సింగరేణి కార్మికుల సంక్షేమానికి సంబంధించిన అంశాలపై ఉప ముఖ్యమంత్రి భట్టి విక్రమార్క కీలక ఆదేశాలు జారీ చేశారు. పెండింగ్‌లో ఉన్న డిపెండెంట్‌ ఉద్యోగాల కేసులను 15 రోజుల్లోగా పరిష్కరించాలని అధికారులను ఆదేశించారు.
జీవో 76 ప్రకారం అర్హత కలిగిన సింగరేణి కార్మికులకు 1,250 ఎకరాల్లో ఇళ్ల స్థలాల పట్టాలు అందించే ప్రక్రియను వేగవంతం చేయాలని సూచించారు. అలాగే ఆక్రమణల్లో నివసిస్తున్న వారి ప్రాథమిక జాబితాను నెల రోజుల్లోగా సిద్ధం చేయాలని అధికారులను ఆదేశించారు.
ఇదే సమయంలో నెహ్రూ హౌసింగ్‌ కాలనీ నిర్మాణానికి అవసరమైన ప్రణాళికను రూపొందించి ముందుకు వెళ్లాలని భట్టి విక్రమార్క సూచించారు. కార్మికుల సంక్షేమానికి సంబంధించిన పెండింగ్‌ సమస్యలను ప్రాధాన్యతతో పరిష్కరించాలని స్పష్టం చేశారు.
సింగరేణిలో పెండింగ్‌లో ఉన్న డిపెండెంట్‌ ఉద్యోగాల భర్తీ ప్రక్రియను వేగవంతం చేయాలని డిప్యూటీ సీఎం భట్టి విక్రమార్క అధికారులను ఆదేశించారు. సుమారు 300 డిపెండెంట్‌ ఉద్యోగాలకు సంబంధించిన నియామక ఉత్తర్వులను రాబోయే 15 రోజుల్లోగా పూర్తి చేసి, అర్హులైన అభ్యర్థులకు అందజేయాలని సూచించారు.
డిపెండెంట్‌ ఉద్యోగుల పేర్ల మార్పులకు సంబంధించిన సమస్యలను మానవీయ దృక్పథంతో పరిశీలించాలని భట్టి విక్రమార్క స్పష్టం చేశారు. ఈ అంశంపై అధికారుల కమిటీ చేసిన సిఫార్సులను పరిగణనలోకి తీసుకుని తగిన నిర్ణయం తీసుకోవాలని ఆదేశించారు.
మంగళవారం హైదరాబాద్‌లోని ప్రజాభవన్‌లో సింగరేణి ప్రాంతానికి చెందిన మంత్రులు, ఎమ్మెల్యేలు, సంస్థ ఉన్నతాధికారులతో డిప్యూటీ సీఎం భట్టి విక్రమార్క ఉన్నతస్థాయి సమీక్ష సమావేశం నిర్వహించారు. ఈ సందర్భంగా సింగరేణి కార్మికులకు సంబంధించిన పెండింగ్‌ సమస్యలు, డిపెండెంట్‌ ఉద్యోగాల అంశాలపై ఆయన సమీక్షించారు.
సింగరేణి కార్మికులు ఎదుర్కొంటున్న సమస్యలు, ఇళ్ల స్థలాలు, ఉద్యోగాలు, వైద్య సదుపాయాలు, ప్రాంతీయ అభివృద్ధి తదితర అంశాలపై సమావేశంలో విస్తృతంగా చర్చ జరిగింది. కార్మికులు, ప్రజాప్రతినిధులు చేసిన విజ్ఞప్తులను సానుకూలంగా పరిశీలించిన డిప్యూటీ సీఎం భట్టి విక్రమార్క, సమస్యల పరిష్కారానికి తక్షణ చర్యలు చేపట్టాలని అధికారులను ఆదేశించారు.
సింగరేణి కార్మికుల సంక్షేమానికి సంబంధించిన సమస్యల పరిష్కారంపై తెలంగాణ ప్రభుత్వం ప్రత్యేక దృష్టి సారించిందని భట్టి విక్రమార్క తెలిపారు. జీవో నంబర్‌ 76 ప్రకారం అర్హులైన సింగరేణి కార్మికులకు 1,250 ఎకరాల్లో ఇళ్ల స్థలాల పట్టాలు అందించే ప్రక్రియను వేగవంతం చేయాలని అధికారులను ఆదేశించారు. ఆక్రమణలో ఉన్న నివాసితుల ప్రాథమిక జాబితాను నెల రోజుల్లోగా సిద్ధం చేయాలని స్పష్టం చేశారు.
ఇప్పటివరకు మైనింగ్‌ కార్యకలాపాలు నిర్వహించని ప్రాంతాలను గుర్తించి, ఉద్యోగులు, కార్మికుల ఇళ్ల నిర్మాణానికి అనువుగా లేఅవుట్లు రూపొందించాలని భట్టి సూచించారు. ఆయా ప్రాంతాల్లో నెహ్రూ హౌసింగ్‌ కాలనీల నిర్మాణానికి అవసరమైన ప్రణాళికను కూడా సిద్ధం చేయాలని అధికారులను ఆదేశించారు. కార్మికులకు మెరుగైన నివాస సదుపాయాలు కల్పించడంతో పాటు, ఆయా ప్రాంతాల్లో రహదారులు, తాగునీరు, విద్యుత్‌ తదితర మౌలిక వసతులను అభివృద్ధి చేయాలని సూచించారు.
సింగరేణి ఏరియా ఆసుపత్రుల అభివృద్ధిపైనా సమావేశంలో కీలక నిర్ణయాలు తీసుకున్నారు. ప్రస్తుతం ఉన్న ఏరియా ఆసుపత్రులను కార్పొరేట్‌ ఆసుపత్రులకు దీటుగా ఆధునీకరించాలని భట్టి విక్రమార్క ఆదేశించారు. కార్మికులు, వారి కుటుంబ సభ్యులకు మెరుగైన వైద్య సేవలు అందేలా ఆసుపత్రుల్లో అవసరమైన మౌలిక వసతులు, వైద్య పరికరాలు, ఇతర సదుపాయాలను బలోపేతం చేయాలని సూచించారు.
మెడికల్‌ ఇన్వాలిడేషన్‌ ప్రక్రియలో కార్మికులకు ఎలాంటి ఇబ్బందులు కలగకుండా అవసరమైన చర్యలు చేపట్టాలని భట్టి ఆదేశించారు. ఇందుకోసం కార్మికులు ప్రత్యేకంగా కొత్తగూడెం వరకు ప్రయాణించాల్సిన అవసరం లేకుండా, అన్ని ఏరియా ఆసుపత్రుల్లో ప్రతి నెలా నిర్ణీత తేదీన మెడికల్‌ బోర్డు సమావేశాలను నిర్వహించాలని సూచించారు. ఈ విధానం ద్వారా వైద్య కారణాలతో ఉద్యోగానికి సంబంధించిన ప్రక్రియలను మరింత వేగంగా, సులభంగా పూర్తి చేసేందుకు అవకాశం ఉంటుందని ఆయన పేర్కొన్నారు.