తిరుమల శ్రీవారికి భక్తుల నుంచి మరోసారి భారీగా కానుకలు, విరాళాలు అందాయి. హైదరాబాద్‌కు చెందిన ఓ భక్తురాలు శ్రీవారికి రెండు బంగారు పగడాల హారాలను సమర్పించారు. ఈ రెండు హారాల విలువ సుమారు రూ.25 లక్షలు ఉంటుందని సమాచారం.
అదేవిధంగా హైదరాబాద్‌కు చెందిన మరో భక్తుడు, అమెరికాకు చెందిన భక్తుడు టీటీడీకి చెందిన బర్డ్, ప్రాణదాన ట్రస్ట్‌లకు విరాళాలు అందించారు. ఒక్కో ట్రస్ట్‌కు చెరో రూ.10 లక్షల చొప్పున మొత్తం రూ.20 లక్షలను విరాళంగా సమర్పించారు. భక్తుల ఈ సేవాభావాన్ని టీటీడీ అధికారులు అభినందించారు.
శ్రీవారికి రూ.25 లక్షల విలువైన బంగారు పగడాల హారాలు విరాళం
తిరుమల శ్రీవారికి హైదరాబాద్‌కు చెందిన కమల అనే భక్తురాలు రెండు బంగారు పగడాల హారాలను విరాళంగా అందజేశారు. దాదాపు రూ.25 లక్షల విలువైన ఈ హారాలను ఆమె తన కుటుంబ సభ్యులతో కలిసి శ్రీవారి ఆలయంలోని రంగనాయకుల మండపంలో టీటీడీ అదనపు ఈవో సీహెచ్ వెంకయ్య చౌదరికి అందజేశారు.
అంతకుముందు కమల తన కుటుంబ సభ్యులతో కలిసి శ్రీవారిని దర్శించుకున్నారు. అనంతరం ఆలయ అధికారులకు బంగారు హారాలను సమర్పించారు.
ఇదిలా ఉండగా, టీటీడీకి చెందిన పలు ట్రస్టులకు కూడా భక్తులు భారీగా విరాళాలు అందజేశారు. హైదరాబాద్‌కు చెందిన కొడాలి మారుతి శేషతల్ప సాయి టీటీడీ బర్డ్ ట్రస్టుకు రూ.10,00,116 విరాళంగా అందించారు. అలాగే అమెరికాకు చెందిన ఎన్ఆర్ఐ నల్లపాటి గిరిధర్ టీటీడీ శ్రీ వేంకటేశ్వర ప్రాణదాన ట్రస్టుకు రూ.10,00,116 విరాళాన్ని సమర్పించారు.
ఈ మేరకు దాతలు తమ విరాళాలకు సంబంధించిన డీడీలను రంగనాయకుల మండపంలో టీటీడీ అదనపు ఈవో సీహెచ్ వెంకయ్య చౌదరికి అందజేశారు. ఈ కార్యక్రమంలో టీటీడీ బోర్డు సభ్యులు నన్నపనేని సదాశివరావు, శ్రీవారి ఆలయ డిప్యూటీ ఈవో భాస్కర్ తదితరులు పాల్గొన్నారు.
శ్రీ పద్మావతీ మహిళా జూనియర్ కళాశాలలో రూ.71 లక్షల వ్యయంతో ఏర్పాటు చేసిన ఈ-లెర్నింగ్ సెమినార్ హాల్‌ను టీటీడీ ఈవో ముద్దాడ రవిచంద్ర ప్రారంభించారు. పోటీ పరీక్షలు, ప్రవేశ పరీక్షలకు సిద్ధమయ్యే విద్యార్థినులకు ఈ సెమినార్ హాల్ ఎంతో ఉపయోగకరంగా ఉంటుందని ఆయన తెలిపారు.
అనంతరం కళాశాలలో విద్యార్థి సంఘాన్ని ప్రారంభించిన ఈవో, నూతనంగా ఎన్నికైన విద్యార్థి ప్రతినిధులతో ప్రమాణ స్వీకారం చేయించారు. విద్యార్థి సంఘ ప్రతినిధులు తమకు అప్పగించిన బాధ్యతలను చిత్తశుద్ధితో, సమర్థవంతంగా నిర్వర్తించాలని సూచించారు.
అంతకుముందు కళాశాలలో నిర్వహిస్తున్న పాఠ్య, సహ పాఠ్య కార్యక్రమాలకు సంబంధించిన రికార్డులను ప్రిన్సిపాల్ డా. సి. భువనేశ్వరి నుంచి తెలుసుకుని పరిశీలించారు. విద్యా ప్రమాణాలను మరింత మెరుగుపరచడంతో పాటు విద్యార్థినుల సమగ్ర అభివృద్ధికి అవసరమైన పలు సూచనలు చేశారు. ఈ సందర్భంగా విద్యార్థినులు ప్రదర్శించిన నృత్య కార్యక్రమం ప్రత్యేక ఆకర్షణగా నిలిచింది.
విద్యాసంస్థల్లో మౌలిక వసతుల మెరుగుదలకు ప్రాధాన్యం
టీటీడీ ఆధ్వర్యంలోని విద్యాసంస్థల్లో మౌలిక సదుపాయాలను మరింత మెరుగుపరచి, ఉన్నత ప్రమాణాలతో విద్యా సేవలు అందించేలా చర్యలు తీసుకోవాలని ఈవో రవిచంద్ర అధికారులను ఆదేశించారు. ఢిల్లీలోని శ్రీ వేంకటేశ్వర కళాశాల దేశంలోని టాప్-10 కళాశాలల్లో స్థానం పొందే స్థాయికి ఎదిగిందని పేర్కొన్న ఆయన, అదే తరహాలో టీటీడీ ఆధ్వర్యంలోని అన్ని విద్యాసంస్థలు అత్యున్నత ప్రమాణాలను సాధించేలా కృషి చేయాలని సూచించారు.
శ్రీ పద్మావతీ మహిళా జూనియర్ కళాశాలలో ప్రవేశాల కోసం ప్రస్తుతం సుమారు 1:30 నిష్పత్తిలో పోటీ ఉందని ఈవో తెలిపారు. వచ్చే విద్యా సంవత్సరంలో కళాశాల వంద శాతం ఉత్తీర్ణత సాధించేలా అధ్యాపకులు, విద్యార్థినులు సమష్టిగా కృషి చేయాలని ఆయన కోరారు.