ప్రభుత్వ ఉద్యోగుల సామర్థ్యాన్ని పెంచితే ప్రజలకు మరింత మెరుగైన సేవలు అందించవచ్చని ఆంధ్రప్రదేశ్ ముఖ్యమంత్రి నారా చంద్రబాబు నాయుడు అన్నారు. వివిధ శాఖలు అందిస్తున్న పౌర సేవలపై సోమవారం రాష్ట్ర సచివాలయంలో సీఎం ఉన్నతస్థాయి సమీక్ష నిర్వహించారు.
ఈ సమావేశానికి రెవెన్యూ, ఐటీ, ఆర్థిక, మహిళా శిశు సంక్షేమం, స్కిల్ డెవలప్‌మెంట్, ఐ అండ్ ఐ, సెర్ప్ తదితర శాఖల ఉన్నతాధికారులు హాజరయ్యారు. పౌరులకు అందుతున్న సేవలు, వాటి నాణ్యతను మెరుగుపరిచేందుకు తీసుకోవాల్సిన చర్యలపై సీఎం అధికారులకు పలు సూచనలు చేశారు.
రాష్ట్రవ్యాప్తంగా క్షేత్రస్థాయిలో పనిచేస్తున్న సిబ్బంది, ఉద్యోగులతో త్వరలో టెలీకాన్ఫరెన్స్ నిర్వహించనున్నట్లు చంద్రబాబు తెలిపారు. కెపాసిటీ బిల్డింగ్‌పై ప్రత్యేక దృష్టి సారించి, ప్రజలకు మెరుగైన సేవలు అందించేలా అన్ని ప్రభుత్వ శాఖలు సన్నద్ధం కావాలని అధికారులను ఆదేశించారు.
ఉద్యోగులు తమ నైపుణ్యాలను పెంచుకునేందుకు కెపాసిటీ బిల్డింగ్ కమిషన్, మిషన్ కర్మయోగి పోర్టల్, ఉన్నతి ద్వారా అందుబాటులో ఉన్న ఆన్‌లైన్ కోర్సులను సద్వినియోగం చేసుకోవాలని సీఎం సూచించారు.
4200 ఆన్‌లైన్ కోర్సులను పూర్తి చేసిన ఓ ఎస్జీటీ ఉపాధ్యాయుడి ఉదాహరణను సీఎం ఈ సందర్భంగా ప్రస్తావించారు. నిరంతరం కొత్త విషయాలు నేర్చుకోవడం ద్వారా ఉద్యోగులు తమ సామర్థ్యాలను మరింత పెంచుకోవచ్చని అన్నారు.
ఆన్‌లైన్ కోర్సులతో పాటు ఆఫ్‌లైన్ శిక్షణకు కూడా ప్రాధాన్యత ఇవ్వాలని చంద్రబాబు సూచించారు. ఐఐఎంలు, ఐఐటీలు, యూనివర్సిటీల సహకారంతో ఉద్యోగులకు శిక్షణ కార్యక్రమాలు నిర్వహించి వారి నైపుణ్యాలను అభివృద్ధి చేయాలని అధికారులకు దిశానిర్దేశం చేశారు.
ప్రభుత్వ ఉద్యోగుల సామర్థ్యాభివృద్ధి ద్వారా పాలనలో మరింత వేగం, నాణ్యత తీసుకురావడంతో పాటు ప్రజలకు మెరుగైన పౌర సేవలు అందించడమే లక్ష్యంగా పనిచేయాలని సీఎం చంద్రబాబు స్పష్టం చేశారు.
