తెలంగాణలో ఎస్ఐఆర్ ప్రక్రియ కీలక దశకు చేరుకుంది. యువ ఓటర్లు, కొత్తగా ఓటు హక్కు పొందిన అర్హులు, విదేశాల్లో నివసిస్తున్న భారతీయుల నుంచి పెద్ద సంఖ్యలో దరఖాస్తులు అందాయి. చిరునామా మార్పులు, పేర్లు, ఇతర వివరాల సవరణల కోసం కూడా భారీగా అభ్యర్థనలు నమోదయ్యాయి. ఓటర్ల జాబితా నుంచి పేర్ల తొలగింపుపై వచ్చిన అభ్యంతరాలను ఎన్నికల అధికారులు క్షుణ్ణంగా పరిశీలిస్తున్నారు. ముఖ్యంగా హైదరాబాద్‌ జిల్లా నుంచి కొత్త ఓటు నమోదు కోసం గణనీయమైన సంఖ్యలో దరఖాస్తులు రావడం ప్రాధాన్యత సంతరించుకుంది. ఈ ప్రక్రియ పూర్తయిన అనంతరం నవంబర్ 9న తుది ఓటర్ల జాబితాను విడుదల చేయనున్నారు.
- తెలంగాణలో ఓటర్ల జాబితా ప్రత్యేక సమగ్ర సవరణ (ఎస్ఐఆర్) ప్రక్రియ కీలక దశకు చేరుకుంది. రాష్ట్రవ్యాప్తంగా కొత్త ఓటు నమోదు కోసం 4,88,417 ఫామ్‌-6 దరఖాస్తులు అందినట్లు ఎన్నికల అధికారులు వెల్లడించారు. విదేశాల్లో నివసిస్తున్న భారతీయుల నుంచి 6,270 ఫామ్‌-6A దరఖాస్తులు వచ్చాయి. ఓటర్ల పేర్లు, చిరునామాలు, ఇతర వివరాల్లో మార్పుల కోసం 5,04,782 ఫామ్‌-8 దరఖాస్తులు నమోదయ్యాయి. మరోవైపు, ఓటర్ల జాబితాలో పేర్ల తొలగింపునకు సంబంధించి ఫామ్‌-7 ద్వారా వేల సంఖ్యలో అభ్యంతరాలు, అభ్యర్థనలు అందాయి.ఇప్పటికే ఉన్న ఓటరు పేరును తొలగించాలని కోరే వారు లేదా అందుకు అభ్యంతరం తెలిపేవారు ఫామ్‌-7 ద్వారా దరఖాస్తు చేసుకోవచ్చు. ఎస్ఐఆర్ ప్రక్రియలో భాగంగా క్లెయిమ్‌లు, అభ్యంతరాల దాఖలుకు అక్టోబర్‌ 7తో గడువు ముగిసింది. అందిన దరఖాస్తులు, అభ్యంతరాలను ఎన్నికల అధికారులు పరిశీలించి నవంబర్ 5లోగా పరిష్కరించనున్నారు. అనంతరం నవంబర్ 9న తుది ఓటర్ల జాబితాను ప్రచురించనున్నారు. ఈ మేరకు ఎన్నికల సంఘం సవరణ ప్రక్రియకు సంబంధించిన షెడ్యూల్‌ను ముందుగానే ప్రకటించింది.
తెలంగాణలో ఓటర్ల ప్రత్యేక సమగ్ర సవరణ (SIR) ప్రక్రియలో భాగంగా కొత్త ఓటరు నమోదు, వివరాల మార్పుల కోసం పెద్ద సంఖ్యలో దరఖాస్తులు అందుతున్నాయి. జిల్లాల వారీగా పరిశీలిస్తే హైదరాబాద్‌ జిల్లా నుంచి అత్యధికంగా కొత్త ఓటరు నమోదు దరఖాస్తులు వచ్చినట్లు ఎన్నికల కార్యాలయం వెల్లడించింది. హైదరాబాద్‌ పరిధిలోని 15 నియోజకవర్గాల నుంచి మొత్తం 1,93,135 ఫామ్‌-6 దరఖాస్తులు అందగా, వాటిలో 29,226 దరఖాస్తులకు ఇప్పటికే ఆమోదం లభించింది. అదేవిధంగా, హైదరాబాద్‌ జిల్లా నుంచి 4,127 మంది ప్రవాస భారతీయులు (ఎన్‌ఆర్‌ఐలు) ఓటరుగా నమోదు చేసుకునేందుకు దరఖాస్తు చేసుకున్నారు. ఓటరు జాబితాలో చిరునామా, ఇతర వ్యక్తిగత వివరాల సవరణ కోసం 1,44,495 ఫామ్‌-8 దరఖాస్తులు సమర్పించారు.
ఫామ్‌-7 దరఖాస్తులపై వివాదం
ఓటర్ల పేర్ల తొలగింపునకు సంబంధించిన ఫామ్‌-7 దరఖాస్తుల వ్యవహారం హైదరాబాద్‌లో రాజకీయంగా చర్చనీయాంశమైంది. ముఖ్యంగా, పెద్ద సంఖ్యలో ముందుగానే వివరాలు నింపిన ఫామ్‌-7లను ఒకేసారి సమర్పించిన ఘటనపై వివాదం నెలకొంది. ఈ నేపథ్యంలో ఎన్నికల అధికారులు సంబంధిత దరఖాస్తులను క్షుణ్ణంగా పరిశీలిస్తున్నారు. నిబంధనలకు అనుగుణంగా లేని దరఖాస్తులను గుర్తించి, ఎన్నికల నిబంధనల ప్రకారం తగిన చర్యలు తీసుకుంటున్నట్లు అధికారులు స్పష్టం చేశారు.
తుది ఓటర్ల జాబితాపై ఉత్కంఠ
తెలంగాణలో ఎస్ఐఆర్ ప్రక్రియ పూర్తయిన అనంతరం తుది ఓటర్ల జాబితాలో ఓటర్ల సంఖ్యలో గణనీయమైన మార్పులు చోటుచేసుకునే అవకాశం ఉందని నివేదికలు సూచిస్తున్నాయి. రాష్ట్రవ్యాప్తంగా ఓటర్ల వివరాలను పరిశీలించి, అర్హులైన వారి పేర్లను తుది జాబితాలో చేర్చేందుకు ఎన్నికల అధికారులు చర్యలు కొనసాగిస్తున్నారు. నవంబర్ 9న విడుదల కానున్న తుది ఓటర్ల జాబితాతో రాష్ట్రంలోని మొత్తం ఓటర్ల సంఖ్యపై స్పష్టత వచ్చే అవకాశం ఉంది.
కొత్తగా ఓటు నమోదు కోసం దరఖాస్తు చేసుకున్నవారు, ఇప్పటికే నమోదైన వివరాల్లో మార్పులు కోరినవారు తుది జాబితా ప్రచురణ అనంతరం తమ పేర్లు, చిరునామా, ఇతర వివరాలను తప్పనిసరిగా సరిచూసుకోవాలని ఎన్నికల అధికారులు సూచిస్తున్నారు. జాబితాలో ఏవైనా తప్పులు లేదా వివరాల లోపాలు ఉన్నాయో లేదో పరిశీలించుకోవడం ద్వారా ఓటు హక్కును వినియోగించుకునే విషయంలో ఇబ్బందులు తలెత్తకుండా జాగ్రత్త పడవచ్చని పేర్కొంటున్నారు.