ఆంధ్రప్రదేశ్లో చైన్ స్నాచింగ్కు పాల్పడి కారులో పరారవుతున్న దొంగల ముఠాను తెలంగాణ సరిహద్దు గ్రామస్తులు సినిమా ఫక్కీలో వెంబడించి పట్టుకున్నారు. ఏపీలోని కుక్కునూరు మండలం గుండబోరులో ఓ మహిళ మెడలోని బంగారు గొలుసును దొంగిలించిన నిందితులు కారులో అక్కడి నుంచి వేగంగా వెళ్లిపోయారు. ఈ విషయాన్ని చుట్టుపక్కల గ్రామాల ప్రజలకు సమాచారం అందించారు.
సమాచారం అందుకున్న తెలంగాణ సరిహద్దులోని తిమ్మంపేట, ములకలపల్లి మండలాల గ్రామస్తులు అప్రమత్తమయ్యారు. నిందితులు ప్రయాణిస్తున్న కారును గుర్తించి వెంబడించిన గ్రామస్తులు వారిని అడ్డుకుని పట్టుకున్నారు. కారులో ఉన్న ముగ్గురు యువకులు, ఓ మహిళను అదుపులోకి తీసుకుని చితకబాదారు. అనంతరం నిందితులను పోలీసులకు అప్పగించారు. ఈ ఘటనకు సంబంధించి పోలీసులు దర్యాప్తు చేపట్టారు. పూర్తి వివరాల్లోకి వెళితే..
ఆంధ్రప్రదేశ్–తెలంగాణ సరిహద్దు ప్రాంతంలో చైన్ స్నాచింగ్ ఘటన తీవ్ర కలకలం రేపింది. ఏపీలో మహిళ మెడలోని బంగారు గొలుసును దొంగిలించి కారులో తెలంగాణ వైపు పరారవుతున్న దొంగల ముఠాను స్థానిక గ్రామస్తులు సినిమా ఫక్కీలో ఛేజ్ చేసి పట్టుకున్నారు.
ఏలూరు జిల్లా కుక్కునూరు మండలం గుండబోరు గ్రామంలో ఓ మహిళ ఒంటరిగా ఉన్న సమయంలో గుర్తుతెలియని వ్యక్తులు ఆమె మెడలోని బంగారు గొలుసును లాక్కున్నారు. అనంతరం కారులో వేగంగా అక్కడి నుంచి పరారయ్యారు. బాధితురాలు కేకలు వేయడంతో అప్రమత్తమైన స్థానికులు వెంటనే దొంగలు ప్రయాణిస్తున్న కారు వివరాలను చుట్టుపక్కల గ్రామాలకు, తెలంగాణ సరిహద్దు ప్రాంతంలోని ప్రజలకు చేరవేశారు.
సమాచారం అందుకున్న తెలంగాణ గ్రామస్తులు అప్రమత్తమై.. అనుమానితుల కారును గుర్తించి వెంబడించారు. దొంగలు తప్పించుకునేందుకు వేగంగా దూసుకెళ్లినా.. గ్రామస్తులు వారిని వదలకుండా ఛేజ్ చేశారు. చివరకు కారును అడ్డుకుని నిందితులను పట్టుకున్నారు. ఈ ఘటన స్థానికంగా తీవ్ర చర్చనీయాంశంగా మారింది.
సమాచారం అందుకున్న తెలంగాణలోని భద్రాద్రి కొత్తగూడెం జిల్లా, ములకలపల్లి మండలానికి చెందిన తిమ్మంపేట గ్రామస్తులు వెంటనే అప్రమత్తమయ్యారు. ఏపీ వైపు నుంచి వేగంగా వస్తున్న అనుమానాస్పద కారును గమనించి, దానిని నిలిపివేసేందుకు ఏమాత్రం భయపడకుండా ప్రధాన రహదారికి అడ్డంగా ఒక ఆటోను నిలిపారు.
తీవ్ర వేగంతో వస్తున్న దొంగలు దొరికిపోతామనే భయంతో అడ్డంగా ఉన్న ఆటోను కారుతో బలంగా ఢీకొట్టి తప్పించుకునేందుకు యత్నించారు. ఊహించని ఈ పరిణామంతో అవాక్కయినప్పటికీ, స్థానికులు భయపడకుండా ధైర్యంతో కారును చుట్టుముట్టారు. కారులో ఉన్న ముగ్గురు యువకులు, ఒక మహిళను బయటకు లాగి గట్టిగా దేహశుద్ధి చేశారు.
