ప్రధానమంత్రి నరేంద్ర మోదీ ఆదివారం (అక్టోబర్ 11) తమిళనాడు రాజధాని చెన్నైలో పర్యటించనున్నారు. ఈ పర్యటనలో భాగంగా రూ.13 వేల కోట్లకు పైగా విలువైన అభివృద్ధి ప్రాజెక్టులను ప్రారంభించడంతో పాటు, మరికొన్ని పనులకు శంకుస్థాపన చేయనున్నారు. మెట్రో రైలు, జాతీయ రహదారులు, రైల్వేలు, ఓడరేవులు, పెట్రోలియం, విద్యా రంగాలకు సంబంధించిన ప్రాజెక్టులు ఇందులో ఉన్నాయి.
చెన్నై మెట్రో రెండో దశకు శ్రీకారం
చెన్నై మెట్రో రైలు రెండో దశలో భాగంగా నిర్మించిన పూందమల్లి–వడపళని మార్గాన్ని ప్రధాని ప్రారంభించనున్నారు. సుమారు రూ.4,900 కోట్ల వ్యయంతో చేపట్టిన ఈ ప్రాజెక్టు నగరంలోని పశ్చిమ ప్రాంతాల నుంచి ఇతర ప్రధాన ప్రాంతాలకు ప్రయాణాన్ని మరింత సులభతరం చేయనుంది. ఈ మార్గంలో 3.7 కిలోమీటర్ల పొడవైన రెండు అంతస్తుల నిర్మాణం ప్రత్యేక ఆకర్షణగా నిలవనుంది.
ఆదివారం ఉదయం సుమారు 11.30 గంటలకు ప్రధాని మోదీ పోరూర్ బైపాస్ స్టేషన్ నుంచి పూందమల్లి బైపాస్ స్టేషన్ వరకు మెట్రో రైలులో ప్రయాణించనున్నారు. అనంతరం తిరిగి రానున్నారు.
జాతీయ రహదారి ప్రాజెక్టులకు ప్రారంభోత్సవాలు
తమిళనాడులో సుమారు రూ.3,700 కోట్ల విలువైన జాతీయ రహదారి ప్రాజెక్టులను ప్రధాని ప్రారంభించనున్నారు. మరికొన్ని అభివృద్ధి పనులకు శంకుస్థాపన చేయనున్నారు. ఈ ప్రాజెక్టులు రాష్ట్రంలో రవాణా సౌకర్యాలను మెరుగుపరచడంతో పాటు మౌలిక సదుపాయాల అభివృద్ధికి దోహదపడనున్నాయి.
ఆలయంలో ప్రత్యేక పూజలు.. పరిశోధనా కేంద్రం సందర్శన
పర్యటనలో భాగంగా ప్రధాని మోదీ జలకంఠేశ్వర ఆలయంలో ప్రత్యేక పూజలు నిర్వహించనున్నారు. అనంతరం ఐఐటీ మద్రాస్‌లోని సుధా గోపాలకృష్ణన్ మెదడు పరిశోధనా కేంద్రాన్ని సందర్శించనున్నారు.
పాఠశాల స్వర్ణోత్సవ వేడుకల్లో పాల్గొననున్న మోదీ
ఆదివారం మధ్యాహ్నం 3 గంటలకు చెన్నైలోని జైగోపాల్ గరోడియా హిందూ విద్యాలయ మెట్రిక్యులేషన్ ఉన్నత పాఠశాల స్వర్ణోత్సవ వేడుకల్లో ప్రధాని పాల్గొననున్నారు. ఈ పర్యటన ద్వారా తమిళనాడులో మౌలిక సదుపాయాలు, రవాణా, విద్య, పరిశోధన రంగాలకు సంబంధించిన అభివృద్ధి కార్యక్రమాలపై కేంద్ర ప్రభుత్వం దృష్టి సారించనుంది.
