కృత్రిమ మేధస్సు (ఏఐ) సాయంతో శాస్త్రవేత్తలు కొత్త వైరస్‌లను రూపొందించారు. వీటిలో 16 వైరస్‌లు బ్యాక్టీరియాను పూర్తిగా నాశనం చేయగల క్రియాశీలక వైరస్‌లుగా మారాయి. కాలిఫోర్నియాలోని స్టాన్‌ఫోర్డ్‌ విశ్వవిద్యాలయం, ఆర్క్‌ ఇన్‌స్టిట్యూట్‌కు చెందిన పరిశోధకుల బృందం చేపట్టిన ఈ అధ్యయనం సైన్స్‌ జర్నల్‌లో ప్రచురితమైంది.
యాంటీబయాటిక్స్‌కు లొంగని ‘సూపర్‌బగ్స్‌’పై పోరాటంలో ఏఐ కొత్త ఆయుధంగా ఉపయోగపడే అవకాశం ఉందని ఈ పరిశోధన సూచిస్తోంది. అయితే ఇదే సమయంలో మరో ఆందోళనకర అంశాన్ని కూడా ఈ అధ్యయనం వెలుగులోకి తెచ్చింది. డీఎన్‌ఏ డేటాపై శిక్షణ పొందిన ఏఐ సాఫ్ట్‌వేర్‌.. మొదటి నుంచి పనిచేసే వైరస్‌ రూపకల్పనకు అవసరమైన జన్యు సమాచారాన్ని రూపొందించగలదని పరిశోధకులు నిరూపించారు.
ఏఐ డీఎన్‌ఏను ఎలా రూపొందిస్తుంది?
ఈ పరిశోధనలో ఉపయోగించిన ఈవో-1, ఈవో-2 మోడళ్లు చాట్‌జీపీటీ తరహాలో పనిచేస్తాయి. చాట్‌జీపీటీ ఒక వాక్యంలో తర్వాత వచ్చే పదాన్ని అంచనా వేస్తే.. ఈవో మోడళ్లు డీఎన్‌ఏ క్రమంలో తర్వాత వచ్చే రసాయన అక్షరాన్ని అంచనా వేస్తాయి.
నియంత్రణలు సరిపోతాయా?
కొత్త అమెరికా ఆరోగ్య విధానాల ప్రకారం జీవ కారకాలను మరింత ప్రమాదకరంగా మార్చే కొన్ని చర్యలపై ఆంక్షలు ఉన్నాయి. అయితే కంప్యూటర్‌లో జన్యు క్రమాలను రూపొందించడం వంటి ప్రక్రియలకు అవే నిబంధనలు నేరుగా వర్తిస్తాయా అన్నది ప్రశ్నగా మారింది.
మరోవైపు ఈవో-2 ఓపెన్‌ సోర్స్‌ మోడల్‌ కావడంతో దాన్ని ఎవరైనా డౌన్‌లోడ్‌ చేసుకునే అవకాశం ఉండటం కూడా ఆందోళనకు కారణమవుతోంది.
అయితే ప్రస్తుతానికి తీవ్రంగా భయపడాల్సిన అవసరం లేదని కొందరు శాస్త్రవేత్తలు చెబుతున్నారు. లండన్‌లోని ఇంపీరియల్‌ కాలేజీకి చెందిన టామ్‌ ఎల్లిస్‌ ప్రకారం.. పరిశోధనలో ఉపయోగించిన వైరస్‌ జన్యువు తులనాత్మకంగా చిన్నది, సులభమైనది. ఈ వైరస్‌కు సుమారు 5,400 జన్యు అక్షరాల కోడ్‌ అవసరం కాగా, సాధారణ సజీవ కణానికి సుమారు 5 లక్షల జన్యు అక్షరాలు అవసరమవుతాయి. దీంతో మరింత సంక్లిష్టమైన జీవులను ఏఐ సాయంతో రూపొందించడం ప్రస్తుతం చాలా కష్టమైనప్పటికీ, పూర్తిగా అసాధ్యమని చెప్పలేమని ఆయన అభిప్రాయపడ్డారు.