నివిన్ పౌలీకి ఆ జోనర్ భలే కలిసొచ్చింది.. వరుస హిట్స్ వెనుక అదే సీక్రెట్!

మాలీవుడ్ స్టార్ హీరో నివిన్ పౌలీకి లవ్ స్టోరీస్‌లో ప్రత్యేకమైన క్రేజ్ ఉంది. ముఖ్యంగా ఏజ్ గ్యాప్ నేపథ్యంలో తెరకెక్కిన సినిమాలు ఆయన కెరీర్‌కు బాగా కలిసొచ్చాయి. ఈ జోనర్‌లో నివిన్ నటించిన పలు చిత్రాలు బాక్సాఫీస్ వద్ద ఘన విజయాలు సాధించడంతో ఆయనకు ప్రత్యేకమైన ఇమేజ్ ఏర్పడింది.

‘ఓం శాంతి ఓశానా’తో మొదలు

2014లో వచ్చిన ‘ఓం శాంతి ఓశానా’తో నివిన్ పౌలీ ఏజ్ గ్యాప్ లవ్ స్టోరీలకు మంచి గుర్తింపు వచ్చింది. ఈ సినిమాలో నజ్రియా నజీమ్ స్కూల్ డేస్ నుంచే నివిన్ పౌలీ పాత్రను ఇష్టపడే అమ్మాయిగా కనిపించింది. విభిన్నమైన ప్రేమకథగా తెరకెక్కిన ఈ మూవీ అప్పట్లో ప్రేక్షకులను బాగా ఆకట్టుకుని బ్లాక్‌బస్టర్‌గా నిలిచింది.

‘ప్రేమమ్’తో మారిపోయిన కెరీర్

ఆ తర్వాత 2015లో వచ్చిన ‘ప్రేమమ్’ నివిన్ పౌలీ కెరీర్‌ను పూర్తిగా మార్చేసింది. ఈ సినిమా ఆయనను ఒక్కసారిగా స్టార్ హీరోగా నిలబెట్టింది. ఇందులో వివిధ దశల్లో ప్రేమకథలను చూపించారు. చివరకు చిన్నప్పటి నుంచి తనను ఇష్టపడుతున్న మడోన్నా సెబాస్టియన్ పాత్రతో హీరో ప్రేమకథ సుఖాంతమవుతుంది.

‘ప్రేమమ్’ మలయాళంలో సృష్టించిన సంచలనం గురించి ప్రత్యేకంగా చెప్పాల్సిన అవసరం లేదు. ఈ సినిమాను తెలుగులో నాగచైతన్య హీరోగా అదే పేరుతో రీమేక్ చేయగా.. ఇక్కడ కూడా మంచి విజయాన్ని అందుకుంది.

‘సర్వం మాయ’తో మరోసారి సక్సెస్

గతేడాది డిసెంబర్‌లో విడుదలైన ‘సర్వం మాయ’ కూడా రొమాంటిక్ కామెడీ జోనర్‌లోనే తెరకెక్కింది. అయితే ఈ కథలో ఫాంటసీ టచ్‌ను జోడించారు. హీరో ఓ దెయ్యంతో స్నేహం చేయడం ఈ సినిమాలో ప్రత్యేక ఆకర్షణగా నిలిచింది. ‘ప్రేమమ్’ తర్వాత నివిన్‌కు అదే స్థాయిలో మంచి విజయాన్ని అందించిన సినిమాగా ఇది నిలిచింది.

‘బెత్లహెం కుటుంబ యూనిట్’తో బిగ్ రికార్డ్

మమితా బైజు హీరోయిన్‌గా నటించిన ‘బెత్లహెం కుటుంబ యూనిట్’ నివిన్ పౌలీ కెరీర్‌లో మరో భారీ విజయాన్ని అందించింది. ఈ సినిమా మాలీవుడ్ బాక్సాఫీస్‌ను షేక్ చేస్తూ ఆల్‌టైమ్ హయ్యెస్ట్ గ్రాసర్ చిత్రాల జాబితాలో నిలిచింది. దీంతో వరుస విజయాలతో నివిన్ పౌలీ క్రేజ్ మరింత పెరిగింది.

ఒక్క సినిమాతో ఊహించని షాక్

అయితే ఈ విజయాల జోరును తమిళ చిత్రం ‘ఏళు కడల్ ఏళు మలై’ మాత్రం అడ్డుకుంది. సుమారు రూ.15 కోట్ల బడ్జెట్‌తో తెరకెక్కిన ఈ సినిమా బాక్సాఫీస్ వద్ద కనీసం రూ.2 కోట్ల వసూళ్లను కూడా అందుకోలేకపోయినట్లు ట్రేడ్ వర్గాల్లో ప్రచారం జరిగింది.

మొత్తంగా చూస్తే.. లవ్ స్టోరీలు, ముఖ్యంగా ఏజ్ గ్యాప్ కాన్సెప్ట్‌తో వచ్చిన సినిమాలు నివిన్ పౌలీకి కెరీర్‌లో మంచి విజయాలను అందించాయి. అయితే అన్ని సినిమాలు ఒకే ఫలితాన్ని ఇవ్వవని ‘ఏళు కడల్ ఏళు మలై’ మరోసారి నిరూపించింది.