మాజీ మంత్రి మల్లారెడ్డి కోడలు ప్రీతి రెడ్డి రాజకీయ అరంగేట్రంపై తెలంగాణ రాజకీయ వర్గాల్లో చర్చ జోరందుకుంది. వచ్చే లోక్‌సభ ఎన్నికల్లో మల్కాజిగిరి నుంచి బీజేపీ అభ్యర్థిగా ఆమె బరిలోకి దిగవచ్చనే ప్రచారం నేపథ్యంలో బీజేపీ మహిళా నేత చారకొండ లావణ్య గౌడ్ చేసిన వ్యాఖ్యలు ప్రాధాన్యం సంతరించుకున్నాయి.
రాజకీయాల్లో ఆర్థికంగా బలమైనవారికే ఎక్కువ అవకాశాలు లభిస్తున్నాయని, పార్టీ కోసం కష్టపడే సామాన్య కార్యకర్తలకు తగిన గుర్తింపు దక్కడం లేదని లావణ్య గౌడ్ విమర్శించారు. ప్రీతి రెడ్డి ఎన్నికల్లో రూ.300–400 కోట్లు ఖర్చు చేస్తారంటూ ప్రచారంలో ఉన్న అంశాన్ని ప్రస్తావిస్తూ ఆమె వ్యాఖ్యలు చేశారు. మోదీపై, దేశంపై ఉన్న అభిమానంతో ప్రీతి రెడ్డికి ఓటు వేసి ఎంపీగా గెలిపించుకోవాల్సి వస్తుందనే అభిప్రాయాన్ని ఓ యూట్యూబ్‌ ఛానెల్‌కు ఇచ్చిన ఇంటర్వ్యూలో వ్యక్తం చేశారు. ఈ వ్యాఖ్యలు ఇప్పుడు రాజకీయంగా చర్చనీయాంశంగా మారాయి
మాజీ మంత్రి, బీఆర్ఎస్ ఎమ్మెల్యే మల్లారెడ్డి కోడలు ప్రీతి రెడ్డి రాజకీయాల్లోకి వస్తారనే ప్రచారం తెలంగాణ రాజకీయాల్లో ఆసక్తిని పెంచుతోంది. విద్యాసంస్థల నిర్వాహకురాలిగా గుర్తింపు పొందిన ఆమె.. గత కొంతకాలంగా ప్రజా కార్యక్రమాల్లో చురుగ్గా పాల్గొంటూ, ప్రజలకు చేరువయ్యే ప్రయత్నం చేస్తున్నారు. వివిధ ప్రాంతాల్లో పర్యటిస్తూ స్థానిక కార్యక్రమాల్లో పాల్గొంటుండటంతో ఆమె రాజకీయ అరంగేట్రంపై ఊహాగానాలు ఊపందుకున్నాయి.
రానున్న లోక్‌సభ ఎన్నికల్లో మల్కాజిగిరి స్థానం నుంచి బీజేపీ అభ్యర్థిగా ప్రీతి రెడ్డి పోటీ చేయవచ్చనే ప్రచారం సాగుతోంది. ఇటీవల ప్రధాని నరేంద్ర మోదీని ఆమె కలవడం కూడా ఈ చర్చకు మరింత ప్రాధాన్యం తెచ్చింది. అయితే, ఆమె రాజకీయ ప్రవేశంపై అధికారికంగా స్పష్టత రావాల్సి ఉంది.
