ఆంధ్రాకు తమిళనాడు సీఎం విజయ్.. పవన్ కల్యాణ్‌తో భేటీ అయ్యే ఛాన్స్.. ఇద్దరు స్టార్‌లు కలిసేనా?

తమిళనాడు ముఖ్యమంత్రి విజయ్‌ ఆంధ్రప్రదేశ్‌లో పర్యటించనున్నారు. ఈ నెల 13న విజయవాడలో జరిగే ‘విజయవాడ ఉత్సవ్‌ 2.0’ కార్యక్రమంలో ఆయన పాల్గొననున్నారు. ఈ పర్యటన సందర్భంగా ఏపీ ముఖ్యమంత్రి చంద్రబాబు నాయుడుతో విజయ్‌ భేటీ కానున్నట్లు సమాచారం. ఈ సమావేశంలో రెండు రాష్ట్రాల మధ్య నెలకొన్న పలు కీలక సమస్యలపై చర్చించే అవకాశం ఉన్నట్లు తెలుస్తోంది. అలాగే, ఏపీ ఉప ముఖ్యమంత్రి పవన్‌ కల్యాణ్‌తోనూ తమిళనాడు సీఎం విజయ్‌ సమావేశమయ్యే అవకాశముందని రాజకీయ వర్గాల్లో ప్రచారం జరుగుతోంది. అయితే, ఈ భేటీలకు సంబంధించిన పూర్తి వివరాలు అధికారికంగా వెల్లడికావాల్సి ఉంది.

తమిళనాడు ముఖ్యమంత్రి జోసెఫ్ విజయ్‌ ఈ నెల 13న ఆంధ్రప్రదేశ్‌లో పర్యటించనున్నారు. ఏపీ ప్రభుత్వం ఆహ్వానం మేరకు విజయవాడలో నిర్వహించనున్న ‘విజయవాడ ఉత్సవ్‌ 2.0’ కార్యక్రమంలో ఆయన పాల్గొననున్నారు. ఈ పర్యటనకు సంబంధించిన అధికారిక షెడ్యూల్‌ ఖరారైనట్లు సమాచారం. ఈ సందర్భంగా ఏపీ ముఖ్యమంత్రి నారా చంద్రబాబు నాయుడుతో విజయ్‌ ప్రత్యేకంగా సమావేశం కానున్నారు. ఈ భేటీలో రెండు రాష్ట్రాల మధ్య నెలకొన్న కీలక సమస్యలపై చర్చించే అవకాశం ఉన్నట్లు తెలుస్తోంది.

‘తెలుగు గంగ’ ఒప్పందంపై చర్చ జరిగేనా?

ఏపీ, తమిళనాడు ముఖ్యమంత్రుల భేటీలో ప్రధానంగా తెలుగు గంగ ప్రాజెక్టు, కృష్ణా జలాల పంపిణీ అంశాలు చర్చకు వచ్చే అవకాశం ఉందని తెలుస్తోంది. తెలుగు గంగ ఒప్పందం ప్రకారం చెన్నై నగర తాగునీటి అవసరాల కోసం ఆంధ్రప్రదేశ్‌ నుంచి అందాల్సిన నీటి వాటా సక్రమంగా అందడం లేదని తమిళనాడు ప్రభుత్వం గతంలో పలుమార్లు అభ్యంతరాలు వ్యక్తం చేసింది. ఈ నేపథ్యంలో తమ రాష్ట్రానికి ఒప్పందం ప్రకారం అందాల్సిన నీటిని విడుదల చేసే అంశాన్ని సీఎం విజయ్‌.. చంద్రబాబు దృష్టికి తీసుకెళ్లే అవకాశం ఉందని సమాచారం.

