ఢిల్లీలోని ఇందిరాగాంధీ స్టేడియంలో నిర్వహించిన వికసిత్‌ భారత్‌ సంకల్ప సభలో ప్రధాని నరేంద్ర మోదీ పాల్గొన్నారు. ఈ సందర్భంగా ఆయన సేవా సంకల్ప జ్యోతిని ప్రజ్వలన చేశారు. దేశంలోని అన్ని రాష్ట్రాల నుంచి వచ్చిన సేవా సంకల్ప యాత్రికులు కార్యక్రమానికి హాజరయ్యారు.
రాజకీయాల్లో పాలసీ మేకర్‌గా మోదీ 25 ఏళ్ల ప్రస్థానాన్ని పూర్తి చేసుకున్న సందర్భంగా ఈ కార్యక్రమం ప్రత్యేక ప్రాధాన్యం సంతరించుకుంది. సరిగ్గా 25 ఏళ్ల క్రితం గుజరాత్ ముఖ్యమంత్రిగా ప్రమాణ స్వీకారం చేసిన విషయాన్ని ప్రధాని గుర్తుచేసుకున్నారు. అప్పటి నుంచి దేశ ప్రజల సేవలోనే తన ప్రయాణం కొనసాగుతోందని తెలిపారు.
25 ఏళ్ల పాటు నిరంతరంగా ప్రజా సేవ చేసే అవకాశం తనకు లభిస్తుందని నాడు తాను ఊహించలేదని మోదీ అన్నారు. ఇంత సుదీర్ఘమైన ప్రజా సేవా ప్రస్థానంలో ప్రజల ఆశీస్సులే తనకు ప్రధాన బలంగా నిలిచాయని పేర్కొన్నారు. ప్రజల నమ్మకం, ఆశీర్వాదంతోనే తాను ముందుకు సాగుతున్నానని చెప్పారు.
దేశ ప్రజల సేవలో గడిచిన ఈ పాతికేళ్లు తన జీవితంలో ఎంతో ప్రత్యేకమైనవని మోదీ పేర్కొన్నారు. ప్రజల ఆకాంక్షలకు అనుగుణంగా దేశాన్ని అభివృద్ధి పథంలో ముందుకు తీసుకెళ్లేందుకు నిరంతరం కృషి చేస్తానని స్పష్టం చేశారు. ప్రజల ఆశీస్సులు, పార్టీ శ్రేణుల మద్దతే తనకు బలమని ప్రధాని అన్నారు.
దేశ ప్రజలు తనపై ఉంచిన విశ్వాసాన్ని ఎన్నటికీ మరచిపోలేనని చెప్పారు. ప్రజా సేవ చేసేందుకు భగవంతుడు తనకు శక్తినిచ్చారని, ప్రజలు, దేవుడి ఆశీస్సులతో దేశానికి మరింత సేవ చేస్తానని తెలిపారు. తన రాజకీయ, ప్రజా జీవితంలో ఎదురైన ప్రతి ఘటన నుంచి కొత్త విషయాలు నేర్చుకున్నానని మోదీ అన్నారు.
ఎప్పటికప్పుడు కొత్త విషయాలు తెలుసుకోవాలనే తపన తనలో ఉంటుందని చెప్పారు. సవాళ్లే తనను మరింత బలంగా తీర్చిదిద్దాయని పేర్కొన్నారు. దేశం తనకు ఎంతో ఇచ్చిందని, అందుకే దేశమే తనకు ఎప్పుడూ ప్రథమ ప్రాధాన్యమని మోదీ స్పష్టం చేశారు.
