నవరాత్రి బ్రహ్మోత్సవాల నిర్వహణకు తిరుమల క్షేత్రం సర్వాంగ సుందరంగా ముస్తాబైంది. ఈ నెల 12 నుంచి 20వ తేదీ వరకు శ్రీవారి నవరాత్రి బ్రహ్మోత్సవాలు వైభవంగా జరగనున్నాయి. ఉత్సవాల నేపథ్యంలో ఆలయ పరిసరాలను పుష్పాలు, విద్యుత్‌ దీపాలతో అలంకరించారు. భక్తులకు స్వామివారి వాహనసేవలను కనులారా వీక్షించేలా టీటీడీ ఏర్పాట్లు చేస్తోంది.
ఆదివారం రాత్రి అంకురార్పణ
చాంద్రమానం ప్రకారం మూడేళ్లకోసారి అధికమాసం వస్తుంది. ఇలాంటి సందర్భాల్లో భాద్రపద మాసంలో వార్షిక బ్రహ్మోత్సవాలు, ఆశ్వయుజ మాసంలోని దసరా నవరాత్రుల్లో నవరాత్రి బ్రహ్మోత్సవాలు నిర్వహించడం ఆనవాయితీ. ఇందులో భాగంగా ఆదివారం రాత్రి 7 నుంచి 8 గంటల మధ్య శాస్త్రోక్తంగా అంకురార్పణ కార్యక్రమాన్ని నిర్వహించనున్నారు.
నవరాత్రి బ్రహ్మోత్సవాల్లో ధ్వజారోహణం, ధ్వజావరోహణం ఉండవు. ఉత్సవాల్లో భాగంగా వివిధ వాహనాలపై శ్రీవారు భక్తులకు దర్శనమివ్వనున్నారు.
ముఖ్యమైన వాహనసేవల తేదీలు ఇవే
అక్టోబరు 16: గరుడ వాహనసేవ
అక్టోబరు 17: పుష్పక విమాన సేవ
అక్టోబరు 19: స్వర్ణ రథోత్సవం
అక్టోబరు 20: చక్రస్నాన వేడుక
వాహనసేవల సమయాలు
సాధారణంగా వాహనసేవలు ఉదయం 8 నుంచి 10 గంటల వరకు, రాత్రి 7 నుంచి 9 గంటల వరకు నిర్వహించనున్నారు. అయితే గరుడ వాహనసేవ ప్రత్యేకంగా సాయంత్రం 6.30 గంటల నుంచి రాత్రి 11.30 గంటల వరకు జరగనుంది.
నవరాత్రి బ్రహ్మోత్సవాలను పురస్కరించుకుని తిరుమలకు పెద్ద సంఖ్యలో భక్తులు తరలివచ్చే అవకాశం ఉండటంతో వారికి ఎలాంటి ఇబ్బందులు కలగకుండా అవసరమైన ఏర్పాట్లు చేస్తున్నారు.
