వచ్చే ఏడాది మార్చి–ఏప్రిల్‌లో పంజాబ్ అసెంబ్లీ ఎన్నికలు జరగనున్న నేపథ్యంలో రాష్ట్ర కాంగ్రెస్‌లో కీలక పరిణామం చోటుచేసుకుంది. అధికారాన్ని తిరిగి దక్కించుకోవాలని భారీ ఆశలు పెట్టుకున్న కాంగ్రెస్‌కు, పంజాబ్ పీసీసీ చీఫ్ అమరీందర్ సింగ్ రాజా వారింగ్ రాజీనామా చేయడం చర్చనీయాంశంగా మారింది. తన రాజీనామా లేఖను కాంగ్రెస్ అగ్రనేత రాహుల్ గాంధీకి సమర్పించిన వారింగ్.. తనపై ఎలాంటి ఒత్తిడి లేదని స్పష్టం చేశారు. ఇదిలా ఉండగా, ఆయన స్థానంలో హిందూ నేత ఇందర్ సింగ్లాకు పీసీసీ అధ్యక్ష బాధ్యతలు అప్పగించే అవకాశం ఉందన్న ప్రచారం సాగుతోంది.
వచ్చే ఏడాది అసెంబ్లీ ఎన్నికలు జరగనున్న పంజాబ్‌లో కాంగ్రెస్ పార్టీకి కీలక పరిణామం ఎదురైంది. పంజాబ్ ప్రదేశ్ కాంగ్రెస్ కమిటీ (PCC) అధ్యక్షుడు అమరీందర్ సింగ్ రాజా వారింగ్ తన పదవికి రాజీనామా చేశారు. శుక్రవారం ఢిల్లీలో కాంగ్రెస్ అగ్రనేత రాహుల్ గాంధీని కలిసిన ఆయన.. తన రాజీనామా లేఖను స్వయంగా అందజేశారు. రాష్ట్రంలో ప్రస్తుత రాజకీయ పరిస్థితులు, రాబోయే ఎన్నికల్లో ఎదురయ్యే సవాళ్లపై రాహుల్ గాంధీతో వారింగ్ సుదీర్ఘంగా చర్చించినట్లు తెలిపారు.
రాజీనామాపై రాజా వారింగ్ వివరణ
తన రాజీనామా అనంతరం రాజా వారింగ్ కీలక వ్యాఖ్యలు చేశారు. తనపై ఎలాంటి ఒత్తిడి లేదని ఆయన స్పష్టం చేశారు. తనను పీసీసీ అధ్యక్షుడిగా రాహుల్ గాంధీ నియమించినందున, ఆయనకే నేరుగా రాజీనామా లేఖ అందజేసినట్లు తెలిపారు.
‘‘శిఖరానికి చేరడం ఒక విజయం. అయితే ఎవరూ ఎప్పటికీ అక్కడే ఉండలేరు’’ అని రాజా వారింగ్ వ్యాఖ్యానించారు. ఆయన రాజీనామాతో పంజాబ్ కాంగ్రెస్‌లో తదుపరి అధ్యక్షుడి ఎంపికపై చర్చ మొదలైంది.
పంజాబ్ కాంగ్రెస్‌లో నాయకత్వ మార్పుపై చర్చ
ఏప్రిల్ 2022లో పంజాబ్ కాంగ్రెస్ అధ్యక్షుడిగా బాధ్యతలు స్వీకరించిన రాజా వారింగ్.. పార్టీ అధిష్ఠానంతో తన సంబంధాలపై కీలక వ్యాఖ్యలు చేశారు. తాను ఎప్పుడూ తన అంతరాత్మకు అనుగుణంగానే నిర్ణయాలు తీసుకుంటానని, పార్టీ అగ్రనేత రాహుల్ గాంధీతో ఇప్పటికే అన్ని విషయాలను పంచుకున్నానని చెప్పారు. కాంగ్రెస్‌లో తనకు లభించిన అవకాశాలు, మద్దతు ప్రధానంగా రాహుల్ గాంధీ నుంచే వచ్చాయని, మరెవరినుంచీ కాదని ఆయన స్పష్టం చేశారు.
ఇదిలా ఉండగా, పంజాబ్ కాంగ్రెస్‌లో కొంతకాలంగా సీనియర్ నేతల మధ్య అంతర్గత విభేదాలు కొనసాగుతున్నట్లు రాజకీయ వర్గాల్లో చర్చ జరుగుతోంది. సీఎల్పీ నేత ప్రతాప్ సింగ్ బాజ్వా, మాజీ ముఖ్యమంత్రి చరణ్‌జిత్ సింగ్ చన్నీ, సుఖ్‌జిందర్ సింగ్ రంధావా తదితరులు రాజా వారింగ్ నాయకత్వంపై అసంతృప్తితో ఉన్నట్లు పలు నివేదికలు పేర్కొంటున్నాయి.
విజయ్ ఇందర్ సింగ్లాకు అవకాశం?
రాజా వారింగ్ స్థానంలో కాంగ్రెస్ వర్కింగ్ కమిటీ (CWC) సభ్యుడు, మాజీ మంత్రి విజయ్ ఇందర్ సింగ్లాను పంజాబ్ కాంగ్రెస్ అధ్యక్షుడిగా నియమించే అంశాన్ని పార్టీ అధిష్ఠానం పరిశీలిస్తున్నట్లు సమాచారం. హిందూ సామాజిక వర్గానికి చెందిన సింగ్లా.. రాహుల్ గాంధీకి సన్నిహితుడిగా పార్టీ వర్గాల్లో గుర్తింపు పొందారు.
పంజాబ్‌లో సామాజిక, రాజకీయ సమీకరణాలను సమతుల్యం చేయడంతో పాటు పార్టీ అంతర్గత విభేదాలను చక్కదిద్దే ఉద్దేశంతోనే నాయకత్వ మార్పుపై కాంగ్రెస్ అధిష్ఠానం ఆలోచిస్తున్నట్లు రాజకీయ వర్గాల్లో చర్చ జరుగుతోంది.
జులై 1న కాంగ్రెస్ హైకమాండ్ కీలక నిర్ణయాలను ప్రకటించింది. పంజాబ్ పీసీసీ చీఫ్‌గా రాజా వారింగ్‌ను కొనసాగించడంతో పాటు, మాజీ ముఖ్యమంత్రి చరణ్‌జిత్ సింగ్ చన్నీకి ప్రచార కమిటీ బాధ్యతలు అప్పగించనున్నట్లు వెల్లడించింది. అయితే ఈ నిర్ణయంపై చన్నీతో పాటు సీఎల్పీ నేత ప్రతాప్ సింగ్ బాజ్వా అసంతృప్తి వ్యక్తం చేసినట్లు పార్టీ వర్గాలు తెలిపాయి. రాజా వారింగ్‌కు చెందిన జాట్ సిక్కు సామాజిక వర్గానికి చెందిన సుఖ్‌జిందర్ సింగ్ రంధావా కూడా చన్నీకి మద్దతుగా నిలిచినట్లు సమాచారం. మరోవైపు బనియా వ్యాపార వర్గానికి చెందిన విజయ్ ఇందర్ సింగ్లా సైతం హైకమాండ్ నిర్ణయంపై అసమ్మతి వ్యక్తం చేసినట్లు ఆ సమయంలో పార్టీ వర్గాలు పేర్కొన్నాయి.