విజయవాడ ఇంద్రకీలాద్రిపై దసరా శరన్నవరాత్రి మహోత్సవాలు వైభవంగా కొనసాగుతున్నాయి. ఉత్సవాల్లో భాగంగా ఆదివారం అమ్మవారు శ్రీ బాలా త్రిపుర సుందరీ దేవి అలంకారంలో భక్తులకు దర్శనమిస్తున్నారు. ఈ సందర్భంగా దుర్గమ్మను దర్శించుకునేందుకు తెల్లవారుజాము నుంచే భక్తులు భారీ సంఖ్యలో ఆలయానికి తరలివస్తున్నారు. భక్తుల రద్దీని దృష్టిలో ఉంచుకుని ఆలయ అధికారులు ప్రత్యేక ఏర్పాట్లు చేశారు.
దసరా నవరాత్రుల సందర్భంగా పది రోజుల పాటు అమ్మవారు పది విభిన్న అలంకారాల్లో భక్తులకు దర్శనమివ్వనున్నారు. ఇందులో భాగంగా బాలా త్రిపుర సుందరీ దేవి అలంకారానికి విశేష ప్రాధాన్యత ఉందని పండితులు చెబుతున్నారు. బాలాదేవి అత్యంత మహిమాన్వితమైన దేవత అని, బాలామంత్రానికి కూడా ఎంతో విశిష్టత ఉందని పేర్కొంటున్నారు. అందుకే విద్యోపాసన ప్రారంభించే వారికి తొలుత బాలామంత్రాన్ని ఉపదేశించే సంప్రదాయం ఉందని వివరిస్తున్నారు.
మహాత్రిపుర సుందరీ దేవి నిత్యం కొలువుండే పవిత్ర శ్రీచక్రంలో మొదటి ఆవరణలో బాలా త్రిపుర సుందరీ దేవి ఉంటారని పండితులు తెలిపారు. ముందుగా బాలాదేవి అనుగ్రహం పొందినప్పుడే మహాత్రిపుర సుందరీ దేవి కృపకు పాత్రులవుతారనే విశ్వాసం ఉందని చెప్పారు. దసరా నవరాత్రుల్లో బాలాదేవి అలంకారాన్ని దర్శించుకోవడం భక్తులకు పూర్ణఫలాన్ని అందిస్తుందని పేర్కొన్నారు.
ఆధ్యాత్మికంగా త్రిపుర సుందరీ దేవి రూపం మానవ చైతన్యంలోని మూడు స్థితులకు ప్రతీకగా నిలుస్తుందని పండితులు వివరిస్తున్నారు. జాగ్రత్, స్వప్న, సుషుప్తి అనే మూడు అవస్థలకు బాలాదేవి అధిష్ఠాన దేవతగా భావిస్తారని తెలిపారు. ఈ మూడు స్థితులనే తన స్వరూపంగా కలిగి, సమస్త జగత్తును పరిపాలించే తల్లిగా అమ్మవారిని ఆరాధిస్తారని పేర్కొన్నారు.
జీవులు ఎన్ని జన్మలు ఎత్తినా ఈ మూడు చైతన్య స్థితుల పరిధిలోనే ఉంటారని, మారేది కేవలం వారి ఉపాధులు మాత్రమేనని ఆధ్యాత్మిక భావన వివరిస్తుందని పండితులు తెలిపారు. అటువంటి జగన్మాత మనలోనే అంతర్లీనంగా ఉన్నదనే తాత్విక సందేశాన్ని బాలా త్రిపుర సుందరీ దేవి అలంకారం అందిస్తుందని పేర్కొన్నారు.
