మెదక్ జిల్లా తెల్లాపూర్‌లో 92.39 ఎకరాల భూమి సేకరణకు సంబంధించి 2006లో జారీ చేసిన నోటిఫికేషన్‌, 2007లో వెలువరించిన డిక్లరేషన్‌ను తెలంగాణ హైకోర్టు రద్దు చేసింది. టౌన్‌షిప్‌ ఏర్పాటు, భవిష్యత్‌ ప్రాజెక్టుల అభివృద్ధి వంటి సాధారణ కారణాలను ప్రస్తావించినప్పటికీ, భూసేకరణ వెనుక ఉన్న నిర్దిష్ట ఉద్దేశాన్ని ప్రభుత్వం స్పష్టంగా వెల్లడించలేదని న్యాయస్థానం వ్యాఖ్యానించింది.
భూసేకరణ చట్టంలోని సెక్షన్‌ 5ఎ ప్రకారం భూయజమానులు వ్యక్తం చేసిన అభ్యంతరాలను సమగ్రంగా పరిశీలించడంలో అధికారులు విఫలమయ్యారని పేర్కొంది. ఒకే విధమైన పరిస్థితుల్లో ఉన్న భూయజమానుల విషయంలో వేర్వేరు నిర్ణయాలు తీసుకోవడం సమంజసం కాదని స్పష్టం చేసింది. అయితే, చట్టంలోని నిబంధనలను పూర్తిగా అనుసరిస్తూ ప్రభుత్వం అవసరమైతే తిరిగి భూసేకరణ ప్రక్రియను చేపట్టవచ్చని హైకోర్టు తన తీర్పులో వెల్లడించింది.
భూసేకరణకు గల నిర్దిష్ట కారణాలను స్పష్టంగా వెల్లడించకుండా, టౌన్‌షిప్‌ ఏర్పాటు, భవిష్యత్‌ ప్రాజెక్టుల అభివృద్ధి పేరుతో జారీ చేసిన నోటిఫికేషన్‌ చెల్లదని తెలంగాణ హైకోర్టు స్పష్టం చేసింది. మెదక్ జిల్లా రామచంద్రాపురం మండలం తెల్లాపూర్‌లో ప్రతిపాదిత టౌన్‌షిప్‌ కోసం 2006లో జారీ చేసిన భూసేకరణ నోటిఫికేషన్‌తో పాటు, 2007లో విడుదల చేసిన డిక్లరేషన్‌ను న్యాయస్థానం రద్దు చేసింది. భూసేకరణ ప్రక్రియలో చట్టపరమైన నిబంధనలను తప్పనిసరిగా పాటించాలని పేర్కొన్న హైకోర్టు, భూములను సేకరించాల్సిన అవసరానికి స్పష్టమైన, నిర్దిష్టమైన కారణాలు ఉండాలని తేల్చిచెప్పింది.
తెల్లాపూర్‌ పరిధిలోని సర్వే నంబర్లు 333, 334, 335, 341, 342, 343, 363, 364, 368లలో మొత్తం 92.39 ఎకరాల భూమిని సేకరించేందుకు అప్పటి హైదరాబాద్‌ అర్బన్‌ డెవలప్‌మెంట్‌ అథారిటీ (హుడా) 2006 ఫిబ్రవరిలో నోటిఫికేషన్‌ జారీ చేసింది. ఈ భూసేకరణ నిర్ణయాన్ని వ్యతిరేకిస్తూ తెల్లాపూర్‌ జి-బ్లాక్‌ ప్లాట్‌ ఓనర్స్‌ అసోసియేషన్‌తో పాటు పలువురు భూయజమానులు హైకోర్టులో ఆరు పిటిషన్లు దాఖలు చేశారు. ఈ పిటిషన్లపై విచారణ చేపట్టిన జస్టిస్‌ వాకిటి రామకృష్ణారెడ్డి ఇటీవల తీర్పు వెలువరించారు.
సంబంధిత భూముల్లో ఇండస్ట్రియల్‌ ఎంప్లాయీస్‌ కోఆపరేటివ్‌ హౌస్‌ బిల్డింగ్‌ సొసైటీకి చెందిన కొంత భూమి అసైన్డ్‌ భూమి కావడంతో ప్రభుత్వం దానిని స్వాధీనం చేసుకుంది. మరోవైపు, జి-బ్లాక్‌లోని మిగిలిన భూములు పట్టా భూములు కావడంతో వాటిని కొనుగోలు చేసి 594 ప్లాట్లుగా విభజించారు. అయితే, ఈ ప్లాట్లకు సంబంధించిన భూసేకరణ ప్రక్రియను సవాలు చేస్తూ యజమానులు హైకోర్టును ఆశ్రయించారు. తమ భూముల సేకరణ చట్టబద్ధతను ప్రశ్నిస్తూ న్యాయపోరాటం చేపట్టారు.
భూసేకరణ నోటిఫికేషన్‌లో భూములను సేకరించేందుకు పేర్కొన్న ఉద్దేశం స్పష్టంగా లేదని తెలంగాణ హైకోర్టు అభిప్రాయపడింది. టౌన్‌షిప్‌ ఏర్పాటు, భవిష్యత్‌ ప్రాజెక్టుల అభివృద్ధి వంటి సాధారణ కారణాలతో భూసేకరణను సమర్థించలేమని స్పష్టం చేసింది. భూసేకరణ చట్టంలోని సెక్షన్‌ 5ఎ ప్రకారం భూయజమానులకు అభ్యంతరాలు తెలిపే అవకాశం కల్పించడమే కాకుండా, వాటిని క్షుణ్ణంగా పరిశీలించి, తగిన కారణాలతో నిర్ణయం తీసుకోవాల్సిన బాధ్యత అధికారులపై ఉంటుందని పేర్కొంది.
అయితే, ఈ కేసులో అభ్యంతరాల విచారణ నామమాత్రంగానే సాగిందని న్యాయస్థానం వ్యాఖ్యానించింది. భూములకు సంబంధించిన పూర్వాపరాలను సమగ్రంగా పరిశీలించకుండా, సరైన కారణాలు వెల్లడించకుండానే పిటిషనర్ల అభ్యంతరాలను తిరస్కరించడం చట్టబద్ధమైన విధానం కాదని న్యాయమూర్తి స్పష్టం చేశారు. భూయజమానుల అభ్యంతరాలను స్వీకరించి, వాటిని పరిష్కరించినట్లు రికార్డుల్లో నమోదు చేయడం మాత్రమే సరిపోదని పేర్కొన్నారు. అవసరమైతే తదుపరి విచారణ చేపట్టి, ప్రతి అభ్యంతరంపై సముచితమైన కారణాలతో నిర్ణయం తీసుకోవాలని అధికారులకు స్పష్టం చేశారు.