హైదరాబాద్‌ ఔటర్‌ రింగ్‌రోడ్డుపై పెరుగుతున్న రోడ్డు ప్రమాదాలను నివారించేందుకు గరిష్ఠ వేగ పరిమితిని గంటకు 120 కిలోమీటర్ల నుంచి 100 కిలోమీటర్లకు తగ్గించాలని పోలీసు, రవాణాశాఖ అధికారులు ప్రతిపాదించారు. 2023 జులైలో వేగ పరిమితిని పెంచినప్పటి నుంచి ప్రమాదాల సంఖ్య పెరిగినట్లు గణాంకాలు వెల్లడిస్తున్నాయి. మరోవైపు, నిబంధనలకు విరుద్ధంగా ద్విచక్రవాహనాల రాకపోకలు, జిగ్‌జాగ్‌ డ్రైవింగ్‌, వాహనాలను ఆకస్మికంగా నిలిపివేయడం వంటి ఉల్లంఘనలు ప్రమాదాలకు కారణమవుతున్నాయని అధికారులు ఆందోళన వ్యక్తం చేస్తున్నారు. ప్రస్తుతం ఓఆర్‌ఆర్‌పై కేవలం 7–8 పెట్రోలింగ్‌ వాహనాలు మాత్రమే అందుబాటులో ఉండగా, సమర్థవంతమైన పర్యవేక్షణకు కనీసం 30 వాహనాలు అవసరమని అంచనా వేస్తున్నారు. వేగ పరిమితి తగ్గింపు ప్రతిపాదనపై ప్రభుత్వం తుది నిర్ణయం తీసుకోవాల్సి ఉంది.
హైదరాబాద్‌ ఔటర్‌ రింగ్‌రోడ్డుపై (ఓఆర్‌ఆర్‌) వరుసగా చోటుచేసుకుంటున్న రోడ్డు ప్రమాదాల నేపథ్యంలో గరిష్ఠ వేగ పరిమితిని తగ్గించే ప్రతిపాదన తెరపైకి వచ్చింది. ప్రస్తుతం గంటకు 120 కిలోమీటర్లుగా ఉన్న వేగ పరిమితిని 100 కిలోమీటర్లకు తగ్గించాలని హైదరాబాద్‌ పోలీసు, రవాణాశాఖ అధికారులు సూచించారు. అతివేగం, ట్రాఫిక్‌ నిబంధనల ఉల్లంఘనలే ప్రమాదాలకు ప్రధాన కారణాలుగా భావిస్తూ ఈ నిర్ణయం దిశగా అడుగులు వేస్తున్నారు. ఈ మేరకు హైదరాబాద్‌ పోలీసు కమిషనర్‌ వీసీ సజ్జనర్‌.. రవాణాశాఖ కమిషనర్‌ ఇలంబర్తికి లేఖ రాశారు. దీనిపై స్పందించిన ఇలంబర్తి అక్టోబరు 9న హైదరాబాద్‌ గ్రోత్‌ కారిడార్‌ లిమిటెడ్‌కు లేఖ పంపారు. అయితే, ఓఆర్‌ఆర్‌పై వేగ పరిమితిని తగ్గించే అంశంపై ఇంకా తుది నిర్ణయం తీసుకోవాల్సి ఉంది.
ఓఆర్‌ఆర్‌పై 2023 జులై 27 వరకు గరిష్ఠ వేగ పరిమితి గంటకు 100 కిలోమీటర్లుగా ఉండేది. అయితే, జులై 28 నుంచి తొలి రెండు లేన్లలో గరిష్ఠ వేగాన్ని 120 కిలోమీటర్లకు పెంచారు. కనిష్ఠ వేగ పరిమితిని గంటకు 80 కిలోమీటర్లుగా నిర్ణయించారు. శాస్త్రీయ అధ్యయనం చేపట్టకుండానే వేగ పరిమితిని పెంచినట్లు పోలీసు, రవాణాశాఖ అధికారులు తమ లేఖల్లో పేర్కొన్నట్లు సమాచారం. ఈ మార్పు తర్వాత రోడ్డు ప్రమాదాలు పెరిగిన నేపథ్యంలో వేగ పరిమితిని మరోసారి సమీక్షించాల్సిన అవసరం ఉందని వారు అభిప్రాయపడ్డారు. ఈ అంశంపై సెప్టెంబరు 18న సచివాలయంలోనూ విస్తృతంగా చర్చించినట్లు తెలిసింది.
