రీజినల్ రింగ్ రోడ్ దక్షిణ భాగం బాధ్యతలను తెలంగాణ ప్రభుత్వం హెచ్‌జీసీఎల్‌కు అప్పగించింది. రేడియల్ రోడ్–2 టెండర్ల వ్యవహారంలో వివాదం కొనసాగుతున్నప్పటికీ, రీజినల్ రింగ్ రోడ్ దక్షిణ భాగానికి సంబంధించిన భూసేకరణ, అలైన్‌మెంట్‌ల ఖరారు వంటి కీలక పనుల కోసం ప్రభుత్వం హెచ్‌జీసీఎల్‌పైనే నమ్మకం ఉంచింది.
హైదరాబాద్ చుట్టూ నిర్మించిన ఔటర్ రింగ్ రోడ్డు (ఓఆర్ఆర్) నగర విస్తరణకు ఊతమిచ్చింది. ప్రస్తుతం నగరం ఓఆర్ఆర్‌ను దాటి శరవేగంగా విస్తరిస్తుండటంతో, నగరంపై పెరుగుతున్న రవాణా, అభివృద్ధి ఒత్తిడిని తగ్గించేందుకు ఔటర్ రింగ్ రోడ్డుకు వెలుపల రీజినల్ రింగ్ రోడ్డును నిర్మించాలని తెలంగాణ ప్రభుత్వం నిర్ణయించింది. ఈ ప్రాజెక్టును ఉత్తర, దక్షిణ భాగాలుగా విభజించి పనులు చేపట్టనున్నారు.
ఇప్పటికే రీజినల్ రింగ్ రోడ్ ఉత్తర భాగం టెండర్ల దశలో ఉండగా, దక్షిణ భాగానికి సంబంధించిన బాధ్యతలను తెలంగాణ ప్రభుత్వం హైదరాబాద్ గ్రోత్ కారిడార్ లిమిటెడ్ (హెచ్జీసీఎల్)కు అప్పగించింది. రేడియల్ రోడ్–2 టెండర్ల ప్రక్రియపై వివాదం కొనసాగుతున్నప్పటికీ, దక్షిణ భాగం పనులను కూడా అదే సంస్థకు అప్పగించడం చర్చనీయాంశంగా మారింది. ఈ మేరకు తెలంగాణ టుడే కథనం వెల్లడించింది.
రేడియల్ రోడ్ టెండర్ల వ్యవహారంలో తమ కుటుంబానికి చెందిన సంస్థను పోటీలో పాల్గొనకుండా అడ్డుకున్నారని మునుగోడు కాంగ్రెస్ ఎమ్మెల్యే కోమటిరెడ్డి రాజగోపాల్ రెడ్డి ఇటీవల ఆరోపించారు. మరోవైపు, టెండర్ల తుది కేటాయింపుల కారణంగా ప్రభుత్వానికి సుమారు రూ.600 కోట్ల నష్టం వాటిల్లిందని మరో నిర్మాణ సంస్థ ఆరోపించింది. ఈ ఆరోపణల నేపథ్యంలో రోడ్డు ప్రాజెక్టుల టెండర్ల ప్రక్రియపై వివాదం కొనసాగుతోంది.
ఫ్యూచర్ సిటీ భూసేకరణ ప్రక్రియలో ఇప్పటికే భాగస్వామిగా ఉన్న హైదరాబాద్ గ్రోత్ కారిడార్ లిమిటెడ్ (హెచ్జీసీఎల్)కే రీజినల్ రింగ్ రోడ్ (ట్రిపుల్ ఆర్) దక్షిణ భాగం బాధ్యతలను అప్పగించినట్లు తెలుస్తోంది. ఈ మేరకు ఆర్ అండ్‌ బీ శాఖకు చెందిన ఓ సీనియర్ అధికారి తెలిపిన వివరాలను తెలంగాణ టుడే కథనం వెల్లడించింది. హైదరాబాద్ మెట్రోపాలిటన్ డెవలప్‌మెంట్ అథారిటీ పరిధిలో పనిచేసే హెచ్‌జీసీఎల్‌కు ఔటర్ రింగ్ రోడ్డు భూసేకరణ, నిర్మాణం, ల్యాండ్ పూలింగ్, నిర్వహణలో అనుభవం ఉంది. ఈ అనుభవాన్ని దృష్టిలో ఉంచుకుని ట్రిపుల్ ఆర్ దక్షిణ భాగం పనులను కూడా ఆ సంస్థకు అప్పగించినట్లు సమాచారం.
