తెలంగాణ ఆర్థిక వ్యవస్థను 2047 నాటికి 3 ట్రిలియన్ డాలర్ల స్థాయికి తీసుకెళ్లాలని రాష్ట్ర ప్రభుత్వం లక్ష్యంగా నిర్దేశించుకుంది. ఈ లక్ష్య సాధనకు సీఎం రేవంత్‌రెడ్డి ప్రభుత్వం ‘క్యూర్–ప్యూర్–రేర్’ విధానాన్ని ప్రతిపాదించింది. రాష్ట్రాన్ని మూడు ప్రధాన ప్రాంతాలుగా విభజించి, ఆయా ప్రాంతాల భౌగోళిక పరిస్థితులు, అభివృద్ధి అవకాశాలకు అనుగుణంగా ప్రణాళికలు రూపొందించనుంది. ఇందులో ఔటర్‌ రింగ్‌ రోడ్డు (ఓఆర్‌ఆర్‌) లోపలి ప్రాంతాన్ని ‘క్యూర్’గా, ఓఆర్‌ఆర్‌ నుంచి ప్రతిపాదిత రీజినల్‌ రింగ్‌ రోడ్డు (ఆర్‌ఆర్‌ఆర్‌) వరకు ఉన్న ప్రాంతాన్ని ‘ప్యూర్’గా, ఆర్‌ఆర్‌ఆర్‌ వెలుపల మిగిలిన ప్రాంతాన్ని ‘రేర్’గా ప్రభుత్వం వర్గీకరించింది. ఈ విధానం ద్వారా ప్రాంతాలవారీగా అభివృద్ధిని ప్రోత్సహిస్తూ, రాష్ట్ర ఆర్థిక ప్రగతిని వేగవంతం చేయాలని ప్రభుత్వం భావిస్తోంది.
తెలంగాణను ప్రపంచ పెట్టుబడులకు ప్రధాన గమ్యస్థానంగా తీర్చిదిద్దడంతోపాటు రాష్ట్ర ఆర్థిక వ్యవస్థను మరింత బలోపేతం చేయడమే లక్ష్యంగా సీఎం రేవంత్‌రెడ్డి ప్రభుత్వం అభివృద్ధి ప్రణాళికలను రూపొందిస్తోంది. 2034 నాటికి తెలంగాణను ఒక ట్రిలియన్ డాలర్ల ఆర్థిక వ్యవస్థగా, 2047 నాటికి మూడు ట్రిలియన్ డాలర్ల ఆర్థిక వ్యవస్థగా అభివృద్ధి చేయాలని ముఖ్యమంత్రి లక్ష్యాలను నిర్దేశించారు. ఈ లక్ష్యాల సాధనకు దిశానిర్దేశం చేస్తూ 2025లో విడుదల చేసిన ‘తెలంగాణ రైజింగ్‌ 2047’ విజన్‌ డాక్యుమెంట్‌ రాష్ట్ర భవిష్యత్‌ ప్రగతికి కీలక మార్గదర్శిగా నిలుస్తుందని ప్రభుత్వం భావిస్తోంది. పెట్టుబడులను ఆకర్షించడం, పారిశ్రామికాభివృద్ధిని వేగవంతం చేయడం, ఉపాధి అవకాశాలను పెంపొందించడం ద్వారా తెలంగాణను ఆర్థికంగా మరింత ఉన్నత స్థాయికి తీసుకెళ్లాలని ప్రభుత్వం సంకల్పించింది.
హైదరాబాద్‌లో నిర్వహించిన సమాఖ్య బిజినెస్‌ సమ్మిట్‌–2026 ప్రారంభోత్సవంలో ముఖ్యమంత్రి రేవంత్‌రెడ్డి చేసిన ప్రసంగం రాష్ట్ర అభివృద్ధిపై ప్రభుత్వ ప్రాధాన్యాలను మరోసారి వెల్లడించింది. తెలంగాణకు మరిన్ని పెట్టుబడులను ఆకర్షించడం, పారిశ్రామిక రంగాన్ని విస్తరించడం, గ్రామీణ ఆర్థిక వ్యవస్థను బలోపేతం చేయడం వంటి అంశాలపై ఆయన దృష్టి సారించారు. అదే సమయంలో మహిళా పారిశ్రామికవేత్తలను ప్రోత్సహించడం, స్థానిక యువతలో వ్యాపార నైపుణ్యాలను పెంపొందించి వారిని ఔత్సాహిక పారిశ్రామికవేత్తలుగా తీర్చిదిద్దడం ద్వారా ఉపాధి అవకాశాలను విస్తరించాలని ప్రభుత్వం భావిస్తున్నట్లు స్పష్టం చేశారు.