మరోవైపు, ఓఆర్‌ఆర్‌పై నిర్వహించిన సంయుక్త తనిఖీల్లో పలు ట్రాఫిక్‌ ఉల్లంఘనలు వెలుగులోకి వచ్చినట్లు హైదరాబాద్‌ పోలీసు కమిషనర్‌ తన లేఖలో ప్రస్తావించారు. నిషేధిత మార్గాల్లో ద్విచక్రవాహనాల రాకపోకలు, ఇతర వాహనాలను అధిగమించే క్రమంలో జిగ్‌జాగ్‌ డ్రైవింగ్‌, నెమ్మదిగా వెళ్లే వాటర్‌ ట్యాంకర్ల ద్వారా డివైడర్‌పై ఉన్న మొక్కలకు నీరు పోయడం, వాహనాలను అకస్మాత్తుగా నిలిపివేయడం వంటి చర్యలు ప్రమాదాలకు దారితీసే ప్రమాదముందని పేర్కొన్నారు. ఈ నేపథ్యంలో గరిష్ఠ వేగ పరిమితిని తగ్గించడంతో పాటు ట్రాఫిక్‌ నిబంధనల అమలును మరింత కట్టుదిట్టం చేయాలని అధికారులు సూచించారు.
మరోవైపు, ఓఆర్‌ఆర్‌పై రోడ్డు ప్రమాదాలను నియంత్రించేందుకు పెట్రోలింగ్‌ వ్యవస్థను మరింత బలోపేతం చేయాలని అధికారులు భావిస్తున్నారు. గతంలో 19 పెట్రోలింగ్‌ వాహనాలు అందుబాటులో ఉండగా, ప్రస్తుతం వాటి సంఖ్య 7–8కు తగ్గినట్లు ప్రమాదాల నివారణ కమిటీ అధికారులు గుర్తించారు. రహదారిపై నిరంతర పర్యవేక్షణకు కనీసం 30 పెట్రోలింగ్‌ వాహనాలు అవసరమని అంచనా వేస్తున్నారు. ప్రమాదాలు జరిగిన వెంటనే స్పందించడంతో పాటు ట్రాఫిక్‌ నిబంధనలను ఉల్లంఘించే వాహనాలను గుర్తించడంలో పెట్రోలింగ్‌ కీలక పాత్ర పోషించనుంది.
ఓఆర్‌ఆర్‌పై నమోదవుతున్న ప్రమాదాల గణాంకాలు సైతం వేగ పరిమితి తగ్గింపు అంశానికి ప్రాధాన్యం పెంచుతున్నాయి. 2016లో 1,545, 2017లో 1,562 ప్రమాదాలు నమోదయ్యాయి. ఆ తర్వాత గరిష్ఠ వేగ పరిమితిని గంటకు 100 కిలోమీటర్లకు తగ్గించడంతో 2018లో 618, 2019లో 782, 2020లో 641, 2021లో 840, 2022లో 1,029 ప్రమాదాలు నమోదయ్యాయి. అయితే, 2023లో వేగ పరిమితిని మళ్లీ గంటకు 120 కిలోమీటర్లకు పెంచిన ఏడాది 1,402 ప్రమాదాలు చోటుచేసుకోగా, 2024లో ఈ సంఖ్య 1,592కు చేరింది. ఈ పరిణామాల నేపథ్యంలో వేగ పరిమితిని పునఃసమీక్షించడంతో పాటు పెట్రోలింగ్‌ వాహనాల సంఖ్యను పెంచడం, ట్రాఫిక్‌ నిబంధనలను కఠినంగా అమలు చేయడం ద్వారా ప్రమాదాలను తగ్గించాలని అధికారులు యోచిస్తున్నారు.