ఏపీ ముఖ్యమంత్రి చంద్రబాబు అధ్యక్షతన జరిగిన రాష్ట్ర మంత్రివర్గ సమావేశంలో బీసీ రిజర్వేషన్లు, స్థానిక సంస్థల ఎన్నికలపై చర్చ జరిగింది. స్థానిక ఎన్నికలను మంత్రులు, ఎమ్మెల్యేలు అత్యంత ప్రాధాన్యంగా తీసుకోవాలని సీఎం ఆదేశించారు. నవంబర్ 15వ తేదీలోగా ఎన్నికల ప్రక్రియను పూర్తి చేసి, సాధారణ పరిపాలనపై పూర్తిస్థాయిలో దృష్టి సారించాలని మంత్రులకు సూచించినట్లు సమాచారం.
పట్టణ ప్రాంతాల్లో బీసీ జనాభా శాతం గణనీయంగా పెరిగిందని చంద్రబాబు పేర్కొన్నారు. ఎన్టీఆర్ హయాంలో బీసీలకు 24 శాతం రిజర్వేషన్లు కల్పించారని, గత టీడీపీ ప్రభుత్వ హయాంలో వాటిని 34 శాతానికి పెంచారని గుర్తుచేశారు. ఆ తర్వాత అధికారంలోకి వచ్చిన ప్రభుత్వాలు బీసీ రిజర్వేషన్ల అంశంపై సరైన నిర్ణయాలు తీసుకోలేకపోయాయని విమర్శించారు.
కూటమి పార్టీల మధ్య సమన్వయానికి ప్రాధాన్యం
స్థానిక సంస్థల ఎన్నికలకు కూటమి సిద్ధంగా ఉందని చంద్రబాబు స్పష్టం చేసినట్లు సమాచారం. కూటమి అభ్యర్థుల విజయానికి ఇన్‌ఛార్జ్ మంత్రులే బాధ్యత తీసుకోవాలని ఆదేశించారు. టీడీపీ, జనసేన, బీజేపీ మధ్య సమన్వయంతో ముందుకు సాగాలని, స్థానిక పరిస్థితులకు అనుగుణంగా మంత్రులు పరస్పరం చర్చించుకుని నిర్ణయాలు తీసుకోవాలని సూచించారు.
ఎన్నికల్లో ఎలాంటి అవకాశాన్ని వదులుకోవద్దని, అన్ని స్థానాల్లో విజయం సాధించే దిశగా సమష్టిగా పనిచేయాలని సీఎం దిశానిర్దేశం చేసినట్లు తెలిసింది. స్థానిక సంస్థల ఎన్నికల ద్వారా కొత్త నాయకత్వం తెరపైకి వస్తుందని ఆయన అభిప్రాయపడినట్లు సమాచారం. ఈ నేపథ్యంలో మంత్రులు, ఎమ్మెల్యేలు ఎన్నికల సన్నద్ధతపై ప్రత్యేక దృష్టి పెట్టాలని ఆదేశించారు.
బీసీ రిజర్వేషన్లపై కమిషన్ నివేదిక
కేబినెట్ సమావేశంలో బీసీ రిజర్వేషన్ల అంశానికి సంబంధించిన రాజీవ్ రంజన్ మిశ్రా కమిషన్ నివేదిక వివరాలను అధికారులు మంత్రులకు చదివి వినిపించారు. స్థానిక సంస్థల్లో బీసీలకు రాజకీయ ప్రాతినిధ్యం కల్పించే అంశంపై చర్చించినట్లు సమాచారం.
బీసీ రిజర్వేషన్లు, స్థానిక ఎన్నికల నిర్వహణ, కూటమి పార్టీల మధ్య సమన్వయం వంటి అంశాలపై సమావేశంలో ప్రధానంగా చర్చ జరిగినట్లు తెలుస్తోంది. ఎన్నికల ప్రక్రియను సకాలంలో పూర్తి చేయడంతో పాటు స్థానిక సంస్థల పాలనను సాధారణ స్థితికి తీసుకురావడంపై ప్రభుత్వం దృష్టి సారించినట్లు సమాచారం.