తెలంగాణ అభివృద్ధిని ఒకే విధానానికి పరిమితం చేయకుండా, ప్రాంతాల ప్రత్యేకతలు, అందుబాటులో ఉన్న వనరులు, ఆర్థిక అవకాశాలకు అనుగుణంగా ప్రణాళికలను అమలు చేయాలన్నదే ముఖ్యమంత్రి ప్రతిపాదించిన ‘CURE–PURE–RARE’ విధానంలోని ప్రధాన ఉద్దేశం.
క్యూర్ పరిధిలో హైదరాబాద్‌.. ఐటీ, ఆవిష్కరణలకు ప్రాధాన్యం
హైదరాబాద్‌ ఔటర్‌ రింగ్‌ రోడ్డు (ఓఆర్‌ఆర్‌) పరిధిలోని ప్రాంతాన్ని ‘క్యూర్’ (Core Urban Region Economy)గా అభివృద్ధి చేయాలని ప్రభుత్వం లక్ష్యంగా పెట్టుకుంది. ఐటీ, సేవారంగాలు, అత్యాధునిక సాంకేతిక పరిజ్ఞానం, పరిశోధనలు, ఆవిష్కరణలు, నూతన వ్యాపారాలకు ఈ ప్రాంతాన్ని ప్రధాన కేంద్రంగా తీర్చిదిద్దాలని భావిస్తోంది. ఇప్పటికే అంతర్జాతీయ స్థాయిలో గుర్తింపు పొందిన హైదరాబాద్‌లో ఉన్న సాంకేతిక నైపుణ్యాలు, మానవ వనరుల సామర్థ్యాన్ని మరింత విస్తరించడం ద్వారా విదేశీ పెట్టుబడులను ఆకర్షించవచ్చని ప్రభుత్వం ఆశిస్తోంది. ఈ క్రమంలో నగరాన్ని ప్రపంచస్థాయి వ్యాపార, సాంకేతిక కేంద్రంగా అభివృద్ధి చేయడంపై ప్రత్యేక దృష్టి సారిస్తోంది.
ఔటర్‌ రింగ్‌ రోడ్డు (ఓఆర్‌ఆర్‌) నుంచి ప్రతిపాదిత రీజినల్‌ రింగ్‌ రోడ్డు (ఆర్‌ఆర్‌ఆర్‌) వరకు ఉన్న ప్రాంతాన్ని ‘ప్యూర్’ (PURE – Peri Urban Region Economy)గా అభివృద్ధి చేయాలని ప్రభుత్వం ప్రణాళికలు రూపొందిస్తోంది. ఈ ప్రాంతంలో తయారీ పరిశ్రమలు, పారిశ్రామిక పార్కులు, గిడ్డంగులు, రవాణా, లాజిస్టిక్స్‌ రంగాలను విస్తరించేందుకు అనుకూల వాతావరణాన్ని కల్పించాలని లక్ష్యంగా పెట్టుకుంది. తద్వారా హైదరాబాద్‌ నగరంపై పెరుగుతున్న పారిశ్రామిక ఒత్తిడిని చుట్టుపక్కల ప్రాంతాలకు విస్తరించి, ప్రాంతీయంగా సమతుల్య అభివృద్ధిని సాధించవచ్చని భావిస్తోంది.
అయితే, ఈ లక్ష్యాన్ని చేరుకోవాలంటే పరిశ్రమలకు అవసరమైన భూమి లభ్యతతోపాటు రహదారుల అభివృద్ధి, నిరంతర విద్యుత్‌ సరఫరా, నీటి వసతి, రవాణా అనుసంధానం వంటి మౌలిక సదుపాయాలను సమగ్రంగా కల్పించాల్సి ఉంటుంది. వీటిని ప్రణాళికాబద్ధంగా అభివృద్ధి చేసినప్పుడే ప్యూర్ పరిధిలో పారిశ్రామిక కార్యకలాపాలు విస్తరించి, కొత్త పెట్టుబడులు, ఉపాధి అవకాశాలు పెరిగే అవకాశం ఉంటుంది.