టాలీవుడ్‌లో భారీ సినిమాల రిలీజ్ డేట్ల విషయంలో ప్రేక్షకుల్లో నమ్మకం తగ్గిపోతోందా? ప్రస్తుతం ఇండస్ట్రీలో జరుగుతున్న పరిణామాలు చూస్తే అవుననే అనిపిస్తోంది. తాజాగా వెంకటేష్–త్రివిక్రమ్ కాంబినేషన్‌లో తెరకెక్కిన ‘ఆదర్శ కుటుంబం’ మరోసారి వాయిదా పడటంతో ఈ చర్చ మళ్లీ తెరపైకి వచ్చింది. అక్టోబర్ 9న థియేటర్లలోకి రావాల్సిన ఈ సినిమా పోస్ట్‌ప్రొడక్షన్ పనులు పూర్తికాకపోవడంతో విడుదలను వాయిదా వేసినట్లు నిర్మాత నాగవంశీ వెల్లడించారు.
మూడుసార్లు మారిన రిలీజ్ ప్లాన్
‘ఆదర్శ కుటుంబం’ విషయంలో రిలీజ్ డేట్ మారడం ఇదే మొదటిసారి కాదు. తొలుత సమ్మర్‌లో విడుదల చేయాలని భావించారు. ఆ తర్వాత అక్టోబర్ 2 తేదీని ప్రకటించారు. అనంతరం అక్టోబర్ 9కి మార్చారు. చివరికి ఆ తేదీ కూడా సాధ్యం కాకపోవడంతో మరోసారి వాయిదా తప్పలేదు. దీంతో అభిమానుల్లోనూ, సినీ ప్రేక్షకుల్లోనూ అసంతృప్తి వ్యక్తమవుతోంది.
ముఖ్యంగా దసరా వంటి కీలకమైన పండగ సీజన్‌ను కోల్పోవడం సినిమాకు పెద్ద మైనస్‌గా మారే అవకాశం ఉంది. వరుస సెలవులతో కూడిన ఇలాంటి సోలో రిలీజ్ విండో మళ్లీ దొరకడం అంత సులభం కాదు. అయితే కేవలం రిలీజ్ డేట్ కోసం తొందరపడి సినిమాను ప్రేక్షకుల ముందుకు తీసుకెళ్లడం కంటే.. క్వాలిటీ విషయంలో రాజీ పడకుండా ఆలస్యం చేయడమే మంచిదని మేకర్స్ భావిస్తున్నట్లు తెలుస్తోంది.
పోస్ట్‌ప్రొడక్షన్.. రిలీజ్ డేట్లపై ఒత్తిడి
భారీ బడ్జెట్ సినిమాల నిర్మాణంలో షూటింగ్ పూర్తయిన తర్వాత పోస్ట్‌ప్రొడక్షన్, గ్రాఫిక్స్, వీఎఫ్‌ఎక్స్ వంటి పనులు కీలకంగా మారుతున్నాయి. ఈ పనుల్లో ఆలస్యం జరిగితే ముందుగా ప్రకటించిన రిలీజ్ డేట్‌ను నిలబెట్టుకోవడం కష్టమవుతోంది.
మరోవైపు ఓటీటీ డీల్స్ కూడా సినిమాల విడుదల తేదీలపై ప్రభావం చూపుతున్నాయనే చర్చ ఉంది. థియేట్రికల్ రిలీజ్ షెడ్యూల్‌లో మార్పులు వస్తే డిజిటల్ బిజినెస్‌పై కూడా ప్రభావం పడే అవకాశం ఉంటుంది. అయినప్పటికీ, పూర్తి స్థాయి ఔట్‌పుట్ సిద్ధం కాకుండానే సినిమాను విడుదల చేసి సోషల్ మీడియాలో ట్రోలింగ్‌కు గురికావడం కంటే.. కొంత ఆలస్యమైనా మంచి కంటెంట్‌తో రావడమే మేలనే అభిప్రాయం వ్యక్తమవుతోంది.
ఒక్క ‘ఆదర్శ కుటుంబం’తోనే ఆగలేదు
టాలీవుడ్‌లో రిలీజ్ డేట్ మార్పుల చర్చకు ‘ఆదర్శ కుటుంబం’ ఒక్క ఉదాహరణ మాత్రమే. ఇప్పటికే ప్రభాస్ నటిస్తున్న ‘ఫౌజీ’ విడుదల విషయంలోనూ మార్పులు చోటుచేసుకున్నాయి. అలాగే ‘వారణాసి’, ఎన్టీఆర్–ప్రశాంత్ నీల్ కాంబినేషన్‌లో తెరకెక్కుతున్న సినిమాల రిలీజ్ తేదీలపై కూడా అభిమానుల్లో ఆసక్తితో పాటు సందేహాలు ఉన్నాయి.
వరుస వాయిదాల కారణంగా సినిమాల బడ్జెట్లు పెరగడం, ప్రమోషన్స్ కోసం చేసిన ఖర్చులు వృథా కావడం వంటి సమస్యలు ఎదురవుతున్నాయి. ఒకసారి రిలీజ్ డేట్ ప్రకటించిన తర్వాత ప్రమోషనల్ క్యాంపెయిన్ మొదలుపెడుతున్న మేకర్స్‌కు చివరి నిమిషంలో వాయిదా నిర్ణయం అదనపు భారంగా మారుతోంది.
ఇకపై పెద్ద సినిమాల విషయంలో పోస్టర్‌పై రిలీజ్ డేట్ చూసి ప్రేక్షకులు వెంటనే నమ్మే పరిస్థితి ఉండకపోవచ్చనే కామెంట్లు వినిపిస్తున్నాయి. థియేటర్లలో సినిమా విడుదలై ‘రన్నింగ్ సక్సెస్‌ఫుల్’ అనే పోస్టర్ పడే వరకు రిలీజ్ డేట్‌పై పూర్తి నమ్మకం పెట్టుకోలేని పరిస్థితి టాలీవుడ్‌లో ఏర్పడుతోందనే చర్చ సాగుతోంది.