హైదరాబాద్‌లో ఆర్టీసీ–మెట్రో కామన్‌ పాస్‌ ధరలపై తెలంగాణ ప్రభుత్వం పునఃసమీక్షకు సిద్ధమైంది. ప్రస్తుతం రోజువారీ పాస్‌ ధర రూ.400, నెలవారీ పాస్‌ ధర రూ.8,500గా ఉండగా, ఈ ఛార్జీలు సామాన్య ప్రయాణికులకు భారంగా మారుతున్నాయంటూ ఫిర్యాదులు వెల్లువెత్తుతున్నాయి. ఈ నేపథ్యంలో ఉప ముఖ్యమంత్రి భట్టి విక్రమార్క సూచనల మేరకు ధరలపై సమీక్ష నిర్వహించనున్నారు. త్వరలో ఉన్నతాధికారులతో సమావేశమై, ప్రజల అభిప్రాయాలు, ప్రయాణికుల అవసరాలను పరిగణనలోకి తీసుకుని తగిన నిర్ణయం తీసుకుంటామని రవాణాశాఖ మంత్రి పొన్నం ప్రభాకర్‌ వెల్లడించారు. అయితే, కామన్‌ పాస్‌ ధరల తగ్గింపుపై ప్రభుత్వం ఇంకా ఎలాంటి తుది నిర్ణయం తీసుకోలేదు.
ప్రయాణికుల సౌకర్యార్థం తెలంగాణ ప్రభుత్వం ఇటీవల TGSRTC–హైదరాబాద్ మెట్రో కామన్‌ పాస్‌ను అందుబాటులోకి తీసుకొచ్చింది. నిత్యం బస్సులు, మెట్రో రైళ్లలో ప్రయాణించే ఐటీ ఉద్యోగులు, విద్యార్థులు, ఇతర ఉద్యోగులకు ప్రయాణ ఖర్చులు తగ్గించాలనే ఉద్దేశంతో ఈ పాస్‌ను ప్రవేశపెట్టింది. అయితే, పాస్‌ ధరలు అధికంగా ఉన్నాయంటూ ప్రయాణికుల నుంచి అసంతృప్తి వ్యక్తమవుతోంది. ప్రస్తుతం రోజువారీ పాస్‌ ధర రూ.400, నెలవారీ పాస్‌ ధర రూ.8,500గా ఉండటంతో సామాన్యులకు ఈ వ్యయం భారంగా మారుతోంది. సొంత వాహనంపై ప్రయాణించినా ఇంత ఖర్చు కాదని పలువురు అభిప్రాయపడుతున్నారు. దీంతో పాస్‌ ప్రారంభమైన తొలి వారంలోనే ఆశించిన స్థాయిలో స్పందన లభించలేదని తెలుస్తోంది. ఈ నేపథ్యంలో ప్రయాణికుల నుంచి వస్తున్న ఫిర్యాదులను పరిగణనలోకి తీసుకున్న ప్రభుత్వం, ఆర్టీసీ–మెట్రో కామన్‌ పాస్‌ ఛార్జీలను పునఃసమీక్షించాలని నిర్ణయించింది. ధరలను తగ్గించే అంశంపై త్వరలో తదుపరి చర్యలు చేపట్టే అవకాశం ఉంది. అయితే, ఛార్జీల తగ్గింపుపై ఇంకా తుది నిర్ణయం వెలువడలేదు.
ఉప ముఖ్యమంత్రి భట్టి విక్రమార్క సూచనల మేరకు ఛార్జీలపై సమీక్ష నిర్వహించేందుకు ఉన్నతాధికారులతో త్వరలో సమావేశం ఏర్పాటు చేయనున్నట్లు రవాణాశాఖ మంత్రి పొన్నం ప్రభాకర్‌ వెల్లడించారు. ప్రజల అభిప్రాయాలు, ప్రయాణికుల అవసరాలు, వాస్తవ పరిస్థితులను పరిగణనలోకి తీసుకుని అందుబాటు ధరలను నిర్ణయిస్తామని తెలిపారు.ప్రస్తుతం రోజువారీ కామన్‌ పాస్‌ ధర రూ.400గా ఉంది. ఇందులో మెట్రో ప్రయాణానికి రూ.300, ఆర్టీసీ బస్సు ప్రయాణానికి రూ.100 కేటాయించారు. అదేవిధంగా నెలవారీ కామన్‌ పాస్‌ ధర రూ.8,500గా నిర్ణయించారు. ఇందులో మెట్రో వాటా రూ.7,000 కాగా, ఆర్టీసీ వాటా రూ.1,500గా ఉంది. ఈ ధరలు సాధారణ ఉద్యోగులు, విద్యార్థులు, రోజూ ప్రజా రవాణాపై ఆధారపడే ప్రయాణికులకు అధికంగా ఉన్నాయనే అభిప్రాయాలు వ్యక్తమవుతున్నాయి. ముఖ్యంగా ప్రతిరోజూ కార్యాలయాలకు వెళ్లేవారు, బస్సు నుంచి మెట్రోకు మారుతూ ప్రయాణించేవారు ఈ పాస్‌ల ద్వారా ఎంతమేర ఆదా చేసుకోవచ్చనే అంశంపై చర్చ జరుగుతోంది.