ఈ ప్రాజెక్టు కోసం సుమారు 2 వేల హెక్టార్ల భూమిని సేకరించాల్సి ఉంది. ఇందుకోసం రెవెన్యూ, హెచ్‌ఎండీఏ సహా పలు ప్రభుత్వ విభాగాల మధ్య సమన్వయం అవసరం. ఈ నేపథ్యంలో హెచ్‌జీసీఎల్‌ను నోడల్ ఏజెన్సీగా నియమిస్తే, వివిధ శాఖల మధ్య సమన్వయం మెరుగుపడటంతో పాటు స్థానికంగా తలెత్తే సమస్యలను త్వరగా పరిష్కరించవచ్చని ప్రభుత్వం భావిస్తున్నట్లు తెలుస్తోంది. తద్వారా భూసేకరణ ప్రక్రియను వేగవంతం చేయవచ్చని అంచనా వేస్తోంది.
అయితే, ట్రిపుల్ ఆర్ దక్షిణ భాగం అలైన్‌మెంట్‌ విషయంలో గతంలో వివాదాలు తలెత్తాయి. అలైన్‌మెంట్‌ను మార్చారంటూ రైతులు, భూ యజమానులు ఆందోళన చేపట్టారు. ప్రభావశీలులు, పారిశ్రామికవేత్తలకు చెందిన భూములను కాపాడేందుకు చిన్న, సన్నకారు రైతుల భూములను లక్ష్యంగా చేసుకున్నారని వారు ఆరోపించారు. మరోవైపు, దక్షిణ భాగం అలైన్‌మెంట్‌కు భారత జాతీయ రహదారుల ప్రాధికార సంస్థ (ఎన్‌హెచ్‌ఏఐ) నుంచి ఇప్పటివరకు అనుమతి లభించలేదని సమాచారం. దీంతో భూసేకరణ, అలైన్‌మెంట్‌ ఖరారు అంశాలు ఈ ప్రాజెక్టులో కీలకంగా మారాయి.
201 కిలోమీటర్ల పొడవుతో ఆరు లేన్లుగా నిర్మించనున్న రీజినల్ రింగ్ రోడ్ (ఆర్ఆర్ఆర్) దక్షిణ భాగం తంగడ్‌పల్లి, చౌటుప్పల్ నుంచి సంగారెడ్డి వరకు విస్తరించనుంది. ఈ ఎక్స్‌ప్రెస్‌వే సంగారెడ్డి, రంగారెడ్డి, నాగర్‌కర్నూల్, యాదాద్రి భువనగిరి, వికారాబాద్, మహబూబ్‌నగర్, నల్గొండ జిల్లాల మీదుగా సాగనుంది.
అయితే, దక్షిణ భాగానికి సంబంధించిన అలైన్‌మెంట్‌ను కేంద్ర ప్రభుత్వానికి పంపినప్పటికీ, ఇప్పటివరకు ఆమోదం లభించలేదు. మరోవైపు, ఆర్ఆర్ఆర్ ఉత్తర భాగానికి కూడా కేంద్రం నుంచి అవసరమైన అనుమతులు ఇంకా అందకపోవడంతో టెండర్ల గడువును అధికారులు ఎప్పటికప్పుడు పొడిగిస్తున్నారు. అయినప్పటికీ, ప్రాజెక్టు వ్యయంలో రాష్ట్ర ప్రభుత్వం తన వాటాగా చెల్లించాల్సిన రూ.627 కోట్లను ఇప్పటికే భారత జాతీయ రహదారుల ప్రాధికార సంస్థ (ఎన్‌హెచ్‌ఏఐ)కి చెల్లించింది.