సిద్దిపేట జిల్లాలో లంచం తీసుకుంటూ పంచాయతీ కార్యదర్శి ఏసీబీ అధికారులకు అడ్డంగా దొరికిపోయారు. గ్రామ పంచాయతీ కార్యాలయంలోనే రూ.15 వేల లంచం తీసుకుంటుండగా ఏసీబీ అధికారులు రెడ్‌హ్యాండెడ్‌గా పట్టుకున్నారు.
ఇళ్ల మ్యుటేషన్ కోసం పంచాయతీ కార్యదర్శి రూ.20 వేల లంచాన్ని డిమాండ్ చేసినట్లు సమాచారం. చివరకు రూ.15 వేలకు ఒప్పందం కుదిరింది. ఈ మొత్తాన్ని కాంట్రాక్ట్ కారోబార్ ద్వారా తీసుకుంటుండగా ఏసీబీ అధికారులు దాడి చేసి ఇద్దరినీ అదుపులోకి తీసుకున్నారు.
నిందితుల వద్ద నుంచి లంచం సొమ్మును స్వాధీనం చేసుకున్న ఏసీబీ అధికారులు.. వారిని అరెస్ట్ చేసి తదుపరి చర్యలు చేపట్టారు.
తెలంగాణలో అవినీతి నిరోధక శాఖ (ఏసీబీ) లంచగొండి అధికారులపై వరుసగా చర్యలు చేపడుతోంది. రాష్ట్రవ్యాప్తంగా దాడులు నిర్వహిస్తూ అవినీతికి పాల్పడుతున్న అధికారులను రెడ్‌హ్యాండెడ్‌గా పట్టుకుంటోంది. తాజాగా సిద్దిపేట జిల్లాలో లంచం తీసుకుంటున్న ఓ పంచాయతీ కార్యదర్శితో పాటు కాంట్రాక్ట్ ఉద్యోగిని ఏసీబీ అధికారులు అరెస్ట్ చేశారు.
సిద్దిపేట జిల్లా నారాయణరావుపేట మండలం జక్కాపూర్ గ్రామ పంచాయతీ కార్యాలయంలో ఈ ఘటన చోటుచేసుకుంది. ఇళ్ల మ్యుటేషన్‌కు సంబంధించిన దరఖాస్తు ఫైల్‌ను ముందుకు పంపించి, తదుపరి ప్రక్రియ పూర్తి చేసేందుకు పంచాయతీ కార్యదర్శి లంచం డిమాండ్ చేసినట్లు ఆరోపణలు రావడంతో ఏసీబీ అధికారులు వల పన్నారు. ఈ క్రమంలో పంచాయతీ కార్యదర్శి బి. అరుణ, అదే గ్రామంలో కాంట్రాక్ట్ కారోబార్‌గా పనిచేస్తున్న దాసరి సంతోష్ కలిసి రూ.15 వేల లంచం తీసుకుంటుండగా అధికారులు రెడ్‌హ్యాండెడ్‌గా పట్టుకున్నారు.
ఏసీబీ అధికారులు తెలిపిన వివరాల ప్రకారం.. ఓ వ్యక్తి తన పేరుపై ఉన్న రెండు ఇళ్లకు మ్యుటేషన్ చేయించేందుకు జక్కాపూర్ గ్రామ పంచాయతీలో దరఖాస్తు చేసుకున్నాడు. ఈ ప్రక్రియ పూర్తి చేసేందుకు పంచాయతీ కార్యదర్శి అరుణ తొలుత రూ.20 వేల లంచం డిమాండ్ చేసినట్లు బాధితుడు ఏసీబీకి ఫిర్యాదు చేశాడు. అనంతరం రూ.15 వేలకు లంచం మొత్తాన్ని తగ్గించినట్లు ఫిర్యాదులో పేర్కొన్నాడు.
బాధితుడి ఫిర్యాదుతో రంగంలోకి దిగిన ఏసీబీ అధికారులు పక్కా ప్రణాళికతో ట్రాప్ ఏర్పాటు చేశారు. లంచం మొత్తాన్ని తీసుకుంటున్న సమయంలో అరుణ, సంతోష్‌లను అదుపులోకి తీసుకుని, వారి వద్ద నుంచి నగదును స్వాధీనం చేసుకున్నారు. అనంతరం ఇద్దరినీ అరెస్ట్ చేసి తదుపరి చట్టపరమైన చర్యలు చేపట్టారు.
ఈ క్రమంలో మంగళవారం (అక్టోబర్ 6) ఉదయం సుమారు 11 గంటల సమయంలో జక్కాపూర్ గ్రామ పంచాయతీ కార్యాలయంలో ఏసీబీ అధికారులు ట్రాప్ నిర్వహించారు. కాంట్రాక్ట్ ఉద్యోగి సంతోష్ ద్వారా లంచం డిమాండ్ చేసి స్వీకరిస్తున్న సమయంలో పంచాయతీ కార్యదర్శి అరుణతో పాటు సంతోష్‌ను అధికారులు రెడ్‌హ్యాండెడ్‌గా పట్టుకున్నారు. లంచంగా తీసుకున్నట్లు ఆరోపిస్తున్న రూ.15 వేల నగదును వారి వద్ద నుంచి స్వాధీనం చేసుకున్నారు.
ఈ ఘటనపై పంచాయతీ కార్యదర్శి, కాంట్రాక్ట్ కారోబార్‌ను అరెస్ట్ చేసిన ఏసీబీ అధికారులు.. ఇద్దరినీ హైదరాబాద్‌లోని ఎస్‌పీఈ, ఏసీబీ కేసుల విచారణకు సంబంధించిన IIవ అదనపు ప్రత్యేక న్యాయస్థానం ముందు హాజరుపరచనున్నట్లు తెలిపారు. కేసుకు సంబంధించి దర్యాప్తు కొనసాగుతున్నట్లు వెల్లడించారు.
ఫిర్యాదుదారుడి భద్రతను దృష్టిలో ఉంచుకుని ఆయనకు సంబంధించిన వివరాలను గోప్యంగా ఉంచుతున్నట్లు ఏసీబీ అధికారులు తెలిపారు. ప్రభుత్వ కార్యాలయాల్లో ఏదైనా పని చేయించుకునేందుకు అధికారులు లేదా సిబ్బంది లంచం డిమాండ్ చేస్తే వెంటనే ఏసీబీకి ఫిర్యాదు చేయాలని ప్రజలకు సూచించారు.
లంచం డిమాండ్ చేసే అధికారులపై ఫిర్యాదు చేసేందుకు ఏసీబీ టోల్‌ఫ్రీ నంబర్ 1064ను సంప్రదించవచ్చని అధికారులు పేర్కొన్నారు. ప్రభుత్వ సేవలను ప్రజలు ఉచితంగా పొందే హక్కు కలిగి ఉన్నారని, వాటి కోసం ఎవరైనా లంచం అడిగితే నిర్భయంగా ఏసీబీని ఆశ్రయించాలని సూచించారు.