హైదరాబాద్ శ్రీనగర్ కాలనీలో పీపుల్స్ స్టార్ ఆర్. నారాయణమూర్తి రోడ్డుపై ఒంటరిగా నడుచుకుంటూ వెళ్తుండగా.. మాజీ సీఎం కేసీఆర్ మనవడు హిమాన్షు తన కారును ఆపి ఆయనను ఎంతో గౌరవంతో పలకరించారు. నారాయణమూర్తి నిరాడంబరత తనకు స్ఫూర్తినిచ్చిందని హిమాన్షు పేర్కొన్నారు. కాగా, తాత, తండ్రి రాజకీయాల్లో అగ్రస్థానాల్లో ఉన్నప్పటికీ ఎటువంటి గర్వం లేకుండా ఒక గొప్ప వ్యక్తి కనిపించగానే కారు ఆపి గౌరవించడం పట్ల హిమాన్షుపై సోషల్ మీడియాలో సర్వత్రా ప్రశంసలు వ్యక్తమవుతున్నాయి. ఆయన పరిణితికి నెటిజన్లు ఫిదా అవుతున్నారు.
తెలుగు సినీ పరిశ్రమలో తనదైన ముద్ర వేసి, విప్లవాత్మక చిత్రాలతో ప్రజల గుండెల్లో పీపుల్స్ స్టార్గా నిలిచిన సీనియర్ నటుడు, దర్శకుడు ఆర్. నారాయణమూర్తి ఎప్పటిలాగే ఎటువంటి హంగు ఆర్భాటాలు లేకుండా హైదరాబాద్ శ్రీనగర్కాలనీలోని రోడ్డుపై ఒంటరిగా నడుచుకుంటూ వెళ్తున్నారు. అదే సమయంలో.. అటుగా బీఆర్ఎస్ వర్కింగ్ ప్రెసిడెంట్ కేటీఆర్ కుమారుడు, తెలంగాణ మాజీ ముఖ్యమంత్రి కేసీఆర్ మనవడు అయిన హిమాన్షు రావు తన వాహనంలో ప్రయాణిస్తున్నారు. రోడ్డుపై వెళ్తున్న నారాయణమూర్తిని గమనించిన హిమాన్షు.. ఏమాత్రం ఆలస్యం చేయకుండా వెంటనే తన కారును పక్కకు ఆపారు.
కారు దిగి చకచకా నారాయణమూర్తి వద్దకు వెళ్లిన హిమాన్షు.. ఆయనకు ఎంతో వినయపూర్వకంగా నమస్కరించి ఎంతో గౌరవంతో పలకరించారు. ఆయన యోగక్షేమాలను, ఆరోగ్యం గురించి అడిగి తెలుసుకున్నారు. సినిమా రంగంలో అంతటి అద్భుతమైన గుర్తింపు తెచ్చుకుని సమాజంలో ఎంతో గొప్ప స్థాయికి చేరినప్పటికీ, ఆర్. నారాయణమూర్తి ఇప్పటికీ ప్రదర్శిస్తున్న నిరాడంబరత, సాదాసీదా జీవనశైలి తనను ఎంతగానో ఆకట్టుకున్నాయని హిమాన్షు ఈ సందర్భంగా వ్యాఖ్యానించారు. ఈ వయసులో కూడా ఆయనలో ఉన్న ఆ నిరాడంబరత్వమే తనకు ఒక గొప్ప స్ఫూర్తిని ఇచ్చిందని హిమాన్షు ఎంతో అప్యాయంగా పంచుకున్నారు.
