అందాల పోటీలు మనకు తెలుసు. కానీ ప్రపంచంలోనే అత్యంత వికారమైన కుక్కను ఎంపిక చేసే పోటీ గురించి విన్నారా? అమెరికాలో ఏటా నిర్వహించే ఈ ప్రత్యేక పోటీలో 2026 విజేతగా ఆరేళ్ల పగ్ జాతికి చెందిన జిన్నీ లూ నిలిచింది.
నాలుగో ప్రయత్నంలో విజయం
కాలిఫోర్నియాలోని శాంటా రోసాలో ఆగస్టు 14న జరిగిన ఈ పోటీలో జిన్నీ లూ విజేతగా నిలిచింది. ఈ ఏడాది పోటీ 50వ వార్షికోత్సవాన్ని జరుపుకోవడం మరో విశేషం. ఇప్పటికే మూడుసార్లు పాల్గొన్న జిన్నీ లూ.. 2025లో రెండో స్థానంలో నిలిచింది. నాలుగోసారి మాత్రం టైటిల్ను సొంతం చేసుకుంది.
పొడవుగా బయటకు కనిపించే నాలుక, పెద్ద కళ్లు, ముఖంపై ముడతలు జిన్నీ లూ ప్రత్యేకతలు. ఈ పోటీ కుక్కలను అవమానించేందుకు కాదని.. భిన్నంగా కనిపించే జంతువుల్లోనూ ప్రత్యేకమైన అందం, వ్యక్తిత్వం ఉంటాయని చాటిచెప్పడమే లక్ష్యమని నిర్వాహకులు చెబుతున్నారు.
దక్షిణ కొరియా నుంచి కాలిఫోర్నియా వరకు..
జిన్నీ లూ కథ కూడా ఆసక్తికరమే. దక్షిణ కొరియాలోని పర్వత ప్రాంతాల్లో తీవ్ర చలిలో ఓ చెక్క పెట్టెలో ఉన్న దానిని రక్షించారు. అనంతరం పగ్ రెస్క్యూ సంస్థల సహకారంతో కొత్త జీవితం లభించింది.
సుమారు నాలుగేళ్ల క్రితం మిషెల్ గ్రేడీ జిన్నీ లూను దత్తత తీసుకున్నారు. ప్రస్తుతం అది సాధారణ పెంపుడు కుక్కగా ఉండటంతో పాటు.. రక్షించబడిన జంతువులపై అవగాహన కల్పించే కార్యక్రమాల్లోనూ పాల్గొంటోంది.
ఈ విజయంతో మిషెల్ గ్రేడీకి 5,000 డాలర్ల బహుమతి లభించింది. రెండో స్థానంలో నిలిచిన పింకీకి 3,000 డాలర్లు, మూడో స్థానంలోని ఒట్టోకు 2,000 డాలర్లు అందాయి.
