గుంటూరు ఛానల్‌ను పర్చూరు వరకు పొడిగించడం శుభపరిణామమని ఆంధ్రప్రదేశ్ హోంమంత్రి వంగలపూడి అనిత అన్నారు. ఈ ప్రాజెక్టు ద్వారా 28 వేల ఎకరాలకు సాగునీరు అందుతుందని తెలిపారు. గురువారం పర్చూరు నియోజకవర్గంలో పర్యటించిన హోంమంత్రి రూ.75 కోట్ల నిధులతో చేపట్టిన పలు అభివృద్ధి కార్యక్రమాల్లో పాల్గొన్నారు.
ఈ సందర్భంగా ఆమె మాట్లాడుతూ రాష్ట్ర ఆర్థిక పరిస్థితి సవాళ్లతో ఉన్నప్పటికీ సంక్షేమ పథకాల అమలుపై ముఖ్యమంత్రి చంద్రబాబు నాయుడు ప్రత్యేక దృష్టి సారిస్తున్నారని తెలిపారు. రాష్ట్ర అభివృద్ధి కోసం సీఎం నిరంతరం పనిచేస్తున్నారని పేర్కొన్నారు.
గత ప్రభుత్వ హయాంలో రాష్ట్రంలో అభివృద్ధి మందగించిందని అనిత విమర్శించారు. చంద్రబాబు ప్రభుత్వం ప్రకటించిన డీఎస్సీ ద్వారా తాను కూడా ఉపాధ్యాయురాలిగా ఉద్యోగం పొందానని గుర్తుచేశారు. రాష్ట్రంలో గంజాయి నిర్మూలనకు ప్రభుత్వం చర్యలు చేపడుతోందని హోంమంత్రి తెలిపారు.
ఇందులో భాగంగా ఈగల్ టీమ్‌ను ఏర్పాటు చేశామని చెప్పారు. తమ పిల్లలు గంజాయికి బానిసలయ్యారని పలువురు తల్లులు ఫోన్ చేసి ఆవేదన వ్యక్తం చేస్తున్నారని, బాధితుల కోసం రిహాబిలిటేషన్ సెంటర్లను ఏర్పాటు చేసినట్లు వెల్లడించారు.
మహిళల భద్రతకు ప్రభుత్వం ప్రత్యేక ప్రాధాన్యం ఇస్తోందని అనిత అన్నారు. రాష్ట్ర అభివృద్ధి, ప్రజల భద్రత కోసం ఎన్డీఏ కూటమి ప్రభుత్వం చిత్తశుద్ధితో పనిచేస్తోందని పేర్కొన్నారు.
స్థానిక సంస్థల ఎన్నికల్లో కూటమి అభ్యర్థులను గెలిపించాలని ఆమె ప్రజలకు పిలుపునిచ్చారు. గత ప్రభుత్వ హయాంలో స్థానిక సంస్థల ఎన్నికల్లో నామినేషన్లు కూడా వేయకుండా అడ్డుకున్నారని ఆమె ఆరోపించారు.
