న్యూఢిల్లీ, డ్రైవింగ్‌ లైసెన్స్‌ నిబంధనలను మరింత కఠినతరం చేసేందుకు కేంద్ర రహదారులు, రవాణా మంత్రిత్వశాఖ పలు మార్పులను ప్రతిపాదించింది. సురక్షిత డ్రైవింగ్‌ శిక్షణ మదింపులో ప్రస్తుతం ఉన్న 60 శాతం ఉత్తీర్ణత మార్కులను 75 శాతానికి పెంచాలని సూచించింది. అలాగే ఆధార్‌ ధృవీకరణ ద్వారా పూర్తిచేసే కొన్ని ఆన్‌లైన్‌ డ్రైవింగ్‌ లైసెన్స్‌ సేవలకు ఫీజు మినహాయింపు కల్పించే ప్రతిపాదనను కూడా ముసాయిదాలో చేర్చింది.
30 నిమిషాల శిక్షణ తప్పనిసరి
కేంద్ర మోటారు వాహనాల నిబంధనలకు ప్రతిపాదించిన సవరణల ప్రకారం.. సురక్షిత డ్రైవింగ్‌కు సంబంధించిన శిక్షణ కనీసం 30 నిమిషాలపాటు ఉండాలి. డ్రైవింగ్‌ నైపుణ్యాలు, రహదారి భద్రతపై అవగాహన పెంచడంతో పాటు లైసెన్స్‌ పొందే అభ్యర్థుల సామర్థ్యాన్ని మెరుగ్గా అంచనా వేయడం ఈ ప్రతిపాదనల లక్ష్యంగా పేర్కొన్నారు.
దరఖాస్తులపై 15 రోజుల్లో నిర్ణయం
డ్రైవింగ్‌ లైసెన్స్‌లో పేరు, చిరునామా వంటి వివరాల మార్పు కోసం దరఖాస్తు చేసుకుంటే.. లైసెన్సింగ్‌ అధికారులు 15 రోజుల్లోగా ఆమోదించాలి లేదా తిరస్కరించాలి. దరఖాస్తును తిరస్కరిస్తే అందుకు గల కారణాలను కూడా తెలియజేయాలని ముసాయిదాలో ప్రతిపాదించారు.
అలాగే దరఖాస్తుదారుల వ్యక్తిగత వివరాల్లో మార్పుల కోసం ప్రస్తుతం విధించే కొన్ని రుసుములను తొలగించే అంశాన్ని పరిశీలిస్తున్నారు. గుర్తింపు, వయస్సు, నివాస ధృవీకరణ కోసం సమర్పించాల్సిన పత్రాలకు సంబంధించిన నిబంధనలను కూడా ముసాయిదాలో నిర్దేశించారు.
గమనిక: ఇవి ముసాయిదాలో ప్రతిపాదించిన మార్పులు మాత్రమే. తుది నిబంధనలు అధికారికంగా ప్రకటించిన తర్వాతే అమల్లోకి వస్తాయి.