శుభకార్యాలకు ఎంతో ప్రత్యేకమైన శ్రావణమాసం వచ్చేసింది. ఆగస్టు 13 నుంచి శ్రావణ మాసం ప్రారంభమైంది. దీంతో ఇక పెళ్లి బాజాలు మోగనున్నాయి. నూతన గృహ ప్రవేశాలు, ఇతర శుభకార్యాలు కూడా జోరందుకోనున్నాయి. సెప్టెంబర్ 11వ తేదీ వరకు శ్రావణ మాసం కొనసాగనుంది. ఇక ఆగస్టు 15 నుంచి వివాహ వేడుకలు కూడా ప్రారంభం కానున్నాయి.
దీంతో పెళ్లిళ్లు, శుభకార్యాలతో ఫొటోగ్రాఫర్లు, కేటరింగ్ నిర్వాహకులు, డెకరేషన్ సిబ్బంది, వంటవాళ్లకు చేతినిండా పని దొరకనుంది. శ్రావణమాసం సందర్భంగా శుభకార్యాల సందడి మొదలై వ్యాపార వర్గాల్లోనూ ఉత్సాహం నెలకొంది.
శ్రావణ మాసం వచ్చిందంటే హిందూ సమాజంలో పండగ వాతావరణం నెలకొంటుంది. పెళ్లిళ్లు, శుభకార్యాలతో ప్రతి ఇంటా సందడి కనిపిస్తుంది. అంతేకాదు, శ్రావణ మాసంతో పండగల సీజన్ కూడా ప్రారంభమవుతుంది. వరలక్ష్మి వ్రతం, శ్రీకృష్ణాష్టమి, వినాయక చవితి వంటి ముఖ్యమైన పండగలు వరుసగా రానున్నాయి. ఈ నేపథ్యంలో ఆగస్టు 13న ప్రారంభం కానున్న శ్రావణ మాసం విశేషాలపై ఓ చిన్న కథనం.
శ్రావణ మాసం అంటే ముఖ్యంగా మహిళలకు ఎంతో ఇష్టమైన మాసం. ఆషాఢ మాసం తర్వాత వచ్చే ఈ పవిత్రమైన నెలలో ప్రతి ఇంటా పూజలు, వ్రతాలు, శుభకార్యాలతో సందడి నెలకొంటుంది. ముఖ్యంగా మహిళలు శ్రావణ శుక్రవారాలు, ఇతర పర్వదినాల్లో ప్రత్యేక పూజలు నిర్వహిస్తారు. నూతన దంపతులకు కూడా ఈ మాసం ఎంతో ప్రత్యేకంగా భావిస్తారు.
ఈ నెల 13వ తేదీ నుంచి శ్రావణ మాసం ప్రారంభం కానుండగా, రెండు రోజుల తర్వాత నుంచే వివాహ వేడుకలు కూడా మొదలు కానున్నాయి. దీంతో పెళ్లిళ్ల సందడితో పాటు ఫొటోగ్రఫీ, కేటరింగ్, డెకరేషన్, పూల అలంకరణ వంటి పలు వ్యాపార రంగాలు కూడా జోరందుకోనున్నాయి.
