నితీష్ తివారీ దర్శకత్వంలో నమిత్ మల్హోత్రా నిర్మాణంలో రూపొందుతున్న ‘రామాయణ’ టీజర్ నేడు హనుమాన్ జయంతి సందర్భంగా విడుదలైంది. శ్రీరాముడి పాత్రలో రణబీర్ కపూర్ లుక్, హాలీవుడ్ స్థాయి విజువల్స్ ప్రేక్షకులను మంత్రముగ్ధులను చేస్తున్నాయి. సుమారు 4000 కోట్ల బడ్జెట్తో తెరకెక్కుతున్న ఈ సినిమా మొదటి భాగం 2026 దీపావళికి విడుదల కానుంది. సాయి పల్లవి, యష్ వంటి స్టార్స్ నటిస్తున్న ఈ పౌరాణిక గాథపై ఈ టీజర్ అంచనాలను రెట్టింపు చేస్తోంది.
రామాయణ ం ఇతిహాసం ఆధారంగా నితీష్ తివారీ దర్శకత్వంలో ఓ భారీ సినిమా రూపొందుతున్న సంగతి తెలిసిందే. ‘రామాయణ’ అనే టైటిల్ తో నమిత్ మల్హోత్రా ఈ పాన్ ఇండియా చిత్రాన్ని రూపొందిస్తున్నారు. ఇందులో రణబీర్ కపూర్ రాముడిగా, సాయి పల్లవి సీతగా నటిస్తున్నారు. రావణుడిగా యష్ కనిపించనున్నారు. ఇప్పటికే రిలీజైన ఫస్ట్ గ్లింప్స్ అలరించగా.. నేడు హనుమాన్ జయంతి సందర్భంగా ‘రామ’ పాత్రని పరిచయం చేస్తూ ఫస్ట్ లుక్ టీజర్ను రిలీజ్ చేశారు.
పట్టాభిషేకం, అరణ్యవాసం వంటి ఘట్టాలతో రూపొందించిన ‘రామ’ వీడియో అద్భుతంగా ఉంది. 2 నిమిషాల 38 సెకండ్ల వీడియోతో సినిమా ఏ రేంజ్ లో ఉండబోతోందని శాంపిల్ గా చూపించారు. మర్యాద పురుషోత్తముడుగా శ్రీరాముడి అవతార్ లో రణబీర్ కపూర్ ఆకట్టుకున్నారు. హాలీవుడ్ రేంజ్ విజువల్స్, వీఎఫ్ఎక్స్ ఈ టీజర్కు హైలైట్ గా నిలిచాయి. సీత, రావణుడి పాత్రలను ఈ వీడియోలో చూపించలేదు.
