరల్ అవుతున్నాయి.
ఆ రూమర్స్‌పై ఐశ్వర్య లక్ష్మి క్లారిటీ
తాజాగా మలయాళ నటి ఐశ్వర్య లక్ష్మి ‘రాకా’లో నెగెటివ్ షేడ్స్ ఉన్న పాత్రలో కనిపించనున్నారంటూ ప్రచారం జరిగింది. అయితే ఈ వార్తలపై ఆమె స్వయంగా స్పందించారు. తాను ‘రాకా’లో నటించడం లేదని స్పష్టం చేశారు.
సోషల్ మీడియాలో ఈ వార్తలను చూసి మొదట ఆశ్చర్యపోయానని, ఆ తర్వాత నవ్వుకున్నానని ఐశ్వర్య లక్ష్మి తెలిపారు. అంతేకాదు.. ‘‘అసలు ఆ సినిమాలో నేనే లేను.. ఎవరైనా నాకు ఈ ప్రాజెక్టులో ఛాన్స్ ఇప్పిస్తే బాగుంటుంది’’ అంటూ సరదాగా వ్యాఖ్యానించారు. దీంతో ఆమె ‘రాకా’లో విలన్ పాత్రలో నటించబోతున్నారన్న ప్రచారానికి చెక్ పడింది.
నలుగురు హీరోయిన్లు ఉంటారా?
మరోవైపు అట్లీ ఈ సినిమాను భారీ స్థాయిలో తెరకెక్కిస్తున్నట్లు తెలుస్తోంది. కథకు అనుగుణంగా సినిమాలో నలుగురు హీరోయిన్లకు అవకాశం ఉందనే టాక్ ఇండస్ట్రీలో వినిపిస్తోంది. ఇందులో అల్లు అర్జున్ సరసన మెయిన్ ఫీమేల్ లీడ్‌గా దీపికా పదుకొణె పేరు ప్రముఖంగా వినిపిస్తోంది.
అలాగే మలయాళ నటి ఫెమినా జార్జ్ కూడా ఓ కీలక పాత్రలో కనిపించనున్నారని ప్రచారం జరుగుతోంది. మిగిలిన పాత్రల కోసం జాన్వీ కపూర్, రష్మిక మందన్న పేర్లు కూడా వినిపిస్తున్నాయి. అయితే ఈ కాస్టింగ్‌పై చిత్రబృందం నుంచి ఇప్పటివరకు అధికారిక ప్రకటన రాలేదు.
భారీ అంచనాలతో ‘రాకా’
‘పుష్ప’ సిరీస్‌తో పాన్ ఇండియా స్థాయిలో గుర్తింపు తెచ్చుకున్న అల్లు అర్జున్.. ‘జవాన్’తో భారీ విజయాన్ని అందుకున్న అట్లీతో కలిసి పనిచేస్తుండటంతో ‘రాకా’పై ఆసక్తి మరింత పెరిగింది. సినిమాకు సంబంధించిన నటీనటుల ఎంపికపై వస్తున్న వార్తలు కూడా ఎప్పటికప్పుడు చర్చనీయాంశంగా మారుతున్నాయి.
ఇక సినిమాలో నిజంగా ఎంత మంది హీరోయిన్లు ఉంటారు? ఎవరి పాత్రలు ఎలా ఉండబోతున్నాయి? అనే విషయాలపై మేకర్స్ అధికారిక ప్రకటన చేస్తేనే పూర్తి స్పష్టత వచ్చే అవకాశం ఉంది.