ఇటీవల జనసేన పార్టీలో చేరిన వంగవీటి రంగా కుమారుడు వంగవీటి రాధాకృష్ణకు ఆ పార్టీ కీలక బాధ్యత అప్పగించింది. విజయవాడ మేయర్ అభ్యర్థిగా ఆయన పేరును ప్రకటించింది. అలాగే, ఏలూరు మేయర్ అభ్యర్థిగా రెడ్డి అప్పలనాయుడును ఎంపిక చేస్తూ జనసేన తాజా జాబితాను విడుదల చేసింది.
మరోవైపు, తెలుగుదేశం పార్టీ కూడా మున్సిపల్, కార్పొరేషన్ ఎన్నికలకు సంబంధించి తన తుది అభ్యర్థుల జాబితాను ప్రకటించింది. ఈ ఎన్నికల్లో మహిళలకు టీడీపీ పెద్దపీట వేసింది. మొత్తం స్థానాల్లో 61 శాతాన్ని మహిళలకు కేటాయించినట్లు వెల్లడైంది. వైఎస్సార్‌సీపీ కూడా అభ్యర్థుల ఎంపికలో మహిళలకు అధిక ప్రాధాన్యత ఇవ్వడం గమనార్హం. దీంతో స్థానిక సంస్థల ఎన్నికల్లో మహిళా అభ్యర్థుల ప్రాతినిధ్యం ప్రధాన అంశంగా మారింది.
అందరూ ఊహించినట్లుగానే విజయవాడ మేయర్ అభ్యర్థిగా వంగవీటి రాధాకృష్ణ పేరును జనసేన పార్టీ ఖరారు చేసింది. మున్సిపల్ కార్పొరేషన్ ఎన్నికల్లో పార్టీ తరఫున పోటీ చేసే అభ్యర్థుల జాబితాను విడుదల చేసింది. ఇందులో రెండు కార్పొరేషన్లు, 16 మున్సిపాలిటీలకు అభ్యర్థులను ప్రకటించింది. విజయవాడ కార్పొరేషన్ మేయర్ అభ్యర్థిగా వంగవీటి రాధాకృష్ణను, ఏలూరు కార్పొరేషన్ అభ్యర్థిగా రెడ్డి అప్పలనాయుడును ఎంపిక చేసింది. మరోవైపు, జనసేనతో పాటు తెలుగుదేశం పార్టీ కూడా ఎన్నికలకు సంబంధించి తమ తుది అభ్యర్థుల జాబితాను వెల్లడించింది.
టీడీపీ మూడో విడత జాబితా విడుదల
తెలుగుదేశం పార్టీ ఇప్పటికే రెండు విడతల్లో అభ్యర్థుల జాబితాలను ప్రకటించగా, తాజాగా మూడో విడత జాబితాను కూడా విడుదల చేసింది. ఇందులో మూడు కార్పొరేషన్ల మేయర్ స్థానాలతో పాటు 31 మున్సిపాలిటీలు, నగర పంచాయతీల చైర్‌పర్సన్ పదవులకు అభ్యర్థులను ఖరారు చేసింది. మచిలీపట్నం కార్పొరేషన్ మేయర్ అభ్యర్థిగా షేక్ అబ్దుల్ అబిదా, గుంటూరు కార్పొరేషన్‌కు కోవెలమూడి లక్ష్మీ అపర్ణ, ఒంగోలు కార్పొరేషన్‌కు నల్లమల్లి శ్రీశిల్ప పేర్లను ప్రకటించింది. దీంతో మున్సిపల్, కార్పొరేషన్ ఎన్నికల్లో అభ్యర్థుల ఎంపిక ప్రక్రియ కీలక దశకు చేరుకుంది.
మేయర్, ఛైర్‌పర్సన్‌ అభ్యర్థుల ఎంపికలో తెలుగుదేశం పార్టీ మహిళలకు అధిక ప్రాధాన్యత ఇచ్చింది. ఇప్పటివరకు ప్రకటించిన జాబితా ప్రకారం మొత్తం స్థానాల్లో 61 శాతాన్ని మహిళలకు కేటాయించడం విశేషం. సాధారణంగా మహిళలకు 50 శాతం స్థానాలు రిజర్వ్‌ చేయాల్సి ఉండగా, అంతకుమించి సీట్లు కేటాయించినట్లు పార్టీ వర్గాలు వెల్లడించాయి. అలాగే బీసీ, ఎస్సీ, ఎస్టీ, మైనార్టీ వర్గాలకు కలిపి 50 శాతం స్థానాలు కేటాయించింది. ఇందులో బీసీలకు 25, మైనార్టీలకు 10, ఎస్సీలకు 9, ఎస్టీలకు ఒక స్థానం కేటాయించింది.
మరోవైపు, వైఎస్సార్‌ కాంగ్రెస్‌ పార్టీ కూడా మేయర్ అభ్యర్థుల ఎంపికలో మహిళలకు ప్రాధాన్యత కల్పించింది. రాష్ట్రంలోని 17 కార్పొరేషన్ల మేయర్ స్థానాల్లో బీసీలకు ఐదు, జనరల్‌ మహిళలకు ఐదు, అన్‌రిజర్వ్‌డ్‌ జనరల్‌ కేటగిరీకి నాలుగు, ఎస్సీలకు రెండు, ఎస్టీలకు ఒక స్థానం కేటాయించింది. రెండు విడతల్లో అభ్యర్థుల జాబితాలను ప్రకటించిన వైసీపీ సైతం మహిళలకు గణనీయమైన ప్రాధాన్యత ఇవ్వడం రాజకీయంగా ప్రాధాన్యం సంతరించుకుంది.
రాజకీయ పార్టీలకు కీలకంగా మున్సిపల్ ఎన్నికలు
కూటమి ప్రభుత్వం అధికారంలోకి వచ్చి రెండున్నరేళ్లు పూర్తయిన తర్వాత జరుగుతున్న ఈ ఎన్నికలు రాజకీయంగా ప్రాధాన్యతను సంతరించుకున్నాయి. రానున్న ఎన్నికలకు ఈ ఫలితాలు దిశానిర్దేశం చేస్తాయని భావిస్తున్న అధికార, ప్రతిపక్ష పార్టీలు అత్యధిక స్థానాలను గెలుచుకునేందుకు వ్యూహాలు రచిస్తున్నాయి. ముఖ్యంగా, మున్సిపల్, కార్పొరేషన్ ఎన్నికల్లో తమ బలాన్ని నిరూపించుకోవాలని వైఎస్సార్‌సీపీ పట్టుదలతో ఉంది. దీంతో ఈ ఎన్నికలు రాష్ట్ర రాజకీయాల్లో కీలక పరిణామంగా మారనున్నాయి.