ఇదిలా ఉండగా, ప్రీతి రెడ్డి రాజకీయాల్లోకి వస్తారనే ప్రచారంపై బీజేపీ మహిళా నేత చారకొండ లావణ్య గౌడ్ ఆసక్తికర వ్యాఖ్యలు చేశారు. ప్రస్తుతం రాజకీయాల్లో ఆర్థికంగా బలమైనవారికే ఎక్కువ అవకాశాలు లభిస్తున్నాయని, వారికే ప్రజల మద్దతు దక్కుతోందని అభిప్రాయపడ్డారు. తనలాంటి సామాన్య కార్యకర్తలకు రాజకీయంగా ఎదిగే అవకాశాలు తక్కువగా ఉంటున్నాయని ఆవేదన వ్యక్తం చేశారు. మల్లారెడ్డి కోడలు ప్రీతి రెడ్డి తమ పార్టీ తరఫున ఎంపీగా పోటీ చేస్తే, ఎన్నికల్లో రూ.300 కోట్లు ఖర్చు చేసే స్థాయిలో ఆమెకు అవకాశం ఉండవచ్చని వ్యాఖ్యానించారు. ఓ యూట్యూబ్‌ ఛానెల్‌కు ఇచ్చిన ప్రత్యేక ఇంటర్వ్యూలో ఆమె ఈ వ్యాఖ్యలు చేశారు. దీంతో ప్రీతి రెడ్డి రాజకీయ ప్రవేశం, ఎన్నికల ఖర్చుపై రాజకీయ వర్గాల్లో చర్చ మొదలైంది.
మల్లారెడ్డి కోడలు ప్రీతి రెడ్డి ఏదో ఒక రాజకీయ పార్టీలో చేరడం ఖాయమని, ఆమె బీజేపీలోకే వచ్చే అవకాశం ఉందని చారకొండ లావణ్య గౌడ్ వ్యాఖ్యానించారు. ఆమెకు ఆర్థికంగా బలమైన నేపథ్యం ఉందని, పార్టీకి భారీగా నిధులు సమకూర్చే అవకాశం ఉండటంతో సులభంగా ఎంపీ టికెట్‌ దక్కించుకోవచ్చని అభిప్రాయపడ్డారు. ప్రీతి రెడ్డి ఎమ్మెల్యేగా కాకుండా లోక్‌సభ ఎన్నికల్లోనే పోటీ చేస్తారని తాను భావిస్తున్నట్లు పేర్కొన్నారు.
బీజేపీపై, ప్రధాని మోదీపై తనకు అభిమానముందని చెప్పిన లావణ్య గౌడ్.. పార్టీ ప్రీతి రెడ్డికి ఎంపీ టికెట్‌ ఇస్తే, ఆమెకు ఓటు వేయాల్సిన పరిస్థితి వస్తుందని వ్యాఖ్యానించారు. దేశం పట్ల అభిమానంతో ఇతర పార్టీలకు చెందినవారు కూడా ఆమెకు మద్దతు ఇచ్చే అవకాశం ఉందని పేర్కొన్నారు. డబ్బున్నవారికి రాజకీయాల్లోకి ప్రవేశించడం, ఎన్నికల్లో విజయం సాధించడం సులభంగా మారిందని విమర్శించారు. సోషల్‌ మీడియా సహా వివిధ మార్గాల ద్వారా వారు రాజకీయాల్లోకి వచ్చి వేగంగా ఎదుగుతున్నారని అన్నారు.
మరోవైపు, పార్టీ కోసం నిస్వార్థంగా పనిచేసే సామాన్య కార్యకర్తలకు తగిన గుర్తింపు లభించడం లేదని లావణ్య గౌడ్ ఆవేదన వ్యక్తం చేశారు. కరీంనగర్‌కు చెందిన ఓ మహిళా నేత పార్టీని ఎంతో నమ్ముకుని, ఆర్థిక ఇబ్బందులు ఉన్నప్పటికీ బస్సుల్లో ప్రయాణిస్తూ హైదరాబాద్‌కు వచ్చి కార్యక్రమాల్లో పాల్గొంటారని ఉదాహరణగా వివరించారు. బీజేపీ జెండాను ప్రాణంగా భావిస్తూ, పార్టీ కోసం నిరంతరం శ్రమించే అలాంటి కార్యకర్తలకు రాజకీయాల్లో తగిన స్థానం ఎక్కడుందని ప్రశ్నించారు. ఈ పరిస్థితి ఒక్క బీజేపీకే పరిమితం కాదని, అన్ని రాజకీయ పార్టీల్లోనూ ఇలాంటి పరిణామాలు కనిపిస్తున్నాయని ఆమె వ్యాఖ్యానించారు.