హైదరాబాద్‌లో అర్ధరాత్రి వేళ బహిరంగ ప్రదేశాల్లో పుట్టినరోజు వేడుకలు నిర్వహించడంపై నగర పోలీస్ కమిషనర్ సజ్జనార్ ఆందోళన వ్యక్తం చేశారు. ట్యాంక్‌బండ్‌పై జరిగిన ఘోర రోడ్డు ప్రమాదంలో ఆరేళ్ల చిన్నారి, ఆమె బంధువు ప్రాణాలు కోల్పోయిన నేపథ్యంలో ఆయన ఈ మేరకు హెచ్చరికలు జారీ చేశారు. ప్రమాద స్థలాన్ని పరిశీలించిన పోలీసులు, ఇతర ప్రభుత్వ శాఖల అధికారులతో కలిసి భద్రతా చర్యలపై సమీక్షించారు. ట్యాంక్‌బండ్‌పై వేడుకలకు అనుమతి లేదని, జీహెచ్‌ఎంసీ ఆదేశాలు ఇప్పటికే అమల్లో ఉన్నాయని సజ్జనార్ స్పష్టం చేశారు. యువతతో పాటు తల్లిదండ్రులు కూడా అప్రమత్తంగా ఉండాలని, రాత్రి వేళల్లో రోడ్లు, సరస్సులు, పార్కుల వద్ద వేడుకలు నిర్వహించకుండా బాధ్యతాయుతంగా వ్యవహరించాలని ఆయన విజ్ఞప్తి చేశారు.
అర్ధరాత్రి వేడుకలతో ప్రాణాలకు ముప్పు.. యువతకు సీపీ సజ్జనార్ కీలక హెచ్చరిక
పుట్టినరోజు వేడుకలు సంతోషాన్ని పంచాలి తప్ప.. నిర్లక్ష్యం కారణంగా కుటుంబాల్లో తీరని విషాదాన్ని మిగల్చకూడదని హైదరాబాద్ పోలీస్ కమిషనర్ వీసీ సజ్జనార్ సూచించారు. నగరంలోని ట్యాంక్‌బండ్‌తో పాటు ప్రధాన రహదారులు, సరస్సులు, పార్కుల వద్ద అర్ధరాత్రి సమయంలో పుట్టినరోజు వేడుకలు, కేక్ కటింగ్‌లు నిర్వహించవద్దని యువతకు, తల్లిదండ్రులకు విజ్ఞప్తి చేశారు. క్షణిక ఆనందం కోసం ప్రాణాలను ప్రమాదంలోకి నెట్టుకోవడం సరికాదని హెచ్చరించారు.
ట్యాంక్‌బండ్‌పై తెల్లవారుజామున సుమారు 2 గంటల సమయంలో జరిగిన ఘోర రోడ్డు ప్రమాదం తీవ్ర విషాదాన్ని నింపింది. ఆరేళ్ల కుమార్తె పుట్టినరోజు వేడుకల కోసం తల్లిదండ్రులు కుటుంబ సభ్యులతో కలిసి ట్యాంక్‌బండ్‌కు వెళ్లగా, అక్కడ జరిగిన ప్రమాదంలో చిన్నారితో పాటు ఆమె బంధువు ఒకరు మృతి చెందారు. వివాహమైన కొద్ది నెలలకే ఆ బంధువు ప్రాణాలు కోల్పోవడం మరింత విషాదకరంగా మారిందని సజ్జనార్ ఆవేదన వ్యక్తం చేశారు.
ప్రమాద సమాచారం అందుకున్న వెంటనే పోలీసులు ఘటనా స్థలానికి చేరుకుని క్షతగాత్రులను ఆసుపత్రికి తరలించినప్పటికీ ప్రాణాలను కాపాడలేకపోయారని తెలిపారు. ఇలాంటి దుర్ఘటనలు పునరావృతం కాకుండా పోలీస్ శాఖ అప్రమత్తమైంది. ప్రజల భద్రతకు ప్రాధాన్యమిస్తూ ముందస్తు చర్యలు చేపడుతున్నట్లు వెల్లడించారు. యువత, తల్లిదండ్రులు పోలీసుల సూచనలను పాటించి, రాత్రివేళల్లో బహిరంగ ప్రదేశాల్లో వేడుకలు నిర్వహించకుండా సహకరించాలని సీపీ సజ్జనార్ కోరారు.
సీనియర్ పోలీస్ అధికారులతో కలిసి ట్యాంక్‌బండ్‌పై ప్రమాదం జరిగిన ప్రాంతాన్ని సీపీ సజ్జనార్ పరిశీలించారు. అక్కడి భద్రతా పరిస్థితులను సమీక్షించడంతో పాటు, సంబంధిత ప్రభుత్వ శాఖల అధికారులతో సమావేశమై భవిష్యత్తులో ఇలాంటి ప్రమాదాలు జరగకుండా తీసుకోవాల్సిన చర్యలపై చర్చించారు. పుట్టినరోజు వేడుకలను ఇంట్లో లేదా సురక్షితమైన ప్రదేశాల్లో నిర్వహించుకోవాలని ప్రజలకు సూచించారు. అర్ధరాత్రి వేళల్లో రహదారులపై వాహనాల రాకపోకలు తక్కువగా ఉన్నప్పటికీ, కొన్ని వాహనాలు అధిక వేగంతో దూసుకెళ్లే అవకాశం ఉందని హెచ్చరించారు. ముఖ్యంగా చిన్నారులను వెంటబెట్టుకుని రోడ్లపై వేడుకలు నిర్వహించడం ప్రమాదకరమని స్పష్టం చేశారు.
ట్యాంక్‌బండ్‌పై పుట్టినరోజు వేడుకలు, కేక్ కటింగ్‌లపై ఇప్పటికే నిషేధం అమల్లో ఉందని సీపీ సజ్జనార్ గుర్తుచేశారు. ఈ మేరకు గ్రేటర్ హైదరాబాద్ మున్సిపల్ కార్పొరేషన్ (జీహెచ్‌ఎంసీ) గతంలోనే ఆదేశాలు జారీ చేసిందని తెలిపారు. నిబంధనలను అమలు చేసేందుకు పోలీసులు నిరంతరం పర్యవేక్షిస్తూ, అక్కడ గుమిగూడే వారిని పంపిస్తున్నప్పటికీ కొందరు మళ్లీ అర్ధరాత్రి వేళల్లో వచ్చి వేడుకలు నిర్వహిస్తున్నారని పేర్కొన్నారు. ఇలాంటి నిర్లక్ష్యపు చర్యలు ప్రమాదాలకు దారితీసి కుటుంబాల్లో తీరని విషాదాన్ని నింపుతున్నాయని ఆవేదన వ్యక్తం చేశారు. ప్రజలు నిబంధనలను తప్పనిసరిగా పాటించాలని, రాత్రి వేళల్లో బహిరంగ ప్రదేశాల్లో వేడుకలు నిర్వహించకుండా బాధ్యతాయుతంగా వ్యవహరించాలని సీపీ సజ్జనార్ విజ్ఞప్తి చేశారు