పాన్ ఇండియా స్టార్ ప్రభాస్ పుట్టినరోజు దగ్గరపడుతున్న కొద్దీ అభిమానుల్లో సందడి పెరుగుతోంది. అక్టోబర్ 23న డార్లింగ్ బర్త్‌డే సందర్భంగా ఆయన నటిస్తున్న సినిమాల నుంచి వరుస అప్‌డేట్లు వచ్చే అవకాశం ఉందనే ప్రచారం ప్రస్తుతం సోషల్ మీడియాలో జోరుగా సాగుతోంది. ముఖ్యంగా హను రాఘవపూడి దర్శకత్వంలో తెరకెక్కుతున్న ‘ఫౌజీ’ నుంచి ప్రత్యేకమైన వీడియో ట్రీట్ వస్తుందనే వార్తలు అభిమానుల్లో ఆసక్తిని పెంచుతున్నాయి.
‘ఫౌజీ’ నుంచి స్పెషల్ ట్రీట్?
ప్రభాస్, హను రాఘవపూడి కాంబినేషన్‌లో రూపొందుతున్న పీరియాడిక్ యాక్షన్ డ్రామా ‘ఫౌజీ’పై ఇప్పటికే భారీ అంచనాలు ఉన్నాయి. అక్టోబర్ 23న ప్రభాస్ బర్త్‌డే సందర్భంగా ‘వరల్డ్ ఆఫ్ ఫౌజీ’ పేరుతో ప్రత్యేక టీజర్ లేదా గ్లింప్స్‌ను విడుదల చేసే ఆలోచనలో మేకర్స్ ఉన్నట్లు తాజా నివేదికలు చెబుతున్నాయి. కొంతకాలంగా మూడు నిమిషాల టీజర్ అంటూ సోషల్ మీడియాలో ప్రచారం జరుగుతున్నప్పటికీ.. ఈ నిడివిపై చిత్రబృందం నుంచి ఎలాంటి అధికారిక ప్రకటన రాలేదు.
‘స్పిరిట్’ నుంచి కూడా అప్‌డేట్ వస్తుందా?
సందీప్ రెడ్డి వంగా దర్శకత్వంలో ప్రభాస్ నటిస్తున్న ‘స్పిరిట్’పై కూడా అభిమానుల్లో భారీ ఆసక్తి నెలకొంది. ప్రభాస్ బర్త్‌డే సందర్భంగా ఈ సినిమా నుంచి ఏదైనా కీలక అప్‌డేట్ వస్తుందేమోనని ఫ్యాన్స్ ఎదురుచూస్తున్నారు. అయితే ఇప్పటివరకు ‘స్పిరిట్’ టీమ్ నుంచి అక్టోబర్ 23కు సంబంధించి అధికారిక ప్రకటన వెలువడలేదు.
‘కల్కి 2’పై కూడా ఆసక్తి
ఇక నాగ్ అశ్విన్ దర్శకత్వంలో తెరకెక్కిన ‘కల్కి 2898 ఏడీ’కి సీక్వెల్‌గా ‘కల్కి 2’ రూపొందుతున్న సంగతి తెలిసిందే. ప్రభాస్ బర్త్‌డే సందర్భంగా ఈ ప్రాజెక్ట్ నుంచి కూడా ఏదైనా కాన్సెప్ట్ పోస్టర్, షూటింగ్ అప్‌డేట్ లేదా ఇతర సమాచారం వస్తుందని అభిమానులు ఆశిస్తున్నారు. అయితే దీనిపైనా అధికారిక స్పష్టత రావాల్సి ఉంది.
మొత్తంగా చూస్తే.. అక్టోబర్ 23న ‘ఫౌజీ’ నుంచి ప్రత్యేక ట్రీట్‌తో పాటు ‘స్పిరిట్’, ‘కల్కి 2’ నుంచి కూడా అప్‌డేట్లు వస్తే ప్రభాస్ అభిమానులకు అది నిజంగానే ట్రిపుల్ ధమాకా అవుతుంది. మరి డార్లింగ్ బర్త్‌డేను మేకర్స్ ఎలా స్పెషల్‌గా మార్చబోతున్నారో చూడాలి.