తెలంగాణకు పెట్టుబడులను ఆకర్షించేందుకు సీఎం రేవంత్ రెడ్డి విదేశీ పర్యటనకు వెళ్లనున్నారు. దాదాపు 20 రోజుల పాటు అమెరికా, యూకే సహా పలు దేశాల్లో పర్యటించనున్నట్లు తెలుస్తోంది. ఐటీ, ఏఐ, సెమీకండక్టర్లు, ఫార్మా, గ్రీన్ ఎనర్జీ వంటి రంగాల్లో తెలంగాణకు పెట్టుబడులు రప్పించేందుకు గ్లోబల్ కంపెనీల ప్రతినిధులు, పెట్టుబడిదారులతో సమావేశాలు నిర్వహించనున్నారు. విదేశీ పర్యటన తర్వాత సెప్టెంబర్ మూడో వారంలో తెలంగాణ అసెంబ్లీ సమావేశాలు జరిగే అవకాశాలు ఉన్నట్లు తెలుస్తోంది
తెలంగాణకు భారీ పెట్టుబడులను ఆకర్షించడమే లక్ష్యంగా ముఖ్యమంత్రి రేవంత్ రెడ్డి మరో కీలక విదేశీ పర్యటనకు రెడీ అవుతున్నారు. ఆగస్ట్ 20వ తేదీ నుంచి సెప్టెంబర్ 8వ తేదీ వరకు దాదాపు 20 రోజుల పాటు అమెరికా, యునైటెడ్ కింగ్డమ్ (యూకే)తో పాటు మరికొన్ని దేశాల్లో పర్యటించేలా రాష్ట్ర ప్రభుత్వం ప్రణాళికలు రూపొందిస్తోంది. ప్రపంచస్థాయి కంపెనీలు, మల్టీ నేషనల్ కంపెనీలు, పెట్టుబడి సంస్థలు, ప్రవాస భారతీయులతో సమావేశాలు నిర్వహించి తెలంగాణలో పెట్టుబడులు పెంచే దిశగా సీఎం రేవంత్ రెడ్డి ప్రత్యేకంగా చర్చలు జరపనున్నారు.
ఈ విదేశీ పర్యటనలో ఐటీ, ఆర్టిఫిషియల్ ఇంటెలిజెన్స్ (ఏఐ), డేటా సెంటర్లు, సెమీకండక్టర్లు, ఎలక్ట్రానిక్స్ తయారీ, ఫార్మా, లైఫ్ సైన్సెస్, గ్రీన్ ఎనర్జీ, ఏరోస్పేస్, డిఫెన్స్ తయారీ వంటి వ్యూహాత్మక రంగాలపై తెలంగాణ ప్రభుత్వం ప్రధాన దృష్టి పెట్టనున్నట్లు సమాచారం. అమెరికాలో చిప్ తయారీ, క్లౌడ్ కంప్యూటింగ్, ఏఐ రంగాల్లో అగ్రగామి సంస్థల ప్రతినిధులతో సమావేశాలు జరగనున్నాయి. లండన్లో గ్లోబల్ ఫైనాన్షియల్ ఇన్వెస్టర్లు, విద్యాసంస్థల ప్రతినిధులతోనూ సీఎం రేవంత్ రెడ్డి భేటీ అయ్యే అవకాశాలు ఉన్నాయి.
గతంలో జరిగిన విదేశీ పర్యటనల్లో తెలంగాణ ప్రభుత్వం కుదుర్చుకున్న అవగాహన ఒప్పందాల (ఎంవోయూల) అమలు పురోగతిని కూడా సీఎం రేవంత్ రెడ్డి సమీక్షించే అవకాశం ఉంది. ఇప్పటికే రాష్ట్రంలో పెట్టుబడులు పెట్టిన లేదా కొత్తగా పెట్టుబడులపై ఆసక్తి చూపుతున్న అంతర్జాతీయ కంపెనీలతో సమావేశాలు నిర్వహించి మరిన్ని ప్రాజెక్టులను రాష్ట్రానికి తీసుకురావాలని రాష్ట్ర ప్రభుత్వం లక్ష్యంగా పెట్టుకుంది. తెలంగాణ రైజింగ్-2047 విజన్, ఫ్యూచర్ సిటీ, గ్లోబల్ కెపాసిటీ సెంటర్లు (జీసీసీలు), స్కిల్ డెవలప్మెంట్ వంటి అంశాలను పెట్టుబడిదారులకు వివరించే అవకాశముంది.
