నార్త్ వెస్ట్రన్ రైల్వే పరిధిలోని వివిధ వర్క్‌షాప్‌లు, యూనిట్లలో ఖాళీగా ఉన్న 2,008 యాక్ట్ అప్రెంటిస్‌ పోస్టుల భర్తీకి నోటిఫికేషన్‌ విడుదలైంది. ఈ పోస్టులకు దరఖాస్తు చేసుకునే అభ్యర్థులు 10వ తరగతి ఉత్తీర్ణతతో పాటు సంబంధిత ట్రేడ్‌లో ఐటీఐ అర్హత కలిగి ఉండాలి. అర్హత ఉన్న అభ్యర్థులు 2026 అక్టోబర్‌ 7 నుంచి నవంబర్‌ 6 వరకు అధికారిక వెబ్‌సైట్‌ ద్వారా ఆన్‌లైన్‌లో దరఖాస్తు చేసుకోవచ్చు. ఎంపిక ప్రక్రియ, వయోపరిమితి, దరఖాస్తు రుసుము తదితర వివరాలను నోటిఫికేషన్‌లో పరిశీలించాలి.
రాజస్థాన్‌లోని జైపుర్ కేంద్రంగా పనిచేస్తున్న రైల్వే రిక్రూట్‌మెంట్ సెల్ (RRC) – నార్త్ వెస్ట్రన్ రైల్వే (NWR) భారీ అప్రెంటిస్‌ నియామకానికి నోటిఫికేషన్‌ విడుదల చేసింది. నార్త్ వెస్ట్రన్ రైల్వే పరిధిలోని వివిధ డివిజన్లు, వర్క్‌షాప్‌లు, యూనిట్లలో మొత్తం 2,008 యాక్ట్ అప్రెంటిస్‌ ఖాళీలను భర్తీ చేయనున్నారు. అర్హత ఉన్న అభ్యర్థులు 2026 అక్టోబర్‌ 7 నుంచి ఆన్‌లైన్‌లో దరఖాస్తు చేసుకోవచ్చు.
ఎలక్ట్రికల్‌, కార్పెంటర్‌, పెయింటర్‌, మేసన్‌, ఫిట్టర్‌, డీజిల్ మెకానిక్‌, వెల్డర్‌, మెకానికల్‌, డీజిల్ మెకానికల్‌, ఎలక్ట్రీషియన్‌, మెషినిస్ట్‌, ఎలక్ట్రానిక్‌ మెకానిక్‌, COPA తదితర ట్రేడ్లలో అప్రెంటిస్‌ అవకాశాలు ఉన్నాయి.
ఏయే యూనిట్లలో ఖాళీలు?
- డివిజనల్ రైల్వే మేనేజర్ ఆఫీస్‌ – అజ్‌మేర్
- డివిజనల్ రైల్వే మేనేజర్ ఆఫీస్‌ – బికనీర్
- డివిజనల్ రైల్వే మేనేజర్ ఆఫీస్‌ – జైపుర్
- డివిజనల్ రైల్వే మేనేజర్ ఆఫీస్‌ – జోధ్‌పుర్
- బీటీసీ క్యారేజ్ – అజ్‌మేర్
- బీటీసీ లోకో – అజ్‌మేర్
- క్యారేజ్ వర్క్స్‌ షాప్‌ – బికనీర్
- క్యారేజ్ వర్క్స్‌ షాప్‌ – జోధ్‌పుర్
విద్యార్హత, వయసు
అభ్యర్థులు కనీసం 50 శాతం మార్కులతో పదో తరగతి లేదా దానికి సమానమైన పరీక్షలో ఉత్తీర్ణులై ఉండాలి. అలాగే సంబంధిత ట్రేడ్‌లో NCVT/SCVT జారీ చేసిన నేషనల్ ట్రేడ్ సర్టిఫికెట్‌ (NTC) కలిగి ఉండాలి. 2026 నవంబర్‌ 6 నాటికి అభ్యర్థుల వయసు 15 నుంచి 24 సంవత్సరాల మధ్య ఉండాలి. ఎస్సీ, ఎస్టీ అభ్యర్థులకు ఐదేళ్లు, ఓబీసీ అభ్యర్థులకు మూడేళ్ల వయోసడలింపు నిబంధనల ప్రకారం వర్తిస్తుంది.
దరఖాస్తు ఫీజు
అర్హత కలిగిన అభ్యర్థులు 2026 నవంబర్‌ 6 వరకు ఆన్‌లైన్‌లో దరఖాస్తు చేసుకోవచ్చు. జనరల్‌ కేటగిరీ అభ్యర్థులు రూ.100 దరఖాస్తు రుసుము చెల్లించాలి. ఎస్సీ, ఎస్టీ, దివ్యాంగులు, మహిళా అభ్యర్థులకు ఫీజు నుంచి మినహాయింపు ఉంటుంది.
ఎంపిక విధానం
ఈ అప్రెంటిస్‌ పోస్టులకు ఎలాంటి రాత పరీక్ష నిర్వహించరు. పదో తరగతి, ఐటీఐలో అభ్యర్థులు సాధించిన మార్కుల ఆధారంగా మెరిట్‌ జాబితాను రూపొందిస్తారు. అనంతరం డాక్యుమెంట్‌ వెరిఫికేషన్‌, మెడికల్‌ ఎగ్జామినేషన్‌ ద్వారా తుది ఎంపిక ప్రక్రియను పూర్తి చేస్తారు.
అర్హత ఉన్న అభ్యర్థులు చివరి తేదీ వరకు వేచి ఉండకుండా ముందుగానే దరఖాస్తు చేసుకోవడం మంచిది. దరఖాస్తు ప్రక్రియ, ట్రేడ్ వారీగా ఖాళీలు, రిజర్వేషన్‌, వయోపరిమితి, ఇతర నిబంధనలకు సంబంధించిన పూర్తి వివరాల కోసం RRC నార్త్ వెస్ట్రన్ రైల్వే అధికారిక నోటిఫికేషన్‌ను పరిశీలించాలి.