విజయవాడ ఉత్సవ్‌తో పాటు సరస్ మేళాను ఘనంగా నిర్వహించేందుకు ఏర్పాట్లు చేస్తున్నట్లు కేంద్ర మంత్రి పెమ్మసాని చంద్రశేఖర్ తెలిపారు. దేశవ్యాప్తంగా ఉన్న డ్వాక్రా మహిళలను ఒకే వేదికపైకి తీసుకువచ్చి, వారి ఉత్పత్తులకు విస్తృత మార్కెటింగ్ అవకాశాలు కల్పించడమే సరస్ మేళా ప్రధాన ఉద్దేశమని పేర్కొన్నారు. మహిళలు వ్యాపారవేత్తలుగా ఎదిగేందుకు ఈ మేళా మంచి అవకాశాన్ని అందిస్తుందని చెప్పారు.
శనివారం మీడియాతో మాట్లాడిన పెమ్మసాని చంద్రశేఖర్. ఈ నెల 15న సరస్ మేళాకు రాష్ట్రపతి ద్రౌపది ముర్ము హాజరుకానున్నట్లు వెల్లడించారు. మేళాలో మొత్తం 600 స్టాళ్లను ఏర్పాటు చేస్తున్నామని తెలిపారు. దేశంలోని వివిధ ప్రాంతాలకు చెందిన ఆహార పదార్థాలు, సంప్రదాయ రుచులు, హస్తకళలు, మహిళలు తయారు చేసిన ఉత్పత్తులను సందర్శకులకు పరిచయం చేయనున్నట్లు వివరించారు.
సరస్ మేళా ద్వారా గ్రామీణ మహిళలకు జాతీయ స్థాయిలో గుర్తింపు లభించడంతో పాటు, వారి ఉత్పత్తులకు విస్తృత మార్కెట్ అందుబాటులోకి వస్తుందని కేంద్ర మంత్రి ఆశాభావం వ్యక్తం చేశారు. మహిళలు ఆర్థికంగా స్వావలంబన సాధించేందుకు, తమ వ్యాపారాలను మరింత విస్తరించుకునేందుకు ఈ కార్యక్రమం దోహదపడుతుందని పేర్కొన్నారు.
విజయవాడ ఉత్సవ్‌ను ఈ నెల 20వ తేదీ వరకు నిర్వహించనున్నట్లు వెల్లడిస్తూ, ప్రజలు పెద్ద సంఖ్యలో పాల్గొని కార్యక్రమాన్ని విజయవంతం చేయాలని పిలుపునిచ్చారు. దసరా ఉత్సవాలను కూడా ఘనంగా నిర్వహించనున్నట్లు తెలిపారు.
గత ఏడాది గుంటూరులో నిర్వహించిన సరస్ మేళా విజయవంతమైందని ఎంపీ కేశినేని చిన్ని తెలిపారు. ఈసారి కృష్ణానది తీరంలోని పున్నమిఘాట్‌లో మేళాను నిర్వహించనున్నట్లు చెప్పారు. డ్వాక్రా, మెప్మా మహిళలు ఈ కార్యక్రమంలో పెద్ద సంఖ్యలో పాల్గొనాలని పిలుపునిచ్చారు.
దేశవ్యాప్తంగా ఉన్న డ్వాక్రా మహిళలు సరస్ మేళాలో పాల్గొని తమ ఉత్పత్తులను ప్రదర్శించేందుకు అవకాశం లభిస్తుందని కేశినేని చిన్ని వివరించారు. మహిళలు తయారు చేసిన హస్తకళలు, ఇతర ఉత్పత్తులకు మార్కెటింగ్ సదుపాయాలు కల్పించడం ద్వారా వారి ఆదాయాన్ని పెంచేందుకు ఈ మేళా ఉపయోగపడుతుందని పేర్కొన్నారు.
మహిళలను పారిశ్రామికవేత్తలుగా తీర్చిదిద్దడం, వారి ఉత్పత్తులకు జాతీయ స్థాయిలో గుర్తింపు తీసుకురావడం, ఆర్థిక స్వావలంబనకు ప్రోత్సాహం అందించడం సరస్ మేళా ముఖ్య ఉద్దేశమని ఎంపీ కేశినేని చిన్ని స్పష్టం చేశారు.
