ఎలాంటి భారీ అంచనాలు లేకుండా థియేటర్లలోకి వచ్చి బాక్సాఫీస్ వద్ద సంచలన విజయాన్ని అందుకున్న చిత్రం ‘హనుమాన్ అంశ్’. చిన్న బడ్జెట్‌తో తెరకెక్కిన ఈ సినిమా ప్రేక్షకుల నుంచి మంచి స్పందన అందుకోవడంతో పాటు భారీ వసూళ్లు సాధించింది. నీమ్ కరోలి బాబా జీవితం, ఆధ్యాత్మిక ప్రయాణం ఆధారంగా రూపొందిన ఈ మూవీ ఇప్పుడు తెలుగు ప్రేక్షకులను పలకరించేందుకు సిద్ధమైంది.
సెప్టెంబర్ 18 నుంచి అక్టోబర్ 9కి..
‘హనుమాన్ అంశ్’ తెలుగు వెర్షన్‌ను తొలుత సెప్టెంబర్ 18న విడుదల చేయాలని భావించారు. ప్రముఖ దర్శకుడు త్రివిక్రమ్ శ్రీనివాస్ ఈ చిత్రాన్ని తెలుగులో ప్రజెంట్ చేయనున్నట్లు కూడా అప్పట్లో ప్రకటించారు. అయితే కొన్ని కారణాలతో ఆ విడుదల వాయిదా పడింది. తాజాగా హోంబలే ఫిల్మ్స్ తెలుగు రిలీజ్‌ను అక్టోబర్ 9న ఖరారు చేస్తూ పోస్టర్‌ను విడుదల చేసినట్లు సమాచారం.
నీమ్ కరోలి బాబా జీవిత కథ ఆధారంగా..
1900 నుంచి 1973 వరకు జీవించిన ప్రముఖ ఆధ్యాత్మిక గురువు, హనుమాన్ భక్తుడు నీమ్ కరోలి బాబా జీవితాన్ని, ఆయన బోధనలను ఆధారంగా చేసుకుని విశాల్ చతుర్వేది ‘హనుమాన్ అంశ్’ను తెరకెక్కించారు. శోభినావ్ సత్యా, చందన్ కే. ఆనంద్ తదితరులు కీలక పాత్రల్లో నటించారు. కేవలం రూ.2 కోట్ల బడ్జెట్‌తో రూపొందిన ఈ సినిమా భారీ స్థాయిలో వసూళ్లు సాధించి ఇండస్ట్రీలో హాట్ టాపిక్‌గా మారింది.
అక్టోబర్ 9న మరో రెండు సినిమాలతో పోటీ
తెలుగు వెర్షన్ విడుదలకు అక్టోబర్ 9ను ఎంచుకోవడంతో ‘హనుమాన్ అంశ్’కు అదే రోజు విడుదలవుతున్న మరికొన్ని సినిమాలతో పోటీ తప్పదు. వెంకటేష్, త్రివిక్రమ్ కాంబినేషన్‌లో వస్తున్న ‘ఆదర్శ కుటుంబం – హౌస్ నెం. 47’, శ్రీవిష్ణు హీరోగా నటించిన ‘కామ్రేడ్ కళ్యాణ్’ కూడా అదే రోజున ప్రేక్షకుల ముందుకు రానున్నాయి. ‘ఆదర్శ కుటుంబం’ విడుదలను అక్టోబర్ 2 నుంచి అక్టోబర్ 9కి మార్చిన విషయం తెలిసిందే.
ఇప్పటికే హిందీలో భారీ ఆదరణ అందుకున్న ‘హనుమాన్ అంశ్’ తెలుగులో ఎలాంటి స్పందన అందుకుంటుందో ఆసక్తిగా మారింది. ఆధ్యాత్మిక నేపథ్యంతో తెరకెక్కిన ఈ చిత్రం తెలుగు ప్రేక్షకులను ఎంతవరకు ఆకట్టుకుంటుందో అక్టోబర్ 9న తేలనుంది.