ఇంద్రకీలాద్రి దసరా ఉత్సవాలకు ముస్తాబవుతోంది. దుర్గమ్మ శరన్నవరాత్రి ఉత్సవాలను ఘనంగా నిర్వహించేందుకు అధికారులు అన్ని ఏర్పాట్లను వేగవంతం చేశారు. భక్తుల భద్రత, పరిశుభ్రతతో పాటు సాంకేతికతకు ప్రాధాన్యత ఇస్తూ ఈ ఏడాది విజయవాడలో దసరా వేడుకలను అత్యంత వైభవంగా నిర్వహించనున్నారు.
ఉత్సవాలు ఎలాంటి అవాంతరాలు లేకుండా సజావుగా జరిగేందుకు సుమారు 3,500 మంది పోలీసులతో భారీ బందోబస్తు ఏర్పాటు చేస్తున్నారు. ఆలయ పరిసరాల్లో 24 గంటల పాటు సీసీటీవీ కెమెరాల ద్వారా నిరంతర పర్యవేక్షణ కొనసాగనుంది. అక్టోబర్ 11వ తేదీ ఉదయం 9 గంటల నుంచి సాధారణ భక్తులకు అమ్మవారి దర్శనానికి అనుమతి ఉంటుందని దుర్గగుడి ఈవో శీనా నాయక్ వెల్లడించారు.
విజయవాడలోని ఇంద్రకీలాద్రిపై కొలువుదీరిన శ్రీ కనకదుర్గమ్మ దసరా శరన్నవరాత్రి ఉత్సవాలకు సర్వం సిద్ధమవుతోంది. ఈ ఏడాది గతంలో ఎన్నడూ లేని విధంగా ఆధునిక సాంకేతికత, పటిష్టమైన భద్రతా చర్యలు, పర్యావరణహిత ఏర్పాట్లతో ఉత్సవాలను ఘనంగా నిర్వహించేందుకు అధికారులు సన్నాహాలు చేస్తున్నారు. ఈసారి సుమారు 25 లక్షల మందికిపైగా భక్తులు అమ్మవారిని దర్శించుకునే అవకాశం ఉందని అధికారులు అంచనా వేస్తున్నారు. భక్తుల రద్దీకి అనుగుణంగా జిల్లా యంత్రాంగం, పోలీస్, మున్సిపల్, దేవాదాయ శాఖలు సమన్వయంతో విస్తృత ఏర్పాట్లు చేపట్టాయి.
రాష్ట్రపతి రాక.. భద్రతలో ఏఐ సాంకేతికత
ఈ నెల 14న భారత రాష్ట్రపతి ద్రౌపది ముర్ము ఇంద్రకీలాద్రికి విచ్చేసి శ్రీ కనకదుర్గమ్మను దర్శించుకోనున్నారు. ఈ నేపథ్యంలో కట్టుదిట్టమైన ప్రొటోకాల్‌ను అమలు చేస్తున్నట్లు ఎన్టీఆర్ జిల్లా కలెక్టర్ లక్ష్మీశా తెలిపారు. రాష్ట్రపతి పర్యటనతో పాటు దసరా ఉత్సవాల సందర్భంగా భద్రతకు అత్యధిక ప్రాధాన్యత ఇస్తున్నారు.
నగర పోలీస్ కమిషనర్ రాజశేఖరబాబు ఆధ్వర్యంలో సుమారు 3,500 మంది పోలీసులతో భారీ బందోబస్తు ఏర్పాటు చేస్తున్నారు. కమాండ్ కంట్రోల్ రూమ్‌ నుంచి 24 గంటల పాటు సీసీటీవీ కెమెరాల ద్వారా ఆలయ పరిసరాలు, భక్తుల రద్దీని నిరంతరం పర్యవేక్షించనున్నారు.
భక్తుల రద్దీని ముందుగానే అంచనా వేసి, అవసరమైన చర్యలు తీసుకునేందుకు తొలిసారిగా ‘క్రౌడ్ అనలిటిక్స్’ అనే ఆర్టిఫిషియల్ ఇంటెలిజెన్స్ (AI) సాంకేతికతను వినియోగించనున్నారు. అలాగే ఏఐ ఆధారిత డిస్‌ప్లే బోర్డులు, ఆధునిక యాక్సెస్ కంట్రోల్ సిస్టమ్స్‌ను ఏర్పాటు చేసి అనధికారిక ప్రవేశాలకు అడ్డుకట్ట వేయనున్నారు. సాంకేతికతను విస్తృతంగా వినియోగిస్తూ భక్తులకు సురక్షితమైన, సౌకర్యవంతమైన దర్శనం కల్పించడమే లక్ష్యంగా అధికారులు ఏర్పాట్లు చేస్తున్నారు
చిన్నారుల భద్రతకు ‘చైల్డ్ ట్యాగ్‌లు’
రద్దీలో చిన్నారులు తప్పిపోకుండా దేవాదాయ శాఖ ప్రత్యేక చర్యలు చేపడుతోంది. ఈసారి దర్శనానికి వచ్చే పిల్లల చేతులకు ప్రత్యేకంగా ‘చైల్డ్ ట్యాగ్‌లు’ వేయనున్నారు. దీంతో చిన్నారుల వివరాలను సులభంగా గుర్తించే అవకాశం ఉంటుంది. అలాగే దివ్యాంగులు, వృద్ధ భక్తులకు ఎలాంటి అసౌకర్యం కలగకుండా ప్రత్యేక క్యూలైన్లు, అవసరమైన వసతులను ఏర్పాటు చేస్తున్నారు.
భక్తుల నుంచి నేరుగా అభిప్రాయాలు, సూచనలు స్వీకరించేందుకు క్యూఆర్ కోడ్ విధానాన్ని కూడా అందుబాటులోకి తీసుకొచ్చారు. ఈ కోడ్‌ను స్కాన్ చేయడం ద్వారా భక్తులు తమకు ఎదురైన ఇబ్బందులు, సూచనలు, అభిప్రాయాలను నేరుగా అధికారుల దృష్టికి తీసుకెళ్లవచ్చు.
పర్యావరణ హితంగా ‘స్వచ్ఛ దసరా’
ఇంద్రకీలాద్రిపై ఆధ్యాత్మిక కార్యక్రమాలతో పాటు పరిశుభ్రతకు కూడా అధిక ప్రాధాన్యం ఇస్తున్నారు. వీఎంసీ కమిషనర్ ధ్యానచంద్ర ఆధ్వర్యంలో ‘స్వచ్ఛ దసరా’ కార్యక్రమానికి శ్రీకారం చుట్టారు. ఉత్సవాల సందర్భంగా సింగిల్‌ యూజ్‌ ప్లాస్టిక్‌ను పూర్తిగా నిషేధించారు.
పారిశుద్ధ్య నిర్వహణ కోసం 1,400 మంది సిబ్బందిని ప్రత్యేక సెక్టార్లుగా విభజించి విధుల్లోకి దించారు. భక్తులకు పరిశుభ్రమైన, సురక్షితమైన వాతావరణం కల్పించడంతో పాటు ఉత్సవాలను పర్యావరణహితంగా నిర్వహించేందుకు అధికారులు ప్రత్యేక ప్రణాళికతో ముందుకు సాగుతున్నారు.