అదేవిధంగా, ఆంధ్రప్రదేశ్‌ ప్రభుత్వం కొత్తగా నిర్మించాలని యోచిస్తున్న కొన్ని సాగునీటి ప్రాజెక్టులు, డ్యామ్‌ల అంశం కూడా ఈ సమావేశంలో ప్రస్తావనకు రావచ్చని తెలుస్తోంది. ఆయా ప్రాజెక్టుల నిర్మాణం వల్ల తమిళనాడుకు చేరే నీటి ప్రవాహంపై ఎలాంటి ప్రభావం పడుతుందనే అంశంపై ఇరువురు ముఖ్యమంత్రులు చర్చించే అవకాశం ఉందని అంచనా వేస్తున్నారు. అయితే, ఈ అంశాలపై భేటీలో చర్చ జరుగుతుందా? ఎలాంటి నిర్ణయాలు తీసుకుంటారనే దానిపై అధికారిక స్పష్టత రావాల్సి ఉంది.

ఈ పర్యటనలో ఏపీ ఉప ముఖ్యమంత్రి పవన్‌ కల్యాణ్‌తోనూ తమిళనాడు సీఎం విజయ్‌ భేటీ అయ్యే అవకాశం ఉందని సమాచారం. ఇద్దరూ సినీ రంగం నుంచి రాజకీయాల్లోకి వచ్చి కీలక పదవులు చేపట్టిన నాయకులు కావడంతో వీరి సమావేశంపై రాజకీయ వర్గాల్లో ఆసక్తి నెలకొంది.

తమిళనాడులో విజయ్‌ ముఖ్యమంత్రిగా విజయం సాధించిన తర్వాత పవన్‌ కల్యాణ్‌ రాజకీయ ప్రస్థానంపై ఏపీ రాజకీయ వర్గాల్లో చర్చ జరిగింది. ఈ అంశంపై పవన్‌ సైతం తనదైన శైలిలో స్పందించారు. తమిళనాడులో కటౌట్లు పెట్టుకుని విజయ్‌ సులభంగా విజయం సాధించారని సరదాగా వ్యాఖ్యానించిన ఆయన.. తాను మాత్రం 15 ఏళ్లుగా ప్రజల్లో ఉంటూ రాజకీయంగా కష్టపడ్డానని పేర్కొన్నారు. ఈ నేపథ్యంలో ఇద్దరు నేతలు ముఖాముఖి కలిస్తే ఎలాంటి పరిణామాలు చోటుచేసుకుంటాయన్న ఆసక్తి నెలకొంది.

సినిమాల్లోనూ ఆసక్తికరమైన పోలికలు

రాజకీయంగా విభిన్న పరిస్థితుల్లో ఉన్నప్పటికీ, సినీ రంగంలో పవన్‌ కల్యాణ్‌, విజయ్‌ కెరీర్‌ల మధ్య కొన్ని ఆసక్తికరమైన పోలికలు కనిపిస్తాయి. ఇద్దరూ తమదైన నటన, మాస్‌ ఇమేజ్‌తో భారీ అభిమానగణాన్ని సంపాదించుకున్నారు. అంతేకాకుండా, ఒకరి విజయవంతమైన చిత్రాలను మరొకరు రీమేక్‌ చేసి ప్రేక్షకులను ఆకట్టుకున్న సందర్భాలూ ఉన్నాయి.

తొలినాళ్లలో వినోదభరితమైన కథా చిత్రాలతో ప్రేక్షకులను అలరించిన ఈ ఇద్దరు నటులు.. ఆ తర్వాత సామాజిక సమస్యలను ప్రస్తావించే కథలపైనా దృష్టి సారించారు. సమాజంలో అన్యాయాలు, రైతుల కష్టాలు, అవినీతి, కార్పొరేట్‌ సంస్థల మోసాలు వంటి అంశాలను తమ సినిమాల ద్వారా ప్రస్తావించారు. సినీ రంగంలో భారీ అభిమానగణాన్ని సంపాదించుకుని, అనంతరం రాజకీయాల్లోకి ప్రవేశించి కీలక నాయకులుగా ఎదిగిన ఇద్దరి భేటీ ఇప్పుడు ఆసక్తికరంగా మారింది.