ఆంధ్రప్రదేశ్‌లో స్థానిక సంస్థల ఎన్నికల ప్రక్రియలో అక్రమాలు జరుగుతున్నాయని ఆరోపిస్తూ వైఎస్సార్‌సీపీ అధినేత, మాజీ ముఖ్యమంత్రి వైఎస్‌ జగన్‌మోహన్‌రెడ్డి సీఎం చంద్రబాబు నాయుడుపై తీవ్ర విమర్శలు చేశారు. తాడేపల్లిలోని వైఎస్సార్‌సీపీ కేంద్ర కార్యాలయంలో నిర్వహించిన మీడియా సమావేశంలో ఆయన మాట్లాడారు.
ఎన్నికల నోటిఫికేషన్‌ వెలువడినప్పటి నుంచి చంద్రబాబు కుట్రలకు తెరలేపారని జగన్‌ ఆరోపించారు. ఎన్నికల్లో ఎలాగైనా గెలవాలనే లక్ష్యంతో కూటమి ప్రభుత్వం ప్రజాస్వామ్యాన్ని ఖూనీ చేస్తోందని విమర్శించారు. ఈ వ్యవహారానికి సంబంధించిన ఆధారాలను రాష్ట్ర ఎన్నికల సంఘం (ఎస్‌ఈసీ), గవర్నర్‌కు సమర్పించామని, సుప్రీంకోర్టు దృష్టికి కూడా తీసుకెళ్లామని తెలిపారు.
నామినేషన్లను ఎందుకు అడ్డుకుంటున్నారు?
సుప్రీంకోర్టు జోక్యంతో ఈ నెల 25 వరకు అభ్యర్థుల తుది జాబితా ప్రక్రియను వాయిదా వేయాలని ఆదేశాలు వచ్చినట్లు జగన్‌ పేర్కొన్నారు. వైఎస్సార్‌సీపీ అభ్యర్థుల నామినేషన్లను అడ్డుకోవడం ప్రజాస్వామ్య వ్యవస్థ దిగజారుతున్నదనడానికి నిదర్శనమని వ్యాఖ్యానించారు.
ఎన్నికలను పారదర్శకంగా నిర్వహిస్తున్నామని చెప్పే కూటమి ప్రభుత్వం వైఎస్సార్‌సీపీ అభ్యర్థుల నామినేషన్లను ఎందుకు అడ్డుకుంటోందని ప్రశ్నించారు. ప్రజలకు మంచి చేశామనే నమ్మకం ఉంటే అభ్యర్థులను పోటీలో నిలబడనివ్వాలని సవాల్‌ విసిరారు.
పోలీసు అధికారుల తీరుపై విమర్శలు
నామినేషన్లు దాఖలు చేసే అభ్యర్థులకు రక్షణ కల్పించాలని, తగిన పోలీసు బందోబస్తు ఏర్పాటు చేయడంతో పాటు సీసీటీవీ రికార్డింగ్‌ చేపట్టాలని సుప్రీంకోర్టు ఆదేశించినట్లు జగన్‌ గుర్తుచేశారు. అయినప్పటికీ క్షేత్రస్థాయిలో పరిస్థితుల్లో మార్పు కనిపించడం లేదని ఆరోపించారు.
డీజీపీ, డీఐజీలు, ఎస్పీలు, కలెక్టర్లు సుప్రీంకోర్టు ఆదేశాలను అమలు చేస్తున్నారా అని ప్రశ్నించారు. ఎన్నికల ప్రక్రియలో నిష్పక్షపాతంగా వ్యవహరించాల్సిన అధికారులు ప్రభుత్వ ఒత్తిళ్లకు లోనవుతున్నారంటూ విమర్శలు చేశారు.
రాష్ట్రంలో ప్రజాస్వామ్యాన్ని పరిరక్షించేందుకు ప్రజలు స్పందించాలని, ఎన్నికల్లో అక్రమాలకు పాల్పడుతున్నవారికి తగిన సమాధానం చెప్పాలని వైఎస్‌ జగన్‌ పిలుపునిచ్చారు.