పాఠశాలలు, కళాశాలలకు ఈ వీకెండ్లో వరుసగా 3 రోజుల పాటు సెలవులు రానున్నాయి. రేపు రెండో శనివారం, ఎల్లుండి ఆదివారం కాగా.. సోమవారం రోజున బోనాల పండుగ సందర్భంగా విద్యాసంస్థలకు ప్రభుత్వం సెలవును ప్రకటించనుంది. దీంతో ఈసారి లాంగ్ వీకెండ్ వచ్చేసింది. ఇక ఈ ఆగస్ట్ నెలలో ఆదివారాలు, పండుగలతో కలిపి మొత్తం 11 రోజుల పాటు విద్యాసంస్థలకు సెలవులు రానున్నాయి.
నిత్యం ఉరుకులు పరుగులతో.. చదువులు, హోమ్వర్క్, పరీక్షలతో సతమతమవుతున్న విద్యార్థులకు ఒక బిగ్ బ్రేక్ లభించింది. స్కూళ్లు, కాలేజీలకు 3 రోజులు వరుసల సెలవులు రానున్నాయి. ఆషాఢ మాసం సందర్భంగా హైదరాబాద్ నగరవ్యాప్తంగా గత 3 వారాలుగా అంగరంగ వైభవంగా ఆదివారం రోజున బోనాల పండగ జరుగుతున్న సంగతి తెలిసిందే. ఈ నేపథ్యంలోనే ఈ ఆదివారం నాడు.. హైదరాబాద్ నగరంలో చివరిగా బోనాలు జరగనున్నాయి. బోనాలతోపాటు ఘటాలు, బండ్ల ఊరేగింపు నిర్వహించనున్నారు. దీంతోపాటు ముందు రోజు రెండో శనివారం కాగా.. ఆ తర్వాత సోమవారం రోజున ప్రభుత్వ సెలవు దినంగా ప్రకటించడంతో వరుసగా 3 రోజుల పాటు స్కూళ్లు, కాలేజీలు మూసివేయనున్నారు.
ఆగస్ట్ 8, 9, 10వ తేదీల్లో హైదరాబాద్లో విద్యాసంస్థలు మూతపడనున్నాయి. క్యాలెండర్ ప్రకారం ఆగస్ట్ 8వ తేదీన నెలలోని రెండో శనివారం కావడంతో ప్రభుత్వ, ప్రైవేటు విద్యాసంస్థలకు సాధారణంగానే సెలవు ఉంటుంది. ఆ తర్వాతి రోజైన ఆగస్ట్ 9వ తేదీన ఆదివారం కావడంతో యథావిధిగా బడులు మూసి ఉంటాయి. ఇక ఆగస్ట్ 10వ తేదీన సోమవారం నాడు తెలంగాణ సంస్కృతి, సంప్రదాయాలకు ప్రతీకగా నిలిచే సికింద్రాబాద్, హైదరాబాద్ నగర బోనాల ముగింపు ఉత్సవాలు అంగరంగ వైభవంగా జరగనున్నాయి.
ప్రసిద్ధ ఘటాల ఊరేగింపులతోపాటు.. పొతురాజుల నృత్యాలు, భవిష్యవాణి వినిపించే రంగం వంటి ఆధ్యాత్మిక కార్యక్రమాలు అదే రోజున జరగనున్నాయి. బోనాల పండుగ ప్రాముఖ్యత దృష్ట్యా ప్రభుత్వం క్యాలెండర్లో సాధారణ సెలవుగా సోమవారాన్ని కేటాయించింది. ఈ 3 రోజుల సుదీర్ఘ విరామం మాత్రమే కాకుండా.. ఈ ఆగస్ట్ నెల మొత్తం విద్యార్థులకు భారీ శుభవార్తలో ఉన్నాయి. ఈ నెల మొత్తంలో విద్యార్థులకు ఏకంగా 11 రోజుల పాటు సెలవులు లభించనున్నాయి.
