దక్షిణాది రాష్ట్రాల పోలీసు శాఖలు పరస్పర సమన్వయంతో పనిచేస్తూ నేరాల నియంత్రణకు కృషి చేయాలని తెలంగాణ సీఎం రేవంత్‌రెడ్డి పిలుపునిచ్చారు. హైదరాబాద్‌లోని ఇంటిగ్రేటెడ్ కమాండ్ కంట్రోల్ సెంటర్‌లో నిర్వహించిన దక్షిణాది రాష్ట్రాల పోలీసు సమన్వయ సమావేశాన్ని ఆయన ప్రారంభించారు.
సైబర్ నేరాలు, డ్రగ్స్‌ అక్రమ రవాణా, ఉగ్రవాదం, వ్యవస్థీకృత నేరాలను అరికట్టేందుకు రాష్ట్రాల మధ్య సమన్వయం ఎంతో అవసరమని సీఎం పేర్కొన్నారు. ఈ నేరాలను సమర్థంగా ఎదుర్కొనేందుకు ఉమ్మడి కార్యాచరణ ప్రణాళికతో ముందుకు సాగాలని సూచించారు.
ఈ సందర్భంగా తెలంగాణలో అమలవుతున్న హైడ్రా, ఈగల్‌, సైబర్ సెక్యూరిటీ బ్యూరో, టీ సేఫ్‌ వంటి విభాగాల పనితీరును రేవంత్‌రెడ్డి వివరించారు. హైదరాబాద్‌లోని ఇంటిగ్రేటెడ్ కమాండ్ కంట్రోల్ సెంటర్ సేవలను దక్షిణాది రాష్ట్రాల పోలీసు శాఖలతో సమన్వయం చేసుకునేందుకు తెలంగాణ ప్రభుత్వం సిద్ధంగా ఉందని తెలిపారు. పరస్పర సహకారంతో పనిచేస్తే అంతర్రాష్ట్ర నేరాలను నియంత్రించడంతో పాటు ప్రజల భద్రతను మరింత మెరుగుపరచవచ్చని ఆయన అభిప్రాయపడ్డారు.
దక్షిణ భారతదేశాన్ని మరింత సురక్షిత ప్రాంతంగా మార్చేందుకు అన్ని రాష్ట్రాల పోలీసు శాఖలు పరస్పర సమన్వయంతో పనిచేయాలని తెలంగాణ ముఖ్యమంత్రి రేవంత్‌రెడ్డి సూచించారు. సైబర్ నేరాలు, మాదకద్రవ్యాల అక్రమ రవాణా, ఉగ్రవాదం, వ్యవస్థీకృత నేరాలను అరికట్టాలంటే రాష్ట్రాల మధ్య సమాచార మార్పిడి, సాంకేతిక పరిజ్ఞానం వినియోగం, ఉమ్మడి కార్యాచరణ ఎంతో అవసరమని స్పష్టం చేశారు. హైదరాబాద్‌లోని ఇంటిగ్రేటెడ్ కమాండ్ కంట్రోల్ సెంటర్ (ఐసీసీసీసీ)లో శుక్రవారం నిర్వహించిన దక్షిణాది రాష్ట్రాల పోలీసు ప్రాంతీయ సమన్వయ కమిటీ (ఎస్‌ఆర్‌పీసీసీ) సమావేశాన్ని ఆయన ప్రారంభించారు.
ఒక రాష్ట్ర పోలీసు శాఖ తన సొంత వనరులతోనే అన్ని రకాల నేరాలను పూర్తిగా నియంత్రించడం సాధ్యం కాదని రేవంత్‌రెడ్డి అభిప్రాయపడ్డారు. నేరస్థులు రాష్ట్రాల సరిహద్దులు దాటి కార్యకలాపాలు సాగిస్తున్న నేపథ్యంలో పోలీసు విభాగాల మధ్య సమన్వయం మరింత కీలకంగా మారిందని పేర్కొన్నారు. ఈ పరిస్థితుల్లో దక్షిణాది రాష్ట్రాల పోలీసు ప్రధాన కార్యాలయాల మధ్య పటిష్ఠమైన సమాచార వ్యవస్థను ఏర్పాటు చేసుకోవాలని సూచించారు.
నేరాలకు సంబంధించిన సమాచారాన్ని ఎప్పటికప్పుడు పరస్పరం పంచుకుంటూ, సాంకేతిక పరిజ్ఞానాన్ని సమర్థంగా వినియోగించుకోవాలని సీఎం కోరారు. ఈ సమావేశంలో కీలక భద్రతా అంశాలపై సమగ్రంగా చర్చించి, భవిష్యత్తులో ఎదురయ్యే సవాళ్లను సమర్థంగా ఎదుర్కొనేందుకు ఉమ్మడి కార్యాచరణ ప్రణాళికను రూపొందించాలని సూచించారు. రాష్ట్రాల మధ్య సహకారం పెరిగితే అంతర్రాష్ట్ర నేరాలను అరికట్టడంతో పాటు దక్షిణ భారతదేశంలో శాంతిభద్రతలను మరింత మెరుగుపరచవచ్చని పేర్కొన్నారు.
