నటుడు శివాజీ ప్రధాన పాత్రలో బాలాజీ వీఆర్ దర్శకత్వంలో రూపొందుతున్న కొత్త చిత్రానికి సంబంధించిన ఆసక్తికరమైన అప్‌డేట్ వెలువడింది. ప్రస్తుతం ‘ఎం3’ అనే వర్కింగ్ టైటిల్‌తో తెరకెక్కుతున్న ఈ సినిమా షూటింగ్ పూర్తయింది. ఈ సందర్భంగా మంగళవారం చిత్రబృందం శివాజీ ఫస్ట్ లుక్‌ను విడుదల చేసింది.
పంచెకట్టులో సీరియస్ లుక్‌తో కనిపిస్తున్న శివాజీ ఫస్ట్ లుక్ ప్రేక్షకుల్లో ఆసక్తిని పెంచుతోంది. ఎస్.టి.బి.ఎల్ సినిమాస్ సంస్థ నిర్మిస్తున్న ఈ చిత్రంలో రవికృష్ణ, భరణ్, ఖుష్బూ, కసిరెడ్డి తదితరులు కీలక పాత్రలు పోషిస్తున్నారు.
యూత్‌ఫుల్ ఫ్యామిలీ ఎంటర్‌టైనర్‌గా..
‘ఎం3’ సినిమా యువతతో పాటు కుటుంబ ప్రేక్షకులను ఆకట్టుకునేలా ఉంటుందని చిత్ర వర్గాలు వెల్లడించాయి. వినోదంతో పాటు మంచి సందేశాన్ని అందించేలా కథను రూపొందించినట్లు తెలిపాయి. ఆద్యంతం నవ్వులు పంచే ఈ చిత్రాన్ని డిసెంబరులో ప్రేక్షకుల ముందుకు తీసుకొచ్చేందుకు సన్నాహాలు చేస్తున్నట్లు పేర్కొన్నాయి. త్వరలోనే సినిమాకు సంబంధించిన మరిన్ని వివరాలు వెల్లడయ్యే అవకాశం ఉంది.