తెలంగాణలో అభివృద్ధి చేసిన సాంకేతిక మౌలిక సదుపాయాలు, ఇంటిగ్రేటెడ్ కమాండ్ కంట్రోల్ సెంటర్ సేవలను ఇతర రాష్ట్రాల పోలీసు శాఖలతో సమన్వయం చేసుకునేందుకు ప్రభుత్వం సిద్ధంగా ఉందని సీఎం రేవంత్‌రెడ్డి తెలిపారు. ప్రజలకు శాంతిభద్రతలు, భద్రత కల్పించడంతో పాటు నిష్పక్షపాతంగా, నైతిక విలువలకు కట్టుబడి పనిచేసే పోలీసు వ్యవస్థను ప్రజలు కోరుకుంటారని పేర్కొన్నారు. మారుతున్న నేరాల స్వభావానికి అనుగుణంగా పోలీసింగ్‌లో సంస్కరణలు నిరంతరం కొనసాగాలని సూచించారు.
పోలీసు శాఖకు ప్రభుత్వం కేటాయించే నిధులను కేవలం ఖర్చుగా కాకుండా.. సురక్షిత సమాజ నిర్మాణానికి, పౌరుల భద్రతకు చేసే పెట్టుబడిగా పరిగణించాలని రేవంత్‌రెడ్డి అభిప్రాయపడ్డారు. పోలీసులకు అవసరమైన ఆధునిక సాంకేతిక సదుపాయాలు కల్పించడం, శిక్షణను మెరుగుపరచడం, ప్రత్యేక విభాగాలను బలోపేతం చేయడం ద్వారా ప్రజలకు మరింత సమర్థవంతమైన సేవలు అందించవచ్చని వివరించారు.
తెలంగాణ పోలీసు శాఖలో ఇప్పటికే పలు సంస్కరణలు చేపట్టినట్లు సీఎం వెల్లడించారు. సైబర్ నేరాల నియంత్రణ, మాదకద్రవ్యాల అక్రమ రవాణాను అరికట్టడం, ప్రజా ఆస్తుల పరిరక్షణ వంటి విభిన్న అవసరాలను దృష్టిలో ఉంచుకుని ప్రత్యేక విభాగాలను ఏర్పాటు చేసినట్లు తెలిపారు. ఆధునిక సాంకేతికతను వినియోగించుకుంటూ పోలీసు వ్యవస్థను మరింత సమర్థంగా తీర్చిదిద్దడంపై ప్రభుత్వం దృష్టి సారించిందని పేర్కొన్నారు.
మాదకద్రవ్యాల అక్రమ రవాణాను అరికట్టేందుకు ఈగల్‌ (EAGLE) విభాగం, చెరువులు, జలవనరులు, ప్రభుత్వ ఆస్తుల పరిరక్షణ కోసం హైడ్రా (HYDRAA) పనిచేస్తున్నాయని సీఎం రేవంత్‌రెడ్డి తెలిపారు. సైబర్ నేరాల నియంత్రణలో తెలంగాణ సైబర్ సెక్యూరిటీ బ్యూరో కీలక పాత్ర పోషిస్తోందని పేర్కొన్నారు. సైబర్ నేరాల బాధితులకు వారి సొమ్మును తిరిగి అందించే విషయంలో తెలంగాణ సాధించిన ఫలితాలను ఈ సందర్భంగా ప్రస్తావించారు. ఈగల్‌ విభాగం పనితీరుకు కేంద్ర స్థాయిలో గుర్తింపు లభించిందని వెల్లడించారు. మారుతున్న నేరాల తీరును సమర్థంగా ఎదుర్కొనేందుకు ప్రత్యేక విభాగాల ఏర్పాటు మాత్రమే కాకుండా.. పోలీసు సిబ్బందికి నిరంతర శిక్షణ, ఆధునిక సాంకేతిక పరిజ్ఞానం అందించడం కూడా అవసరమని స్పష్టం చేశారు.
ఆహార కల్తీని అరికట్టడం, ఔషధాల నియంత్రణను మెరుగుపరచడం లక్ష్యంగా టీజీ సేఫ్‌ వ్యవస్థను ప్రారంభించినట్లు రేవంత్‌రెడ్డి వివరించారు. వివిధ ప్రభుత్వ శాఖలు సమన్వయంతో పనిచేస్తే ప్రజారోగ్యానికి సంబంధించిన సమస్యలను మరింత సమర్థంగా పరిష్కరించవచ్చని పేర్కొన్నారు.
ప్రజల భద్రత కోసం పోలీసులు అనేక సవాళ్ల మధ్య విధులు నిర్వర్తిస్తున్నారని సీఎం అన్నారు. పోలీసు సిబ్బంది కుటుంబాల సంక్షేమం, వారి పిల్లల భవిష్యత్తుకు భరోసా కల్పించడం కూడా ప్రభుత్వ బాధ్యతేనని తెలిపారు. పోలీసు కుటుంబాల పిల్లలకు నాణ్యమైన విద్యను అందించాలనే లక్ష్యంతో హైదరాబాద్‌లో యంగ్‌ ఇండియా పోలీస్‌ స్కూల్‌ను ఏర్పాటు చేసినట్లు వెల్లడించారు. హోంగార్డు నుంచి డీజీపీ స్థాయి వరకు వివిధ హోదాల్లో పనిచేసే పోలీసు సిబ్బంది పిల్లలకు ఈ పాఠశాలలో చదువుకునే అవకాశం కల్పించినట్లు వివరించారు.